Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
BRÓÇKULL,~A f. kryes. sh. ~A, ~AT Fjalë e kotë, gjepur. Broçkull e madhe. Një broçkull kozmike. Flet (thotë, lëshon) broçkulla. Gjithfarë broçkullash. Broçkullat i merr era. Lëri broçkullat! - Kush e ha këtë broçkull?! Ra në kthetrat e broçkullave. Kush e di ç’të bluan koka, / Broçkulla që thotë bota. (folk.).
✱Sin.: gjepur, bende, dokrra, pallavra, profka, përrallë, përrallisje, dërdëllitje, shpifje, koçomila, dëngla, gorrica, bërdokull, adër, gëzhdalla, xexerica, pordhë.
PRÓFK/Ë,~A f. sh. ~A, ~AT 1. Pushkaliqe; stërlagës. Bëri një profkë.
2. kryes. sh. Fjalë të kota e të gënjeshtërta, dokrra, gjepura, pallavra. Fliste (thoshte, shiste) profka. Ishin vetëm profka.
✱Sin.: stërfytës, stërlagës, gjepur, dokrra, broçkull, mbroçkull, dëngla, xexerica, pallavra, përrallisje, makllada, adër, beshte, çakël, pushkaliqe, gënjeshtër.
PËRRÁLL/Ë,~A f. sh. ~A, ~AT 1. Një nga llojet më të njohura të krijimtarisë gojore popullore, që ka formën e një tregimi, zakonisht me përmbajtje fantastike e me personazhe të trilluara nga bota e njerëzve, e kafshëve dhe e forcave të mbinatyrshme, rrëfenjë popullore; tregim i shkurtër i shkruar në këtë frymë e me mjete të tilla. Përrallat popullore shqiptare. Përrallë e bukur (tërheqëse). Përralla me kafshë. Përrallat e gjyshit (e gjyshes). Në botën e përrallave. U tregonte përralla fëmijëve. Ka shkruar një libër me përralla. Duket (ndodhi) si në përrallë.
2. bised. Fjalë të kota e pa asgjë të vërtetë; diçka e trilluar, gënjeshtër, gjepur. Përralla me mbret gjepura, dokrra; premtime të kota. Përralla dushku gjepura. Na shet përralla. S’u besojmë atyre përrallave. Hodhën poshtë përrallën e pathyeshmërisë së armikut. S’tunden malet me përralla. (fj. u.).
✱Sin.: gjepur, rrëfenjë, përrallëz, gënjeshtër, trillim, xexerica, pallavër, dokërr, dëngël.
♦ U bë përrallë. 1. (diçka). Është përsëritur shumë herë, sa është tepruar; është folur shumë për diçka, por asgjë nuk është bërë. 2. (dikush). E përflasin të gjithë për ato që ka bërë, e marrin nëpër gojë; la nam; u bë përralla e botës. E bën përrallë (diçka) e përsërit diçka shumë herë, sa e tepron e të mërzit ose nuk e beson më njeri. U bë përralla e botës (dikush) i doli nami i keq për diçka, mbahet nëpër gojë nga të gjithë për një punë jo të mirë; u bë përrallë. Përralla me mbret iron. diçka e bukur, por e trilluar; gjepura, dokrra; premtime të kota; diçka e pabesueshme; përrallë mizash iron. Përrallë mizash iron. diçka krejt e pamundshme a e kotë, gjepur; fjalë të kota; përralla me mbret iron. Shet përralla në diell (dikush) iron. 1. Flet shumë e pa kuptim, grin kot; grin lakra. 2. Thotë gjëra të paqena a gënjeshtra, flet për gjëra që s’mund të ndodhin. 3. shih shet mend (dikush). Tregon përralla (dikush) shih shet përralla në diell (dikush) iron.
XEXERÍCA,~T f. vet. sh., bised. Gjepura, profka. Flet xexerica. Lëri xexericat! Sʼmbahet shtëpia me xexerica. (fj. u.). Sʼmbushet plevica me xexerica.
✱Sin.: gjepura, broçkulla, dokrra, pallavra, profka, përrallisje, përralla, mbroçkulla, cëqe, kaçkaritje, gërbula, gëzhdallë, makllada, bende, gorrica, dëngla, beshte, bërdokulla, adra.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë