Fjalori

Rezultate në përkufizime për “udhëzoj”

Mëso si ta përdorësh
<<< Kthehu te kërkimi kryesor në fjalor

ADRESOJ

ADRES/ÓJ vep., ~ÓVA, ~ÚAR kal. edhe fig., libr. 1. E drejtoj dikë, e orientoj për të gjetur një adresë. Adresoj turistët.
2. Vendos adresën, shënoj a shkruaj adresën. Adresoj zarfin. Adresoj pakon. Adresoj buqetën e luleve.
✱Sin.: dërgoj, drejtoj, orientoj, udhëzoj.

INSTRUKTOJ

INSTRUKT/ÓJ vep., ~ÓVA, ~ÚAR libr., kal. Udhëzoj dikë për të kryer një punë, i shpjegoj si duhet bërë diçka, e mësoj si të veprojë, si të plotësojë një detyrë etj. Instruktoj punëtorët e rinj. Instruktoi zbuluesit (pilotët).
✱Sin.: udhëzoj, përgatis.

MËSOJ

MËS/ÓJ vep., ~ÓVA, ~ÚAR 1. kal. I jap dikujt arsim e edukatë ose njohuri nga një fushë e dijes nëpërmjet mësimit sipas një programi të caktuar; i jap mësim dikujt, jam mësuesi i dikujt. U mësoi nxënësve si të përdornin kompjuterin.
2. kal. dhe jokal. Marr njohuri, përvetësoj dije nga një fushë e caktuar, studioj një lëndë mësimore etj.; nxë. Mësoj mësimet. Mësoj programim. Mësoj një vjershë përmendsh. Shkojnë në shkollë për të mësuar. Sa të rrosh, do të mësosh. (fj. u.).
3. jokal. Ndjek mësimet, jam nxënës në një shkollë a në një kurs; synoj të pajisem me njohuri për diçka. Mëson në shkollë (në kurs, në universitet). Mëson për elektricist (për programues).
4. kal. Ndihmoj dikë nëpërmjet ushtrimeve e mësimeve që të fitojë shprehi për të bërë një punë të caktuar. E ka mësuar djalin të ngasë makinën. I mësoi biçikletën (notin) të birit.
5. kal. Ushtroj dorën, gishtat etj. për të bërë veprime të caktuara, stërvit. Mëson dorën për vizatim. Mësoj veshin për të dalluar tingujt.
6. kal. Stërvit një kafshë për ta bërë të aftë të kryejë veprime sipas dëshirës së njeriut. Babai i saj mëson kafshët në një cirk. Mëson qenin për gjah.
7. kal. Bëj përpjekje për të fituar shprehi për punë a për të bërë veprime të caktuara, përpiqem të përvetësoj a të zotëroj një mjeshtëri, një detyrë etj.; stërvitem në diçka, ushtrohem me diçka, nxë mënyrën se si të përdor diçka a të bëj një punë. Mësoj një zanat. Mësoj të përdor një aparat. Mësoj përdorimin e armëve. Mësoj biçikletën (notin). S’mëson kali revan në pleqëri. (fj. u.).
8. kal. E këshilloj dikë se si duhet të sillet e të veprojë, i tregoj rrugën që duhet të ndjekë, e udhëzoj; e edukoj. Si më mëson të bëj? E mëson mirë fëmijën. E ke mësuar keq nipin. U bë veza të mësojë pulën! (iron.).
9. jokal. Vë mend, fitoj përvojë nga një pësim; përfitoj nga përvoja e dikujt a nga diçka, marr mësim. Mësoi nga pësimi (nga gabimet). Mësova shumë prej tij.
10. kal. I tregoj dikujt se ku ndodhet diçka a se ç’ka ndodhur. I mësoi të rejat e ditës. Hajde, baba, të të mësoj arat! (fj. u., iron.)
11. kal. Marr njoftim për diçka, marr vesh; dëgjoj. Mësova një lajm (diçka të re). Mësova se do të vijë nesër. I mësuam të gjitha sa na shkruanit.
12. kal. Zbuloj, gjej. Mësuan një të fshehtë. Ia mësoi hilenë (marifetin) kësaj pune.
✱Sin.: nxë, stërvit, shkolloj, arsimoj, studioj, stërvitem, shkollohem, arsimohem, ushtroj, ushtrohem, përgatitem, këshilloj, dëgjoj, nxjerr, zbuloj, përshtat, familjarizoj, ambientoj.

POROSIT

POROSÍT (POROSÍS) vep., ~A, ~UR kal. 1. I bëj një kërkesë dikujt për të blerë a për të më dërguar diçka, për të më bërë një punë etj., bëj një porosi. Porositi një libër (një manual arkitekti). Porositi një kafe. Porositi një palë këpucë.
2. I ngarkoj ose i besoj dikujt një detyrë a një punë të veçantë. E porositi vëllain që...
3. I jap dikujt një këshillë për diçka, e këshilloj; i jap dikujt udhëzime të vlefshme, e mësoj dikë si të veprojë. E porositi të ketë kujdes rrugës. Ashtu e porositi babai.
4. I besoj dikujt një dëshirë.
5. Shpreh fjalët, dëshirat a këshillat e fundit para vdekjes. E porositi para se të vdiste...
✱Sin.: këshilloj, mësoj, kërkoj, them, zë, zgjedh, ngarkoj, besoj, udhëzoj.

PËRUDH

PËRÚDH vep., ~A, ~UR kal. 1. I tregoj dikujt rrugën që duhet të ndjekë, e vë për udhë.
2. I jap këshilla dhe udhëzime të mira, e vë në udhë të mbarë. I përudhi fëmijët që në vogëli.
✱Sin.: udhoj, mbudh, sëmbar, tumbar, zgjidh, rregulloj, udhëzoj, këshilloj, mësoj.

Ky fjalor është domosdoshmëri për shkrimtarët e për publicistët, për shkollarët e për studentët, për mësuesit e për pedagogët, për studiuesit e për këdo që merret me përdorimin e kultivimin e gjuhës amtare.

Ai u vjen në ndihmë gjithë atyre që merren veçanërisht me gjuhën e shkruar, por edhe të folur, me krijime e me përkthime, me hartimin e fjalorëve të tipave të ndryshëm etj.

...lexo më tepër.


© Akademia e Shkencave e Shqipërisë, 2026 — Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.

www.akad.gov.al
Adresa: Sheshi "Fan Noli", Tiranë