Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
BUJARÍ,~A f. 1. Të qenët bujar e i pritur, vetia e njeriut dorëdhënë e zemërbardhë; zemërgjerësi, shpirtmadhësi, fisnikëri shpirtërore. Bujaria e shqiptarit. Pres me bujari. Gjest i lartë bujarie. Me bujari të madhe. Dallohej për bujarinë dhe shpirtin e mirë. Bujaria s’matet me kuletë. (fj. u.).
2. Të qenët i ndershëm dhe i drejtë. E shprehte bujarinë në çdo gjë.
3. hist. Shtresa e bujarëve; përmb. tërësia e bujarëve, bujarët, fisnikëria; parësia, shtresa më e lartë në një fis. Bujaria feudale. Bujaria e lartë. Bujaria e fisit. Shtresa e bujarisë.
✱Sin.: dorëdhënie, dorëgjerësi, çiltëri, mirëpritje, fisnikëri, shpirtlartësi, shpirtmadhësi, zemërgjerësi, zemërbardhësi, oborrësi, parësi, pari, aristokraci, kalorësi.
GJERËSÍ,~A f. sh. ~, ~TË 1. Përmasë e trupit a e rrafshit në shtrirjen më të madhe tërthore nga një skaj te tjetri, zakonisht më e vogël se gjatësia; madhësia që i përgjigjet kësaj përmase a shtrirjeje. Gjerësia e tavolinës. Gjerësia e rrugës. Gjerësia e shpatullave. Me gjerësi tre metra. Mat gjerësinë.
2. fig. Shtrirja e madhe e diçkaje; përfshirja e shumë anëve, e dukurive, e dijeve etj.; vëllimi ose përpjesëtimet e gjera; kund. ngushtësi. Gjerësia e ideve. Zhvillohet në gjerësi.
3. fig. Të qenët i durueshëm dhe shpirtmadh; zemërgjerësi. Gjerësia e shpirtit.
4. gjeogr. Largësia e një vendi a e një pike nga ekuatori, e matur me gradë; kryes. sh. vend ose krahinë me veçori të caktuara të klimës e të botës së gjallë sipas largësisë nga ekuatori. Gjerësi gjeografike. Gjerësi veriore (jugore).
5. fiz. Ndryshimi midis dendurisë më të lartë e më të ulët të përcjelljes (transmetimit), i matur me herc. Gjerësi e valës (tek., inf.) sasi maksimale e informacionit, e matur me bit/sek, që mund të përcillet nëpër një kanal.
✱Sin.: shtrirje, zemërgjerësi, zemërbardhësi.
HOVARDÁLLË/K,~KU m. sh. ~QE, ~QET bised. Të qenët hovarda e dorëlëshuar; të qenët zemërbardhë dhe bujar. E priti me hovardallëk.
✱Sin.: bujari, zemërbardhësi, zemërgjerësi.
MIRËSÍ,~A f. sh. ~, ~TË 1. Të qenët i mirë, vetia e një njeriu të mirë, shpirtmirësi, zemërbardhësi. Ka mirësi. Ishte gjithë mirësi. Është i njohur për mirësinë e tij.
2. Butësi, ëmbëlsi, dashamirësi; sjellje e njerëzishme. E shikoi (i buzëqeshi) me mirësi. I foli me mirësi. E priti (e përcolli) me mirësi.
3. E mirë që i bëjmë një tjetri, nder. I kërkoi një mirësi. I bëri një mirësi të madhe. Nuk i harron mirësitë. Mirësia shpërblehet me mirësi. (fj. u.).
4. kryes. sh. Të mirat, vlerat, dobitë. Mirësitë e natyrës (e tokës, e vendit).
5. vet. nj. vjet. E mira, dobia. Punonin për mirësinë e Atdheut.
6. zakon. nj. Mirëqenie. Jeton në mirësi.
7. bised. Dolli, urimi që ngremë për dikë. Ngremë nga një mirësi për krushkun. Filluan shëndetet dhe mirësitë. Mirësi për të zotët e shtëpisë!
