Fjalori
MIQËSI

MIQËSÍ,~A f. sh. ~, ~TË 1. Ndjenjë dashamirësie e ndërsjellë, që lind në mes dy a më shumë vetave pa lidhje gjaku dhe që mbështetet në besimin e nderimin ndaj njëri-tjetrit, në mendime, synime e interesa të përbashkëta; tërësi lidhjesh e marrëdhëniesh që frymëzohen nga ndjenja të tilla, lidhje e ngushtë shoqërore ndërmjet njerëzve që e duan dhe e përkrahin njëri-tjetrin, që i ndajnë bashkë gëzimet e hidhërimet; kund. armiqësi. Miqësi e vërtetë (e pandarë, e ngushtë, e çiltër, e pastër). Miqësi e vjetër (e re). Miqësi familjare. Miqësi e rreme. Ndjenjat e miqësisë. Ka miqësi me të. Ruaj (çmoj, vlerësoj, respektoj) miqësinë. Miqësi e sëmurë miqësi jo e shëndoshë që frymëzohet nga qëllime jo të mira. Miqësia miqësi, puna punë. (fj. u.) miqësia mbetet miqësi dhe puna mbetet punë. Për miqësinë që kemi! (betim në emër të miqësisë që kemi me dikë)
2. Lidhje e marrëdhënie të mira në mes dy a më shumë vendeve, popujve ose partive, që udhëhiqen nga ideale, nga parime dhe nga interesa të përbashkëta. Miqësia ndërmjet popujve. Traktat miqësie. Miqësi e pathyeshme (e përjetshme, e fortë, vëllazërore) midis dy popujve.
3. përmb. Gjithë miqtë e dashamirët; njerëzit e afërm. Erdhi (u mblodh) miqësia. Thirri miqësinë në gosti.
4. Krushqi. Lidhën miqësi.

Rezultate të ngjashme

MIQËSIM

MIQËSÍM,~I m. Të bërët mik me dikë. Miqësimi midis tyre mori kohë. Miqësimi i mësuesit me nxënësit. Përdor rrjetet sociale të miqësimit. Miqësimi me shtetet fqinje.

Shfaq përkufizimin e plotë →
MIQËSISHT

MIQËSÍSHT ndajf. Në mënyrë miqësore, si mik; me dashamirësi; kund. armiqësisht. I foli (i buzëqeshi) miqësisht. E përshëndeti miqësisht. E këshilloi miqësisht. I shtrëngoi dorën mi…

Shfaq përkufizimin e plotë →

Kliko këtu për të parë përdorime të mundshme të kësaj fjale (ose të ngjashme) në përkufizime të fjalëve të tjera (rezultate në kontekst)

Ky fjalor është domosdoshmëri për shkrimtarët e për publicistët, për shkollarët e për studentët, për mësuesit e për pedagogët, për studiuesit e për këdo që merret me përdorimin e kultivimin e gjuhës amtare.

Ai u vjen në ndihmë gjithë atyre që merren veçanërisht me gjuhën e shkruar, por edhe të folur, me krijime e me përkthime, me hartimin e fjalorëve të tipave të ndryshëm etj.

...lexo më tepër.


© Akademia e Shkencave e Shqipërisë, 2026 — Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.

www.akad.gov.al
Adresa: Sheshi "Fan Noli", Tiranë