Fjalori
MPREHUR

MPRÉHUR (i, e) mb. 1. Që i është mprehur tehu. Thikë (sharrë) e mprehur. Gërshërë të mprehura.
2. Që është bërë me majë, që është holluar në njërin skaj ose në të dy skajet. Laps i mprehur.
3. I gatshëm e i prirë të mbajë një qëndrim të vendosur kundrejt dikujt a diçkaje; që është i nxitur a i ndërsyer kundër një tjetri, që është bërë gati të veprojë (kundër) dikujt a diçkaje. Ishte i mprehur. I mprehur për sherr (për grindje, për rrahje). I mprehur për luftë. I mprehur për t’u zënë.
4. Që i ka acaruar marrëdhëniet me dikë, që është zënë me dikë, i zemëruar. Iku i mprehur. U largua (u ndanë) të mprehur. Qëndrojmë me armë të mprehura jemi të gatshëm e të përgatitur për të përballuar çdo sulm, jemi syhapët e të gatshëm kundër çdo armiku. Rrinte (dëgjonte) me veshë të mprehur dëgjonte mirë e me kujdes që të mos i shpëtonte asgjë, rrinte i përqendruar e i vëmendshëm.

MPREHUR

MPRÉHUR,~IT (të) as. Mprehje. Të mprehurit e thikës.

Rezultate të tjera nga lematizimi ose nga ngjashmëria me formën përfaqësuese: MPREH
MPREH

MPREH vep., ~A, ~UR kal. 1. Holloj tehun e thikës, sëpatës a të një mjeti tjetër që të presë më mirë. Mpreh thikën (gërshërët, briskun, shpatën, sharrën). E mpreh me limë (me grihë, me rrip, në gur). E mpreh mirë. Sëpatën po nuk e mprehe, nuk pret. (fj. u.).
2. E holloj, e ngushtoj shumë diçka në skaj, e bëj si thumb; e bëj me majë skajin e një lapsi etj. Mpreh lapsin. Mpreh shtizën (bizën, fëndyellin). E mprehu nga të dy anët.
3. fig. E bëj diçka më të fortë, më të theksuar, më të qartë etj., e ngre në një shkallë më të lartë, e forcoj shumë; i kushtoj vëmendje gjithnjë e më të madhe, i jap rëndësi të veçantë. Mpreh dëgjimin (shikimin). Mpreh vëmendjen (guximin). Mpreh vigjilencën. Mpreh kritikën.
4. E bëj më të nderë një gjendje a diçka tjetër, e keqësoj, e acaroj. I mprehu marrëdhëniet me dikë.
5. E nxit dikë për t’u zënë me një tjetër, e mbush, e ndërsej kundër tij, e bëj që të mbajë qëndrim armiqësor kundrejt dikujt, që të sillet keq me të etj. E kishin mprehur mirë. Kush të ka mprehur kështu?
♦ Mpreh *armët. I ka mprehur *brirët (dikush). Mpreh *dhëmbët (dikush). E mpreh kalemin (*lapsin). Mpreh *kunja (kot) (dikush). E mpreh *lapsin (kalemin). Mpreh *sytë. E mprehu pallën (*shpatën) (dikush). Mprehu *veshët (dikush).

Kliko këtu për të parë përdorime të mundshme të kësaj fjale (ose të ngjashme) në përkufizime të fjalëve të tjera (rezultate në kontekst)

Ky fjalor është domosdoshmëri për shkrimtarët e për publicistët, për shkollarët e për studentët, për mësuesit e për pedagogët, për studiuesit e për këdo që merret me përdorimin e kultivimin e gjuhës amtare.

Ai u vjen në ndihmë gjithë atyre që merren veçanërisht me gjuhën e shkruar, por edhe të folur, me krijime e me përkthime, me hartimin e fjalorëve të tipave të ndryshëm etj.

...lexo më tepër.


© Akademia e Shkencave e Shqipërisë, 2026 — Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.

www.akad.gov.al
Adresa: Sheshi "Fan Noli", Tiranë