8. vet. nj., libr. Përdoret së bashku me foljen kam kur i drejtohemi dikujt me nderim të theksuar. Kini mirësinë të na urdhëroni (të na nderoni me ardhjen tuaj). Pati mirësinë të më shkruante menjëherë. Shpresoj se do të kini mirësinë ta lexoni me kujdes letrën time.
NDERSHMËRÍ,~A f. Cilësia e të qenët i ndershëm, të qenët i ndershëm, qëndrim moral i pastër; kund. pandershmëri, çndershmëri. Ndershmëria e trupit gjykues. Ndershmëria në punë. Punon me ndershmëri. Nuk dyshojmë në ndershmërinë e tij. Ndershmëria sjell sukses të vërtetë. Ndershmëria është virtyt.
✱Sin.: virtyt, nder, moral, pastërti, drejtësi, paanshmëri, paanësi, zemërbardhësi, besnikëri, shpirtdëlirësi, çiltërsi, çiltëri, fisnikëri.
SHPIRTBARDHËSÍ,~A f. Të qenët shpirtbardhë, vetia e njeriut shpirtbardhë, zemërbardhësi. Shembull shpirtbardhësie. Me dashamirësi dhe shpirtbardhësi. Duhet shpirtbardhësi e guxim.
ZEMËRBARDHËSÍ,~A f. Të qenët zemërbardhë, vetia e njeriut zemërbardhë; bujari, shpirtbardhësi. Zemërbardhësia e malësorëve. Tërë qenia e saj rrezatonte zemërbardhësi. Të pret me zemërbardhësi. Do t’i ketë pëlqyer zemërbardhësia që tregove. Duke ruajtur si trashëgim zemërbardhësinë e tyre. Unë e kam çmuar gjithnjë zemërbardhësinë tuaj.
✱Sin.: shpirtmadhësi, zemërmirësi, dorëdhënie, bujari, fisnikëri, oborrësi, mirësi, ndershmëri, gjerësi, çiltëri.
ZEMËRGJERËSÍ,~A f. Të qenët zemërgjerë, vetia e njeriut zemërgjerë; zemërmadhësi, shpirtgjerësi; kund. zemërngushtësi. Zemërgjerësi e madhe (madhështore). Zemërgjerësia e popullit. Me zemërgjerësi të pakursyer. Me mjaft zemërgjerësi. Shfaqje zemërgjerësie. Falë zemërgjerësisë suaj. Ia dha me zemërgjerësi. Tregoi një zemërgjerësi si askush tjetër. Buzëqeshi me një zemërgjerësi tepër të ndjeshme. U magjeps nga zemërgjerësia e tij. Aty sikur gatuhej zemërgjerësia e njeriut. Keqpërdor zemërgjerësinë e tyre.
✱Sin.: shpirtmadhësi, zemërbardhësi, gjerësi, oborrsi, bujari.
ZEMËRLIGËSÍ,~A f. Të qenët zemërlig, vetia e njeriut zemërlig; shpirtligësi; kund. zemërmirësi, zemërbardhësi. E bëri nga zemërligësia. E ka nga zemërligësia. Fërkonte duart me zemërligësi. - Ç’e keni gjithë atë zemërligësi ndaj meje!? - Zemërligësia jote s'ka të sosur, se ti vuan gjithnjë nga dyshimi. Prapa atyre fjalëve ai dalloi dhe një farë zemërligësie.
✱Sin.: shpirtligësi, shpirtngushtësi, zemërngushtësi, ladutëri.
ZEMËRMIRËSÍ,~A f. Të qenët zemërmirë, vetia e njeriut që është zemërmirë, shpirtmirësi; kund. zemërligësi, shpirtligësi. Shenjë zemërmirësie. Me shumë zemërmirësi. Ia shpërbleu zemërmirësinë. Folëm për zemërmirësitë e tij. Buzëqeshte me një zemërmirësi të këndshme. Thelbi i shqiptarëve është zemërmirësia dhe besa.
✱Sin.: shpirtmirësi, shpirtmadhësi, zemërbardhësi, zemërgjerësi, zemërmadhësi.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë