Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
ANGLEZÍM,~I m. 1. Veprimi kur anglezoj ose kur anglezohem.
2. Rrjedhimi kur anglezoj ose kur anglezohem.
3. Pranim ose dhënie e elementeve ose e shënjuesve autentikë dhe tradicionalë anglezë; tjetërsim i vullnetshëm ose i detyruar i gjuhës dhe i kulturës angleze në një mjedis anglishtfolës; të anglezuar. Anglezimi i afroamerikanëve. Anglezim i jetesës (i të menduarit, i mendësisë, i punës etj.). Anglezimi i theksuar në media.
NGÚLMËT (i, e) mb. 1. Që ka zënë vend mirë e nuk largohet, i ngulitur. Mendim i ngulmët. Shpresa (bindje) të ngulmëta.
2. Që bëhet pa iu ndarë dhe me të gjitha fuqitë, që bëhet me këmbëngulje; këmbëngulës. Luftë e ngulmët. Përpjekje të ngulmëta. Njeri i ngulmët në punë.
✱Sin.: i ngulët, i ngulitur, këmbëngulës, i vullnetshëm, i zellshëm.
NGÚLËT (i, e) mb. 1. Që rri në një vend pa lëvizur; kund. i pangulët. Yll i ngulët. Bosht i ngulët.
2. Që është i përpjetë. Shpat i ngulët. Terren i ngulët.
3. fig. I përqendruar në një pikë a në një vend (për vështrimin). Shikim (vështrim) i ngulët.
4. fig. Që është i qëndrueshëm për një kohë të gjatë, që nuk ndryshon, i patundur. Besim (mendim) i ngulët. Dije të ngulëta. Rregulla të ngulëta.
5. Që bëhet duke u përqendruar për një kohë të gjatë në diçka; që është këmbëngulës në diçka. Me punë të ngulët. Studiues i ngulët.
✱Sin.: i ngulur, i palëvizshëm, i përqendruar, i qëndrueshëm, i pandryshueshëm, i patundshëm, i ngulshëm, ngulmues, i patundur, i ngulmët, i përhershëm, këmbëngulës, i vullnetshëm, i zellshëm.
PAVULLNÉTSH/ËM (i), ~ME (e) mb. 1. Që bëhet pa vullnetin e pa dashjen e dikujt; që bëhet pa vetëdije dhe pa ndonjë qëllim të caktuar, që kryhet vetvetiu; kund. i vullnetshëm. Lëvizje e pavullnetshme. Veprime të pavullnetshme. Dështim i pavullnetshëm (i një gruaje shtatzënë). Vëmendje e pavullnetshme (psikol.) vëmendje që lind pa një qëllim a pa një përpjekje të posaçme. Në mënyrë të pavullnetshme.
2. Që s’ka vullnet të fortë, që i mungon këmbëngulja e zelli në një punë; që është karakteristik për një njeri të tillë; kund. i vullnetshëm. Nxënës i pavullnetshëm. Është i zgjuar, por i pavullnetshëm.
✱Sin.: i pavullnet, i paqëllim, i pavetëdijshëm, i vetvetishëm, vullnetdobët, shpirtdobët, i pazellshëm, jokëmbëngulës.
SHKËMBÍM,~I m. sh. ~E, ~ET 1. Veprimi kur shkëmbej diçka ose kur shkëmbehem; këmbim, ndërrim. Shkëmbim i frytshëm. Shkëmbim miqësor. Shkëmbim të dhënash. Shkëmbim librash (vizitash, letrash). Shkëmbim zjarri. (usht.) Shkëmbim popullsish. (drejt.) Shkëmbimi i robërve të luftës. (drejt.) Me shkëmbim duke shkëmbyer një gjë me diçka tjetër. I dha para në shkëmbim të heshtjes. Shkëmbim topi (sport.) këmbimi i topit nga njëri lojtar tek tjetri. Shkëmbim termik (fiz.) procesi i dhënies dhe i marrjes së nxehtësisë ndërmjet trupave ose pjesëve të ndryshme të një trupi, që kanë temperatura të ndryshme.
2. fin. Këmbimi i një monedhë me një tjetër; vlera me të cilën një monedhë shkëmbehet me një tjetër. Kursi i shkëmbimit. Monedhë shkëmbimi. Shkëmbimi i monedhave.
