Fjalë që fillojnë me...
Fjalë me të njëjtat parashtesa ose tema fjalëformuese.
MÉTË ndajf. Me mungesa, mangët, jo plotësisht. Ia bëri punën metë. Ia dha paratë metë. E mbushi shishen metë. Ia la përgjigjen metë. Janë dy karrige metë janë dy më pak. Nuk i la gjë metë e bëri mirë ose shumë mirë një punë; ia bëri shumë mirë, ia bëri ashtu si duhet.
♦ S’i lë gjë metë (dikujt a diçkaje) shih s’i lë gjë mangët (dikujt a diçkaje). Nuk ta lë metë (dikush) shih nuk ta lë mangët (dikush).
MÉTË (i, e) mb. 1. Që ka diçka mangët, që nuk është i plotë, që i mungon diçka, i mangët; i cungët. Puna mbeti e metë.
2. fig. Që nuk është plotësisht në rregull nga ana mendore, që ka një cen nga ana fizike ose mendore; i gjymtë ose budalla. I vogli kishte lindur i metë nga mendja. Vajza kishte ndodhur pak e metë nga trutë.
✱Sin.: i mangët, i trashë, budalla, gjysmak, trutharë, torollak, trudalë, i patru.
♦ I metë (çyryk, sakat) nga mendja (nga trutë) (dikush) që nuk ka zhvillim mendor të plotë, me të meta mendore; budalla, i trashë, gdhe; i mpitë nga mendtë; i trashë nga mendja (nga trutë, nga koka); pykë nga mendja; rrotë nga mendja përb.; rrotë mulliri tall.; çalon nga trutë (dikush); ka një dërrasë (ca dërrasa) mangët (dikush) mospërf.
MÉT/Ë,~A (e) f. sh. ~A, ~AT (të) 1. Pjesa që i mungon diçkaje për të qenë në sasinë a në cilësinë e duhur, cen; diçka që i mungon një vepre, një pune etj. për të qenë e plotë a e përkryer, mungesë. Kjo është një e metë e programit kompjuterik. Shpesh në punën tonë ndeshim vështirësi teknike dhe këto e kanë fajin për të metat që vërehen. Tokat e kishin një të metë, në to nuk kalonte uji. Eseja kishte disa të meta.
2. Cen në trup ose në mendje, gjymtim trupor a mendor. Të meta trupore (fizike). Me të meta mendore.
3. Diçka e keqe që ka njeriu në karakter e në sjellje, ves, huq; dobësi, gabim. Ngathtësia është një e metë e saj. Nuk ka njeri pa të meta. Mikja ime, tek ti nuk ka asnjë të metë. Mos ai kërkon të fshehë ndonjë cen apo të metë? Ia fali të metat.
4. Ajo që nuk është plotësisht në rregull nga ana mendore, ajo që ka një cen nga ana fizike ose mendore; budallaqe. Me atë të metën merresh ti?
✱Sin.: mangësi, cen, gjymti, gjymtim, gërdhitë, kusur, minus, noksan, zhibël, yçkël, xanxë, gand, defekt, plasë, ogi, budallaqe.
MÉT/ËR,~RI m. sh. ~RA, ~RAT 1. Njësi kryesore për matjen e gjatësisë, që ndahet në njëqind centimetra dhe që është vënë në bazë të sistemit të masave të gjatësisë (shkurt. m). Metë…
Shfaq përkufizimin e plotë →
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë