Fjalori
JETUAR

JETÚAR,~IT (të) as. Të qenët në jetë, të qenët gjallë e duke i përjetuar ngjarjet. Të jetuarit e një ngjarjeje. Të jetuarit afër miqve (afër shokëve). Të jetuarit me të kaluarën. Të jetuarit gjatë (pak, shumë). Të jetuarit mirë. Mënyra e të jetuarit të rrojtur, rrojtje, rrënesë.
✱Sin.: të rrojtur, rrojtje, rrënesë.

JETUAR

JETÚAR (i, e) mb. Që e kam parë me sytë e mi, që e kam provuar vetë ose e kam ndier thellë në shpirt; që e kam jetuar a përjetuar. Ngjarje e jetuar.

Rezultate të tjera nga lematizimi ose nga ngjashmëria me formën përfaqësuese: JETOJ
JETOJ

JET/ÓJ vep., ~ÓVA, ~ÚAR jokal. 1. Jam gjallë, jam në jetë, rroj, gjëllij; bëj një jetë të gjallë. Jeton me nder. Jetoi gjatë (shumë, pak, sa u plak). Dua të jetoj. Di të jetojë (si duhet). Ky dru jeton dyqind vjet. Për një nder jeton njeriu. (fj. u.). Sa të jetosh, do të mësosh. (fj. u.).
2. Plotësoj nevojat për të rrojtur, siguroj kushtet e nevojshme për jetesë; mbahem në jetë, ushqehem. Jeton me punën e vet (me duart e veta). Jeton me djersën e ballit. Jetonte në kurriz të të tjerëve. Jetonin me barishte (me bukë thatë). Ka jetuar me koret (me thembrat) e botës. Jetonte me sot me nesër bënte një jetë të pasigurt, nuk dinte sot ç’do të hante nesër, i shtynte ditët me të keq.
3. Rroj bashkë me dikë, lidhem a hyj në marrëdhënie të caktuara me të gjatë jetës. Jeton me gruan e me fëmijët. Jeton me prindërit e me vëllezërit. Jetojnë bashkë. - Me kë do të jetosh? Jetojmë mirë me fqinjët. Jetoi në një fshat të largët.
4. Banoj diku, rri; rroj në një vend, e kam ndejën; e shkoj jetën diku me dikë; në sh. popullojnë një vend. Jetoj në fshat (në qytet). S’jeton këtu. Këto kafshë jetojnë në pyll (në male, në det, në vende të nxehta, në pol).
5. Shkoj jetën, e kaloj jetën në një mënyrë të caktuar; kam një mënyrë jetesë të caktuar. Jetojmë si fshatarë. Jeton vetëm (në vetmi). Jetonin mirë (keq). Jetojmë me të gjitha të mirat. S’dinte të jetonte. Jetojnë nën nivelin e varfërisë.
6. vet. v. III Ka jetë të gjatë; vazhdon të punojë e të veprojë; duron shumë, nuk prishet nga përdorimi ose nga koha. S’jetoi gjatë makina.
7. edhe kal. Marr pjesë në një ngjarje, në një gëzim a hidhërim etj. ose jam me shpirt, me mendje, me ndjenja me diçka; njoh a shoh diçka në jetë, kaloj a provoj diçka nga jeta; e ndiej thellë në shpirt diçka; përjetoj. Jetuan çaste (ngjarje) dramatike (të bukura, të hidhura). Jeton me shpirt (me mendje). Jeton me çështjet e ditës. Jetonte me të kaluarën. Jetonte larg problemeve të kohës. Jetuam vitet e luftës.
8. fig., kryes. v. III Është në kujtesën ose në mendjen e të tjerëve, nuk e harrojnë; është e gjallë diçka, ruhet e çmohet, ka lënë gjurmë. Jeton në kujtesën (në mendjen, në zemrat) e njerëzve.
✱Sin.: rroj, rrnoj, gjëllij.
♦ Jetoj (rroj) në një *lëkurë (me dikë).

Kliko këtu për të parë përdorime të mundshme të kësaj fjale (ose të ngjashme) në përkufizime të fjalëve të tjera (rezultate në kontekst)

Ky fjalor është domosdoshmëri për shkrimtarët e për publicistët, për shkollarët e për studentët, për mësuesit e për pedagogët, për studiuesit e për këdo që merret me përdorimin e kultivimin e gjuhës amtare.

Ai u vjen në ndihmë gjithë atyre që merren veçanërisht me gjuhën e shkruar, por edhe të folur, me krijime e me përkthime, me hartimin e fjalorëve të tipave të ndryshëm etj.

...lexo më tepër.


© Akademia e Shkencave e Shqipërisë, 2026 — Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.

www.akad.gov.al
Adresa: Sheshi "Fan Noli", Tiranë