Fjalori
KALBUR

KÁLBUR (i, e) mb. 1. Që është kalbur ose është prishur, për shkak se ka mbetur gjatë në lagështirë dhe pa ajrosje etj. (për lëndë organike, ushqime, fruta, bimë etj.). Qepë (mollë) të kalbura.
2. fig. Që këputet shpejt, jo i fortë (për sende, litarë etj); i kalbët. Litar (tel) i kalbur.
3. fig. I dobësuar dhe i tretur, që ka vuajtur nga sëmundjet, mungesa e ushqimeve etj.; i rënë moralisht e shpirtërisht; i pafuqishëm (për një njeri a një kafshë shtëpiake etj.); që tashmë mezi mbahet në këmbë. Njeri i kalbur.
4. fig. Që s’ka më vlerë; i vjetruar; i degjeneruar. Sistem (regjim) i kalbur.
✱Sin.: i kalbëzuar, i prishur, i kalbët, i shpërbërë, i dekompozuar, i tretur, i vjetruar, i degjeneruar, i mykur.
♦ *Dru i kalbur. I kalbur në *bark. Të lidh me *pe të kalbur (dikush) iron. *Mollë e kalbur. Qep me *pe të kalbur (dikush). Me *rrënjë të kalbura. Nuk shkel në *dërrasë (në dhogë) të kalbur (dikush).

KALBUR

KÁLBUR,~A (e) f. sh. ~A, ~AT (të) 1. Pjesa ose ana e kalbur e diçkaje; kalbësirë.
2. edhe fig. Gjë e kalbur a e vjetruar; mbeturinë e panevojshme. Hodhi (hoqi) të kalburën.
✱Sin.: kalbësirë, kalbësi, hedhurinë, mbeturinë.

Rezultate të tjera nga lematizimi ose nga ngjashmëria me formën përfaqësuese: KALB
KALB

KALB vep., ~A, ~UR kal. 1. Bëj që të kalbet a që të shpërbëhet lënda organike e trupit të një njeriu, kafshe a e një qenieje tjetër të gjallë, duke e mbajtur për një kohë të gjatë në një vend të lagësht dhe të paajrosur; e lë gjatë një bimë a një lule që të fishket, pa u përkujdesur fare për të (për ta ujitur ose për t’i bërë shërbimet e duhura); kalbëzoj; prish. Lagështira e kishte kalbur trupin e tij. Shiu i kalbi zarzavatet (patatet).
2. fig. E rrah a e godas fort dikë (me grushte, me kopaçe etj.), e zhdëp në dru, e kopaçit. E kalbi në dru të gjorin.
3. edhe fig. Prish a dëmtoj shëndetin e dikujt, të një kafshe etj., duke e lënë për një kohë të gjatë në një vend, pa ushqim a pa mjekim etj.; grymos. Sëmundja e gjatë e kalbi të sëmurin. Na kalbi moti i keq.
4. fig. Bëj që dikush të lodhet tepër, të mërzitet ose të bjerë moralisht e shpirtërisht; e zvetënoj. Na kalbi pandemia. Na kalbi kurbeti (fukarallëku, lufta).
✱Sin.: kalbëzoj, prish, dekompozoj, shpërbëj, zvetënoj, tret, kopaçit, kopanis, grymos.

Kliko këtu për të parë përdorime të mundshme të kësaj fjale (ose të ngjashme) në përkufizime të fjalëve të tjera (rezultate në kontekst)

Ky fjalor është domosdoshmëri për shkrimtarët e për publicistët, për shkollarët e për studentët, për mësuesit e për pedagogët, për studiuesit e për këdo që merret me përdorimin e kultivimin e gjuhës amtare.

Ai u vjen në ndihmë gjithë atyre që merren veçanërisht me gjuhën e shkruar, por edhe të folur, me krijime e me përkthime, me hartimin e fjalorëve të tipave të ndryshëm etj.

...lexo më tepër.


© Akademia e Shkencave e Shqipërisë, 2026 — Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.

www.akad.gov.al
Adresa: Sheshi "Fan Noli", Tiranë