Fjalori
PUSHTUAR

PUSHTÚAR (i, e) mb. Që është pushtuar nga një shtet tjetër a nga një ushtri e huaj; që ka humbur lirinë e pavarësinë dhe ndodhet nën zgjedhën e huaj; i robëruar; kund. i çliruar. Tokat (vendet, fshatrat, krahinat) e pushtuara. Zonë e pushtuar.
✱Sin.: i okupuar, i robëruar, i zaptuar, i shkelur, i skllavëruar, i nënshtruar, i zënë.

Rezultate të tjera nga lematizimi ose nga ngjashmëria me formën përfaqësuese: PUSHTOJ
PUSHTOJ

PUSHT/ÓJ vep., ~ÓVA, ~ÚAR kal. 1. Fut ushtrinë në një vend tjetër dhe shtie në dorë tokat e tij, e shkel një vend tjetër dhe ushtroj pushtetin mbi të; i heq me dhunë lirinë dhe pavarësinë një vendi a një populli, e robëroj; zë me forcë një vend; kund. çliroj. Pushtuan tërë vendin. E pushtuan me (pa) luftë. Nuk e pushtuan dot.
2. edhe fig. Arrij deri në një vend të vështirë dhe e shkel atë; ngjitem deri në një vend shumë të lartë; shtie në dorë diçka, arrij ta zotëroj. Alpinistët pushtuan majën. Aeroplanët pushtonin qiellin.
3. E kap dikë dhe e shtrëngoj fort me të dy krahët, e përqafoj dikë me mall; e përfshij diçka me dy krahët të hapur. Pushtoi të birin me mall. E pushtoi në kraharor. E pushtoi me të dy duart. E pushtoi fort. Nuk e pushtonin dot dy veta atë pemë.
4. fig. Arrij ta kap të gjithin me një vështrim. E pushtoi peizazhin detar (malor, kodrinor) me sy. E pushtoi sallën (klasën) me një vështrim.
5. edhe fig., vet. v. III Vjen, përhapet (zakonisht diçka jo e pëlqyeshme) dhe mbulon një vend a hapësirë, e përfshin të gjithë, e pllakos E pushtoi flaka. Bora pushtoi male e fusha. Mornicat i pushtuan trupin. Vendin e pushtoi errësira. Heshtja pushtoi sallën.
6. fig., kryes. v. III (zakon. me një trajtë të shkurtër të përemrit vetor në r. kallëzore) Më zë, më kap tërësisht një ndjenjë, një mendim a një gjendje, më mbërthen të tërin; më bën për vete. E pushtoi gëzimi (krenaria). E pushtoi dëshira. E pushtoi frika (tmerri, paniku, zemërimi). E pushtoi mërzia. E pushtuan mendime të zymta. Pushtoi mendjet (ndjenjat) e lexuesve.
✱Sin.: zaptoj, gllabëroj, robëroj, okupoj, shkel, zë, përlaj, gëlltit, kap, përfshij, përqafoj, rrok, mbështjell, përmbështjell, përhap, pllakos, rrëmbej, mbërthej, hipi, zatet, ndërhyj, skllavëroj, nënshtroj, arrij, ngjit, zotëroj, shtrëngoj, mbuloj, kaploj, vërshoj, regëtij, kllapos.

Rezultate të ngjashme

PUSHTUES

PUSHTÚES,~I m. sh. ~, ~IT Ai që pushton tokat e një vendi tjetër, ai që shkel e shtyp një vend tjetër; agresor. Pushtuesit e huaj. Në kohën e pushtuesve osmanë.

Shfaq përkufizimin e plotë →
PUSHTUES

PUSHTÚES,~E mb. 1. Që pushton tokat e një vendi tjetër. Shtet (vend) pushtues. Ushtritë (forcat) pushtuese. Specie pushtuese (biol.) specie joindigjene që shkojnë për ushqim apo pë…

Shfaq përkufizimin e plotë →
PUSHTUESHMËRI

PUSHTUESHMËRÍ,~A f. Të qenët i pushtueshëm; vetia e diçkaje që është e kushtueshme.

Shfaq përkufizimin e plotë →
PUSHTUESHËM

PUSHTÚESH/ËM (i), ~ME (e) mb. Që mund të pushtohet; kund. i papushtueshëm. Lehtësisht i pushtueshëm. Kështjellë e pushtueshme.

Shfaq përkufizimin e plotë →

Kliko këtu për të parë përdorime të mundshme të kësaj fjale (ose të ngjashme) në përkufizime të fjalëve të tjera (rezultate në kontekst)

Ky fjalor është domosdoshmëri për shkrimtarët e për publicistët, për shkollarët e për studentët, për mësuesit e për pedagogët, për studiuesit e për këdo që merret me përdorimin e kultivimin e gjuhës amtare.

Ai u vjen në ndihmë gjithë atyre që merren veçanërisht me gjuhën e shkruar, por edhe të folur, me krijime e me përkthime, me hartimin e fjalorëve të tipave të ndryshëm etj.

...lexo më tepër.


© Akademia e Shkencave e Shqipërisë, 2026 — Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.

www.akad.gov.al
Adresa: Sheshi "Fan Noli", Tiranë