Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
BAKSHÍSH,~I m. sh. ~E, ~ET Të holla a send tjetër me vlerë që i jepen dikujt për shërbime të vogla mbi vlerën e punës që bën. I jap bakshish. Një bakshish i vogël. Nuk kërkon (nuk merr, nuk pranon) bakshish. Më humbi unaza me gur xhevahire, / Vashë kush ma gjeti bakshish ka një lirë. (folk.). Njëqind para bëri gjeli, tre grosharë bëri bakshishi. (fj. u.).
BARDHËLLÓSH,~E mb., poet. 1. Bardhosh. Vashë bardhëlloshe.
2. si em. m. e f. Sipas kuptimit të mbiemrit.
BUZËSHEQÉR,~E mb. Gojëmbël, gojëmjaltë, që flet butë e shtruar. Moj vashë gojëmjaltë e buzësheqer, / Dhëmbë e dhëmballë gjithë me qemer. (folk.).
✱Sin.: gojësheqer, gojëmirë, fjalëmbël.
NAZEQÁR,~E mb. Që ha me naze, që u bën naze gjërave; që sillet me naze, që e ka zakon të bëjë naze. Vashë nazeqare. Shikime nazeqare. Edhe lëvizjet i kishte nazeqare.
✱Sin.: nazetar, nazeli, nazar, ojnatar, ojnak, shtinjak, buzëpërdredhur, ngrënëkeq, cenak, hajekeq, i paoreks, buzëdredhur, piliherdhe, buzëhollë.
NÚS/E,~JAI f. sh. ~E, ~ET 1. Vajza që po martohet, vajza në ditët e dasmës; grua e re e sapomartuar. Nuse e bukur (e re). Dita e nuses. Dhëndri e nusja. Rrobat e nuses. Vajzat e nuset e fshatit. U bë (u nis) nuse u vesh e u stolis në ditën e martesës (për vajzat). Vesh (nis, stolis) nusen. Marrin nusen krushqit. Shkoi (doli) nuse u martua (për vajzën). Mori nuse u martua (për djalin). I zuri nuse djalit. vjet. e fejoi. Doli nuse nga shtëpia. Nuse me tela a) vajzë e zbukuruar për t’u martuar; b) vajzë shumë e bukur e shumë e mirë. Nusja e telit nusja e cila ende i ka zbukurimet si nuse. Nuk ishte më nusja e telit.
2. Gruaja e djalit (në marrëdhënie me prindërit dhe njerëzit e tjerë të dhëndrit), e reja. Nusja e djalit. Vjehrra dhe nusja. Nuset e shtëpisë.
3. Figurë e mitologjisë popullore, që përfytyrohej si një vashë e bukur me flokë të gjatë, e cila ruante ujërat, burimet, pyjet etj. Nusja e ujërave floçka. Nuset e malit të jashtësmet. Nuse deti sirenë.
4. Dordolec. Nuse misri. Nuse kopshti. Vuri një nuse në mes të arës me grurë.
5. Kukull lecke që bëjnë fëmijët; nuskë.
6. zool. Nuselalë, bukël, nusël, nusëz, nusebukur, nusemirë.
✱Sin.: e re, gjelinë, vashë, fisnike, floçkë, gërshetëz, dordolec, nuskë, kukull, nuselalë, bukël, nusël, nusëz, nusebukur, nusemirë.
♦ U bë nuse (dikush) shih u bë lule (dikush). Të bëhem edhe një herë nuse di vetë si të nusëroj kam fituar përvojë nga një punë e vështirë, jam tashmë në gjendje ta bëj ndryshe e më mirë diçka, po të më krijohen të njëjtat kushte. Bëhet nuse të mërkurën (dikush) ndrit nga bukuria, shkëlqen; ka marrë një pamje të këndshme e të veçantë; t’i maresh kokën e të ikësh (dikujt); i kishte rënë një nur (dikujt); shtie hënën përdhe; të rrëzon nga kali. E bëri nuse (dikë) shih e bëri lule (dikë). E bën plakën nuse (dikush) e zbukuron shumë diçka, e paraqet një gjë në të kundërtën e saj; e bën të zezën të bardhë; e kthen me kokë poshtë (diçka); kund. e bën të bardhën të zezë (dikush). Ia hoqi *vellon nuses (dikush). Është *bajrak ndër nuse (dikush). Kjo është nusja e ky është dhëndri! kjo është gjendja e një pune; këto janë rrethanat ose mundësitë për të bërë diçka, s’ka tjetër, të bëjmë si të bëjmë me këto. Nusja e djemve euf. shih nusja e lalës zool. Nusja e lalës zool. nuselalë; Nusja e minjve. Nuse pashke zool. mollëkuqe. I rri nuse (dikujt). 1. I rri gati për çdo kërkesë e dëshirë; i shërben mirë e menjëherë për çdo gjë; i rri qiri. 2. I nënshtrohet, i bindet për çdo gjë. Rri (si) nuse (dikush). 1. Nuk flet; rri si me turp; nuk e hap gojën. 2. Nuk bën gjë; rri duarkryq.
PAKURÓRË (i, e) mb. 1. Që jeton si bashkëshort me një tjetër pa qenë martuar zyrtarisht, i pacelebruar. Grua e pakurorë. Burrë i pakurorë.
2. I pamartuar; kund. i martuar. Vashë e pakurorë.
3. Që ka lindur nga një martesë, e cila nuk është lidhur zyrtarisht, që ka lindur jashtë martese. Fëmijë i pakurorë.
✱Sin.: i pamartuar, i pacelebruar, jashtëmartesor.
PILIVÉS/Ë,~A f. sh. ~A, ~AT 1. zool. (lat. Libellula vulgata) Kandërr me trup të hollë, me krahë të gjatë, të tejdukshëm e me deje, që i lëshon larvat në vende me lagështirë, bishtagan.
2. zool. Pjesë e parë e emërtimeve të pathjeshta për disa lloje pilivesash: Pilivesa barkkuqe (lat. Sympetrum sanguineum) kumiharku i kuq. Pilivesa perandore (lat. Anax imperator). Pilivesa trupmadhe (lat. Ubellula depressa). Pilivesa vashë (lat. Agrion vargo).
3. fig. Vajzë e hajthme e lozonjare. Ia mori mendtë ajo pilivesa.
✱Sin.: bishtagan, kumihark, lozonjare, e hajthme.
SHTATBILÓNJË mb. 1. Që e ka trupin të gjatë, të drejtë e të hajthëm si bilonjë (për vajzat). Vashë shtatbilonjë.
2. si em. f. Ajo që e ka trupin të gjatë, të drejtë e të hajthëm si bilonjë. Shtatbilonja u bënte hije gjithë vajzave të tjera.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë