Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
EKSPORTÚAR (i, e) mb. Që është shitur jashtë vendit, që është eksportuar; kund. i importuar. Mashtrimi nacionalist i eksportuar nga fqinjët. Tarifë doganore për lëndën drusore të eksportuar. Ulja e taksave për shërbimet e eksportuara. Mjekët e eksportuar. Një pjesë e mallrave të eksportuara nga Republika e Shqipërisë.
MBITARÍF/Ë,~A f. sh. ~A, ~AT Tarifë mbi shumën e parave ose koston e zakonshme që paguhet. Mbitarifat e prapambetura. Informacion për mbitarifat.
NDËRMJÉT/ËM (i), ~ME (e) mb. 1. Që ndodhet në mes të dy gjërave a të dy njerëzve, midisës, i midistë. Dhoma e ndërmjetme. Kat i ndërmjetëm. Çmim i ndërmjetëm. Rol i ndërmjetëm.
2. Që zë një vend kalimtar midis dy gjërave a midis dy dukurive, që shërben si pikë lidhjeje në mes të dy gjërave a dy dukurive; që është në mes të dy anëve të kundërta. Hallkë e ndërmjetme. Qëndrim i ndërmjetëm. Elemente të ndërmjetme. Zë një vend të ndërmjetëm. Shtet i ndërmjetëm. Prodhim i ndërmjetëm lëndë druri, e hequr nga pylli nëpërmjet prerjeve të kujdesimit, nga momenti i krijimit të gjendjes së masivit e deri në shfrytëzueshmëri.
3. gjuh. Që futet ndërmjet gjymtyrëve të fjalisë ose brenda një fjalie tjetër e veçohet nëpërmjet intonacionit, pa u lidhur formalisht nga ana gramatikore me asnjërën nga gjymtyrët dhe që shpreh qëndrimin e folësit ndaj asaj që thotë. Fjalë e ndërmjetme. Fjali e ndërmjetme.
4. Që nuk është as i mirë, as i keq; mesatar. Raport i ndërmjetëm. Opinion i ndërmjetëm. Propozim i ndërmjetëm. Produkt i ndërmjetëm. Projektvendimi i ndërmjetëm për marrje provash në seancë dëgjimore.
5. dogan. Mallra me regjim të ndërmjetëm quhen ato mallra që kalojnë tranzit nëpër një vend dhe si të tilla nuk paguajnë në këtë vend tarifë doganore.
✱Sin.: ndërmjetës, i ndërmjetshëm, i ndërmjemë, kalimtar, i mesëm, midisës, i midistë, i ndërkallur, i ndërfutur, mesatar.
PRIM,~I m. sh. ~E, ~ET 1. fin. Shumë që duhet paguar menjëherë kur lidh një kontratë, kur bën një sigurim jete etj. Prim i dyfishtë. Prim i sigurimit të jetës. Prim për sigurimin e banesës nga zjarri (nga tërmeti, nga përmbytja). Prim rreziku. Prim për shtyrje afati. Prim për titujt financiarë.
2. fin. Shumë e shtuar në një çmim ose në një tarifë.
SHTATËFISHÚAR (i, e) mb. Që është zmadhuar, rritur shtatë fish (herë). Numër i shtatëfishuar. Aplikime të shtatëfishuara. Tarifë e shtatëfishuar.
TARÍF/Ë,~A f. sh. ~A, ~AT fin. 1. Çmim i caktuar nga shteti për sende të konsumit, për shërbimet e ndryshme publike etj.; pagesë që i bëhet shtetit për përdorimin ose për shfrytëzimin e diçkaje; tabelë për çmimet dhe për prodhimet. Tarifat postare. Tarifa e energjisë elektrike (e ujit, e transportit). Vendosi tarifa të reja. U ngritën (u ulën) tarifat.
2. Taksë për mallrat e importit që paguhet nga pala importuese; tagër doganor. Tarifë doganore taksë e caktuar nga shteti për mallrat që sillen nga jashtë ose që nxirren jashtë vendit. Tarifë për mallrat e importit. Tarifë për mallrat e eksportit.
3. Pagë që i jepet një punonjësi në përputhje me kategorinë, me kualifikimin, me vështirësitë në punë etj.; tabelë që përmban këto paga. Sistemi i tarifave. Rrjet tarifash. Paguhet (shpërblehet) me tarifën më të lartë.
4. Çmim i blerjes së një shërbimi. Tarifa transporti. Tarifë për shërbim riparimi. Ligj për tarifat ligj themelor që përcakton kriteret dhe procedurat për vendosjen e tarifave në një vend. Fabrikë tarifë Fabrikë e hapur në një vend të huaj për të shmangur pengesat tarifore në kushtet e eksportimit të mallrave në vendin në fjalë.
✱Sin.: pagesë, taksë, tagër, pagë, tarifë.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë