Fjalori

Rezultate në përkufizime për “vrojtues”

Mëso si ta përdorësh
<<< Kthehu te kërkimi kryesor në fjalor

METEOROLOGJIK

METEOROLOGJÍK,~E mb. Që lidhet me meteorologjinë, që i përket meteorologjisë, i meteorologjisë; që merret me meteorologji ose jep të dhënat e saj. Stacion (vrojtues) meteorologjik. Shërbimi meteorologjik. Buletini meteorologjik. Hartë meteorologjike. Studime meteorologjike. Ndryshime meteorologjike. Të dhëna meteorologjike. Dukuri meteorologjike secili nga proceset fizike që ndodhin në atmosferë (p.sh., shiu, bora, breshëri, mjegulla, ngrica, vesa, bryma, rrufeja etj.). Elemente meteorologjike madhësi fizike që karakterizon nga ana sasiore gjendjen e atmosferës në një interval të caktuar kohe (p.sh., temperatura, lagështia dhe dendësia e ajrit, trysnia atmosferike, shpejtësia e erës, intensiteti i reshjeve dhe i rrezatimit të diellit, shtrirja horizontale dhe vertikale e reve etj.). Kushte meteorologjike vlerat e elementeve dhe të dukurive meteorologjike të vrojtuara në një zonë të caktuar në një interval kohe të caktuar. Aparat meteorologjik (tek.) secili nga aparatet që përdoren për matjen dhe regjistrimin e elementeve meteorologjike (p.sh., termometri, termografi, higrometri, higrografi, pluviometri, pluviografi etj.).

NJËSIT

NJËSÍT,~I m. sh. ~E, ~ET usht. 1. Formacion i vogël ushtarak. Njësit vrojtues. Njësitet e luftimit. Njësitet vullnetare. Njësiti i shërbimit.
2. hist. Grup i vogël partizanësh ose ilegalësh gjatë Luftës Nacionalçlirimtare, që kryente veprime të armatosura ose detyra të tjera. Njësit partizan. Njësitet guerile. Njësiti i fshatit. Komandanti i njësitit. Aksionet e njësitit.

SENDËZOHET

►SENDËZ/ÓHET jovep., ~ÚA (u), ~ÚAR vetv. Merr trajtën konkrete të një sendi, kthehet në diçka që kapet nga shqisat, shndërrohet nga diçka abstrakte në konkrete, fiton përmbajtje sendore. Sendëzohet një kuptim (gjuh.). Edhe sytë i ishin sendëzuar. Për disa vrojtues mbeti mister si sendëzoheshin disa ide.
✱Sin.: materializohet, lëndëzohet, trupëzohet.

VROJTAR

VROJTÁR,~I m. sh. ~Ë, ~ËT 1. Vrojtues, vëzhgues, shikues. Syrit të atij vrojtari nuk i shpëton asgjë.
2. Njeri i ngarkuar për të ruajtur dikë a diçka, rojë, rojtar, zakonisht i armatosur.

VROJTUES

VROJTÚES,~E mb. 1. Që është caktuar për të vrojtuar, që vrojton. Ushtari vrojtues.
2. Që shërben për të vrojtuar. Kullë (pikë) vrojtuese.
✱Sin.: vëzhguese, këqyrës, mbikëqyrës, përgjues.

VROJTUES

VROJTÚES,~I m. sh. ~, ~IT 1. Ai që është caktuar për të vrojtuar, ai që bën vrojtime; vëzhgues. Vrojtues kufitar. Vrojtues i stacionit meteorologjik. Caktuan një vrojtues.
2. spec. Aparat i posaçëm që ndjek e përcakton diçka.
✱Sin.: vëzhgues, këqyrës, mbikëqyrës, përgjues.

VËREJTËS

VËRÉJTËS,~E mb. Që vëren, që sheh me kujdes e me një qëllim a synim të caktuar dikë a diçka; që është i vëmendshëm, vëzhgues. Djalë vërejtës. Vajzë (grua) vërejtëse.
✱Sin.: vëzhgues, vrojtues, mbikëqyrës, këqyrës, përgjues, roje, rojtar.

VËREJTËS

VËRÉJTËS,~I m. sh. ~, ~IT Ai që vëren, që sheh me kujdes e me një qëllim a synim të caktuar dikë a diçka; që është i vëmendshëm; vëzhgues Ai vërejtësi është shumë i kujdesshëm.
✱Sin.: vëzhgues, vrojtues, mbikëqyrës, këqyrës, përgjues, roje, rojtar.

VËZHGUES

VËZHGÚES,~E mb. 1. Që ka aftësinë për të vëzhguar e për të vënë re hollësi të vogla të ngjarjeve, të dukurive etj.; që depërton në gjërat, depërtues, i mprehtë. Njeri vëzhgues. Shikim (vështrim) vëzhgues. Me sy vëzhgues.
2. usht. Që është i caktuar për të vëzhguar dikë a diçka, i ngarkuar të vëzhgojë. Pikë (kullë) vëzhguese. Aeroplan vëzhgues. Anije vëzhguese.
✱Sin.: vrojtues, mbikëqyrës. këqyrës, përgjues, depërtues.

VËZHGUES

VËZHGÚES,~I m. sh. ~, ~IT 1. Ai që vëzhgon dikë a diçka. Vëzhgues i vëmendshëm.
2. Ai që është ngarkuar me një detyrë të veçantë për të vëzhguar diçka, ai që bën vëzhgime në një fushë të caktuar të veprimtarisë a që ndjek çështje të caktuara. Vëzhgues politik (ekonomik, diplomatik, ushtarak, shkencor). Marr pjesë si vëzhgues. Vëzhguesit ndërkombëtarë. Vëzhguesit i zgjedhjeve.
3. Ai që është ngarkuar të bëjë komentet në media, në një gazetë a revistë për çështje të caktuara. Komenti i vëzhguesit. Siç vënë në dukje vëzhguesit e gazetave...
✱Sin.: vrojtues, mbikëqyrës. këqyrës, përgjues, depërtues.

Ky fjalor është domosdoshmëri për shkrimtarët e për publicistët, për shkollarët e për studentët, për mësuesit e për pedagogët, për studiuesit e për këdo që merret me përdorimin e kultivimin e gjuhës amtare.

Ai u vjen në ndihmë gjithë atyre që merren veçanërisht me gjuhën e shkruar, por edhe të folur, me krijime e me përkthime, me hartimin e fjalorëve të tipave të ndryshëm etj.

...lexo më tepër.


© Akademia e Shkencave e Shqipërisë, 2026 — Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.

www.akad.gov.al
Adresa: Sheshi "Fan Noli", Tiranë