3. vet. sh., dipl. Këmbimi mes dy shteteve i dokumenteve diplomatike, i delegacioneve, përfaqësuesve etj.; Shkëmbim notash. Shkëmbime ndërkombëtare. Shkëmbime tregtare. Shkëmbime diplomatike. Shkëmbime kulturore. Vëllimi i shkëmbimeve.
4. ek. Ndërveprim i vullnetshëm mes dy individëve apo dy enteve që shkëmbejnë diçka që e kanë në zotërim me një tjetër, duke pasur një përfitim të ndërsjellë. Shkëmbimi i aksioneve. Shkëmbimi i mallrave. Shkëmbim në natyrë. Format e shkëmbimit.
✱Sin.: këmbim, trambë, ndërrim, ndërkëmbim, këmbesë, shkëmbesë, zëvendësim.
♦ Monedhë shkëmbimi (tregu) libr.
VULLNETÁR,~E mb. 1. Që bëhet vullnetarisht. Punë vullnetare.
2. Që ndërmerr një punë, një detyrë etj. me dëshirën e vet, që bën diçka pa qenë i detyruar nga të tjerët; i përbërë nga vullnetarë. Të rinjtë vullnetarë. Të rejat vullnetare. Korrespondent vullnetar i gazetës.. Grupi i bashkëpunimit vullnetar. Të rejat vullnetare.
3. Që mbështetet në parimet e vullnetarizmit; që bëhet me vullnetin e secilit. Organizatë (shoqatë) vullnetare. Bashkim vullnetar.
✱Sin.: vetëdashës, i vullnetshëm.
VULLNETÁR,~I m. sh. ~Ë, ~ËT 1. Ai që ndërmerr dhe bën një punë, një detyrë etj. vullnetarisht, pa u detyruar nga dikush tjetër dhe pa shpërblim, ai që merr pjesë me dëshirën e vet në një punë a veprimtari. Puna e vullnetarëve. Dolën vullnetarë. Vullnetarët e kryqit të kuq.
2. Ai që hyn në ushtri ose shkon në luftë me dëshirën e vet, pa qenë i detyruar nga ligji a nga ndonjë vendim. Vullnetar popullor. Vullnetarët e lirisë. Komandanti përshëndeti vullnetarët.
✱Sin.: vetëdashës, i vullnetshëm.
VULLNETFÓRTË mb. Që ka vullnet të fortë; me vullnet; kund. vullnetdobët. Njeri vullnetfortë. Është vullnetfortë.
✱Sin.: i vullnetshëm, këmbëngulës.
VULLNETHÉKURT mb. [lexo: vullnet-hekurt] Që ka vullnet shumë fortë, vullnetçelik, vullnetçeliktë. Njeri vullnethekurt. Zemërçelik e vullnethekurt.
✱Sin.: vullnetçelik, i vullnetshëm.
VULLNÉTSH/ËM (i), ~ME (e) mb. 1. Që bëhet me vullnetin e dikujt; që bëhet me vetëdije dhe me një qëllim të caktuar; vullnetar. Lëvizje e vullnetshme. Veprime të vullnetshme. Punë e vullnetshme.
2. Që ka vullnet të fortë, që ka durim, që tregon këmbëngulje e zell në një punë; që është veti e një njeriu me vullnet; kund. i pavullnetshëm. Njeri i vullnetshëm. Punëtor i vullnetshëm. Përpjekje të vullnetshme.
✱Sin.: vullnetar, vullnetfortë, vullnethekurt, vullnetçelik, këmbëngulës, i zellshëm, zelltar.
ZÉLLSH/ËM (i), ~ME (e) mb. Që ka dëshirë, durim e këmbëngulje në punë, që punon me zell, që tregon zell në një punë a diku tjetër. Nxënës (student, lexues) i zellshëm. Përkthyes i zellshëm. Veprimtarë të zellshëm. Mbledhës (hulumtues, studiues) i zellshëm i folklorit. Përpjekje të zellshme. Është shumë e zellshme. U tregua mjaft i zellshëm. Përmes një pune të zellshme e kurajoze.
✱Sin.: zelltar, zellmadh, këmbëngulës, ngulmues, i ngulët, i vullnetshëm, punëtor.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë