Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
BOMBASTÍK,~E mb., libr. 1. Që bëhet me bujë të madhe për të krijuar përshtypje të jashtme a për t’u dukur, i zbukuruar jashtë mase. Veprim (aksion) bombastik. Foto bombastike. Sukses bombastik. Lajm (artikull) bombastik. Lëvdata bombastike. Premtime bombastike.
2. I stërholluar e i mbushur me shumë fjalë; i ngarkuar me hollësi e i tepruar me fjalë të mëdha që prishin stilin; i bujshëm, i fryrë, i madh; libr. pompoz. Fjalim bombastik. Deklaratë bombastike. Titull bombastik. Emër bombastik. Stil bombastik. Forma bombastike.
✱Sin.: i bujshëm, i fryrë, i madh, zhurmëshumë, i zhurmshëm, zhurmëmadh, pompoz.
BUBRRINÁR,~E mb. I zhurmshëm, zhurmëshumë. Njeri bubrrinar e poteremadh.
BÚJSH/ËM (i), ~ME (e) mb. 1. Që lë përshtypje të madhe ose ngjall interesim të madh te të tjerët, që ka jehonë të gjerë, që bën bujë. Fitore (ngjarje) e bujshme. Fjalim i bujshëm. Sukses i bujshëm. Rasti më i bujshëm. Aksion i bujshëm. Krim i bujshëm. Botim i bujshëm.
2. keq. Që bëhet me bujë e me zhurmë të madhe sa për t’u dukur; që shoqërohet me bujë e me zhurmë për të bërë përshtypje te të tjerët ose për të mashtruar të tjerët, i fryrë, pompoz. Fushatë (propagandë) e bujshme. Premtim i bujshëm. Rikthim (largim) i bujshëm. Titujt e bujshëm të gazetave. Lajm i bujshëm.
3. fig., keq. Që bën zhurmë të madhe, që i pëlqen buja; që ka shumë zhurmë e lëvizje. Tip (personazh, emër) i bujshëm. Treg (qytet) i bujshëm.
4. edhe fig. Që shpërthen e rritet mirë (për bimët); që vjen me tërë gjallërinë e bukurinë dhe me të gjitha të mirat e saj (për stinët); që zhvillohet shumë e menjëherë, që bëhet me vrull e shpejt. Gjelbërim i bujshëm. Bimësi e bujshme. Pranverë (vjeshtë) e bujshme. Lulëzim (zhvillim, përparim) i bujshëm.
✱Sin.: bujëmadh, i famshëm, famëmadh, zulmëmadh, i zhurmshëm, zhurmëshumë, zhurmëmadh.
ZHÚRMSH/ËM (i), ~ME (e) mb. 1. Që bën zhurmë kur lëviz, kur punon ose kur kalon diçka nëpër të; kund. i qetë. Lumë (përrua, det) i zhurmshëm. Tren (aeroplan) i zhurmshëm. Gjithë lagjja atëherë ishte e zhurmshme.
2. Që flet me zë të lartë; që bën shumë zhurmë e rrëmujë, zhurmëmadh. Turmë e zhurmshme. Nxënës (fëmijë) të zhurmshëm. - Më të zhurmshëm si ai nuk gjen. - Mos më merr për ndonjë njeri të zhurmshëm e poterexhi?
3. Që bëhet me shumë zhurmë; që shoqërohet me zhurma; që nuk ka tingëllim të rregullt e të qartë. Muzikë e zhurmshme. Lodra të zhurmshme. Mbledhje e zhurmshme. Frymëmarrje e zhurmshme.
4. Që ka shumë zhurmë e rrëmujë; që është plot gjallëri nga lëvizjet e njerëzve, të makinave etj.; që gumëzhin, zhurmëmadh. Qytet i zhurmshëm. Rrugë e zhurmshme. Jetë e zhurmshme. Panair i zhurmshëm. Ditë të zhurmshme.
5. keq. Që bëhet qëllimisht me zhurmë e bujë për të tërhequr vëmendjen e të tjerëve, zhurmëmadh. Deklarata (bisedime) të zhurmshme. Takim i zhurmshëm. Fushatë e zhurmshme.
6. Që bën bujë, i bujshëm. Fitore e zhurmshme.
✱Sin.: i zhurmët, i paqetë, i potershëm, zhurmues, gumzhitës, shurdhues, zhurmëmadh, zhurmëshumë, zhurmëplotë, zhurmëtar, i bujshëm.
ZHURMËMÁDH,~E mb. 1. Që nxjerr shumë zhurmë, që bën zhurmë të madhe, i zhurmshëm. Lumë (përrua) zhurmëmadh. Ujëvarë zhurmëmadhe. Aeroplan (traktor, tank) zhurmëmadh.
2. Që ka shumë lëvizje dhe zhurmë, i zhurmshëm; që bëhet me zhurmë të madhe. Qytet (kantier) zhurmëmadh. Dëfrim zhurmëmadh. Jetë zhurmëmadhe.
3. Që flet me zë të lartë, që bën zhurmë e rrëmujë; i zhurmshëm. Njeri zhurmëmadh. Të rinj (fëmijë) zhurmëmëdhenj. Turmë zhurmëmadhe.
4. keq. Që bëhet qëllimisht me shumë zhurmë e bujë për të tërhequr vëmendjen e njerëzve; i bujshëm, zhurmëshumë. Mbledhje zhurmëmadhe. Reklamë (propagandë) zhurmëmadhe. Deklarata zhurmëmëdha.
✱Sin.: i zhurmshëm, i bujshëm, zhurmëshumë.
ZHURMËPLÓTË mb., poet. Që bën shumë zhurmë, që krijon zhurma ose që është plot zhurma; zhurmëshumë. Pyll zhurmëplotë. Lumë zhurmëplotë.
ZHURMËSHÚMË mb. 1. Që bën shumë zhurmë gjatë lëvizjes a gjatë punës së vet; zhurmëmadh, i zhurmshëm. Lumë (det) zhurmëshumë.
2. Që është i mbushur plot me zëra e me zhurma të ndryshme, që ka shumë zhurmë, zhurmëmadh. Qytet (rrugë) zhurmëshumë.
3. keq. Që bëhet qëllimisht me bujë e me zhurmë për të tërhequr vëmendjen e të tjerëve; i bujshëm, zhurmëmadh. Lëvdata zhurmëshumë. Reklamë zhurmëshumë. Mbledhje zhurmëshumë.
4. si em. m. e f. Zhurmëmadh.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë