Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
ATEST/ÓJ vep., ~ÓVA, ~ÚAR zyrt., kal. 1. Njoh zyrtarisht me anë të një dëshmie një gradë a një titull që i jepet dikujt pas mbarimit të një forme studimi a të një shkalle kualifikimi; vërtetoj, dëshmoj, lëshoj dëshmi; përcaktoj shkallën e aftësive profesionale dhe të përgatitjes arsimore e kulturore të një individi. Atestoj shkallën e aftësive profesionale. Atestoj diplomën universitare të arritur jashtë shtetit.
2. Njoh me shkrim zyrtarisht, si përfaqësues i një organi kompetent me autorizim të veçantë, një prodhim ose një patentë (zbulim) sipas verifikimit të cilësive përkatëse standarde të përcaktuara me ligj.
✱Sin.: certifikoj, njoh, pranoj, dëshmoj, vërtetoj, konfirmoj, verifikoj, dokumentoj.
HAKËL/ÓJ vep., ~ÓVA, ~ÚAR kal. 1. Shqyrtoj a ushtroj kontroll mbi dikë a mbi diçka, mbikëqyr, vërtetësoj, verifikoj. Hakloj shtëpinë. Hakloj shpenzimet financiare.
2. Kërkoj të gjej a të zbuloj diçka sipas disa të dhënave paraprake, e gjurmoj; e shqyrtoj sipas të dhënave që njoh dhe mbledh, hetoj, hulumtoj. Hakloj rrethanat e ngjarjes.
✱Sin.: shqyrtoj, kontrolloj, vërtetoj, vërtetësoj, verifikoj, gjurmoj, hulumtoj, hetoj.
HOMOLOG/ÓJ vep., ~ÓVA, ~ÚAR kal. 1. drejt. Sanksionoj me vendim gjyqi.
2. tek. Provoj a verifikoj përputhshmërinë a përshtatshmërinë e pjesëve të veçanta të automjetit në tërësinë e tij, bazuar në kriteret, që parashtrohen nga organet e ndryshme rregullatore të një vendi; e certifikoj.
✱Sin.: sanksionoj, certifikoj, standardizoj, ligjëroj, miratoj, vendos, provoj, verifikoj.
KALIBR/ÓJ vep., ~ÓVA, ~ÚAR kal., kryes. spec. 1. Kontrolloj a verifikoj kalibrin e diçkaje sipas kërkesave të duhura, zakonisht para përdorimit a funksionimit etj. Kalibroj farërat.
2. I jap formën a cilësinë e duhur një vegle, një detali etj.; e bëj në kalibrin e duhur. Kalibroj predhën. Kalibroj një vegël.
KALÍB/ËR,~RI m. sh. ~RA, ~RAT spec. 1. usht. Diametri i brendshëm me përmasa të caktuara i një tubi, i tytës së një arme etj. Pushkë me kalibër 0. 72 mm. Kalibri i pushkës. Mat (verifikoj) kalibrin.
2. tek. Përdorëse a vegël e posaçme për të matur ose për të verifikuar cilësitë e duhura të një detali, të një malli etj. Kontrolloj (verifikoj) përmasat e instrumentit me kalibër.
3. edhe fig. Cilësi pozitive e dikujt; nivel i lartë i dikujt a i diçkaje; shkallë. Lojtar (sportist) i kalibrit ndërkombëtar. Arritje të kalibrit të lartë.
✱Sin.: përmasë, shkallë, nivel.
KONTROLL/ÓJ vep., ~ÓVA, ~ÚAR kal. Bëj a ushtroj kontroll, shqyrtoj gjendjen e vërtetë për diçka, me qëllim për të zbuluar realitetin; mbikëqyr. Kontrolloj shpenzimet (llogarinë, biletat). Kontrolloj dijet e nxënësve i bëj nxënësit provim për të vërtetuar të nxënët. Kontrolloj cilësinë e mallit. S’lanë gjë pa kontrolluar. Kontrolloj veten zotëroj veten.
✱Sin.: mbikëqyr, shqyrtoj, verifikoj.
KRÉH vep., ~A, ~UR 1. Drejtoj, rregulloj, shpleks a shkrif flokët me krehër. Kreh flokët (kaçurrelat).
2. Kashais një kafshë, pastroj lëkurën dhe rregulloj qimet e një kafshe me kashai. Kreh kalin.
3. Shkoj leshin a pambukun në krehër ose në një makinë për ta shprishur, gërhanoj. Kreh leshin.
4. edhe fig. Verifikoj dhe pastroj udhën e dikujt ose mjedisin ku ai duhet të kalojë, duke bërë të gjitha shërbimet e duhura. Krehu rrugën ku do të kalojë pararoja.
5. fig. Rishikoj, korrigjoj edhe një herë tjetër një tekst a shkrim se mos ka shpëtuar ndonjë gabim gjuhësor a shkencor; rikorrigjoj, lëmoj. Kreh artikullin para botimit.
✱Sin.: gërhanoj, lënur, shkriftoj, shpleks, kashais, rikorrigjoj, lëmoj.
♦ I kreh *bishtin (dikujt) keq. Nuk ka *krehër që e kreh (dikë).
TEST/ÓJ vep., ~ÓVA, ~ÚAR kal. 1. Provoj, kontrolloj diçka për të parë nëse funksionon, nëse është e vërtetë ose sa cilësore është. Testoj një pajisje elektronike para se ta blej.
2. Verifikoj aftësitë, dijet ose qëndrueshmërinë e tyre te dikush. Testoi nxënësit (studentët).
3. mjek., edhe jokal. Bëj testin e një vaksine etj., bëj analizë a kontroll mjekësor. Testoi vaksinën. U testua për një sëmundje.
✱Sin.: provoj, kontrolloj, verifikoj, mat, vlerësoj, ekzaminoj.
VERIFIKÍM,~I m. sh. ~E, ~ET 1. Veprimi kur verifikoj a verifikohet diçka, provim. Verifikimi i një çështjeje. Verifikimi i dokumenteve.
2. Prova e kontrollit që bëhet për të vërtetuar saktësinë e diçkaje. Verifikime të kohëpaskohshme. Doli nga verifikimet që u bënë.
✱Sin.: vërtetim, vërtetësim, kontroll, kontrollim.
VERIFIK/ÓJ vep., ~ÓVA, ~ÚAR kal. Provoj vërtetësinë a saktësinë e diçkaje duke e kontrolluar, duke e parë a duke e studiuar edhe një herë ose duke e ballafaquar me një tjetër; vërtetoj diçka. Verifikoj një çështje (një dokument). Verifikoj shifrat (llogarinë). Verifikoj në praktikë.
✱Sin.: kontrolloj, studioj.
►VËRTETËS/ÓHET jovep., ~ÚA (u), ~ÚAR 1. vetv., vet. v. III Provohet vërtetësia e diçkaje; verifikohet. U vërtetësuan dokumentet. U vërtetësuan faturat.
2. pës. e VËRTETËSÓJ.
✱Sin.: vërtetoj, verifikoj.
VËRTETËS/ÓJ vep., ~ÓVA, ~ÚAR kal. Provoj vërtetësinë e diçkaje; verifikoj. Vërtetësoj dokumentet. Vërtetësoj me origjinalin. Vërtetësoj dëftesën. Vërtetësoi faturat.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë