Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
APENDEKTOMÍ,~A f., mjek. Ndërhyrje kirurgjike për të hequr apendiksin. Apendektomi kirurgjikale (me sondë).
BLLOKÚAR (i, e) mb. 1. usht. Që është rrethuar plotësisht dhe është veçuar për të mos marrë ndihma e ushqime, me qëllim që të mos jetë në gjendje të veprojë dhe të detyrohet të dorëzohet. Qytet (vend) i bllokuar. Kishte mbetur i bllokuar.
2. Që është ndaluar a është penguar të qarkullojë; që i nënshtrohet një vendimi për t'i pezulluar veprimet me të, i pezulluar, që s’mund të përdoret nga zotëruesi. Mallra të bllokuara. Fondet e bllokuara. Sistem i bllokuar. Celular i bllokuar.
3. Që është mbyllur për kalim; që është zënë; që ka mbetur i veçuar për shkak të mbylljes së rrugëve të kalimit. Rrugë e bllokuar nga dëbora.
4. Që ka pushuar së lëvizuri ose së punuari, që ka ngecur (mjet, organ i trupit etj.). Krahu i bllokuar. Sondë e bllokuar. Motor i bllokuar. Tru i bllokuar. I bllokuar në mes të dëborës.
✱Sin.: i mbyllur, i mbushur, i plotësuar, i shtupuar, i kyçur, i vulosur.
CISTOSKÓP,~I m. sh. ~Ë, ~ËT mjek. Sondë për kontrollin e ureterit.
CISTOSKOPÍ,~A f. sh. ~, ~TË mjek. Skopi me sondë në brendësi të ureterit.
GJASHTËRRÓTËSH,~E mb. Që ka gjashtë rrota. Mjet (kamion, automjet) gjashtërrotësh. Sondë gjashtërrotëshe. Qerre e gjatë gjashtërrotëshe.
SHP/ÓJ vep., ~ÓVA, ~ÚAR kal. 1. Hap një vrimë në një send me diçka që ka majë të mprehtë ose me një mjet të posaçëm. Shpoj llamarinën. Shpoj murin. Shpoj akullin. Shpuan malm. Shpoi veshët për vathë. E shpuan plumbat (shigjetat, heshtat). Shpoj puse për naftë. Shpoj një vrimë. Uji shpon gurin. (fj. u.). Shpoj tejpërtej. Shpoj me gozhdë (me turjelë, me thikë, me fëndyell, me sondë). Të shpon me brirë.
2. Kaloj me forcë përmes diçkaje, shkoj tejpërtej, çaj (edhe fig.). E shpuan frontin në dy vende. Oxhakët shpojnë qiellin. Britma (kuja, ulërima) shpoi hapësirën. Aeroplanët shpojnë retë. Projektorët shpojnë errësirën.
3. I ngul dikujt në lëkurë diçka të mprehtë e me majë; takoj në diçka me majë të mprehtë a më ngulet diçka e tillë në lëkurë; vet. v. III të shkakton në lëkurë një ndijim të ngjashëm me atë kur të prek një send i mprehtë a me majë. Shpoj qetë me hosten. Shpoj kalin me mamuze. Këto çorape të shpojnë. Leshi i dhive të shpon. Shpova dorën (këmbën, gishtin) me gjilpërë (me gjemb).
4. Hap një vrimë në një plage që të rrjedhë qelbi. Shpoj plagën (lungën, të thatin). Çibani u bë për të shpuar.
5. jokal., vet. v. III Ka majë të mprehtë dhe mund të hapë një vrimë në një send ose të të ngulet në lëkurë. Kjo gjilpërë nuk shpon. Kishte një turjelë që nuk shponte fare.
6. fig. Vështroj dikë ngultas duke depërtuar në tërë qenien e tij, duke ia hetuar mendimet, ndjenjat, qëllimet. Sytë e tij të shponin tejpërtej. Kishte një vështrim që të shponte.
7. vet. v. III (me një trajtë të shkurtër të përemrit vetor në r. dhanore). Ndiej një dhembje të vazhdueshme sikur më ngul dikush diçka të mprehtë, më ther, më sëmbon; më ngacmon e më shqetëson fort, më godet një organ të trupit aq sa edhe ky mund të më dhembë a të më djegë. Më shpon në shpatull (në brinjë, në ijë). Më shpon gjuri. Më shpon plaga. Më shpoi hundën (era e rëndë, e keqe a e fortë e diçkaje). Më shpoi veshët (një zhurmë e fortë, e mprehtë).
8. fig. Nxit dikë, e shtyj të veprojë, e ngacmoj; e kujtoj që të bëjë diçka, ia përmend diçka që të mos e lërë në harresë. Duhet shpuar herë pas here. Po ta shposh, të tregon shumë histori. E kanë shpuar të tjerët, ai s'ka faj.
9. fig. Thumboj, ngacmoj, gërgas. Shponin njëri-tjetrin. Shpoje sa të duash, nuk të kthen përgjigje ai. Po të shposh, do të dëgjosh. (fj. u.).
10. fig. bised., edhe jokal. Spiunoj; shpif. Shpon kundër shokëve. E dërguan për të shpuar të tjerët.
11. fig., bised. Hetoj me imtësi. Zuri të shpojë e të rrëmojë.
♦E shpoj me *bodec (dikë). T’i shposh *buzën (buzët) (dikujt). S’e ka shpuar *gjembi (dikë). E shpoj (e shtyj) me *hosten (dikë). Shpon në *ujë (dikush). Më shpoi *veshët (dikush). Më shpon (më vret) *veshin (veshët) (diçka). Më shpon *zemrën (dikush a diçka).
SHTÁNG/Ë,~AI f. sh. ~A, ~AT 1. tek. Gyp prej metali që përdoret në shpimet me sondë. Nxjerr shtangat nga pusi. Ngeci (u bllokua) shtanga.
2. sport. Vegël që përdoret në garën e ngritjes së peshave dhe që përbëhet nga një bosht prej metali, në dy skajet e të cilit vendosen disqe me peshë të caktuar. Ngre shtangën. Ushtrohem në shtangë.
SÓND/Ë,~A f. sh. ~A, ~AT 1. Pajisje për të bërë shpime të thella në tokë, që ka si pjesë kryesore një shtagë metalike me një kokë të posaçme dhe që zakonisht rrotullohet nga një motor. Sondë shpimi (kërkimi). Kullat e sondave. Ngritën sondën.
2. mjek. Vegël mjekësore në trajtën e një gypi të hollë, që futet brenda një organi të trupit për të hetuar një sëmundje ose për qëllime mjekimi. Larja e stomakut me sondë. I vuri (i futi) sondën. E ushqejnë me sondë.
3. spec. Pajisje e posaçme, që lëshohet në ujë ose që ngrihet në ajër me balonë për qëllime studimi. Lëshuan një sondë.
4. astr. Pjesë e parë e emërtimeve të pathjeshta për lloje të ndryshme sondash. Sondë kozmike anije kozmike pa pilot që lëshohet për të marrë dhe transmetuar të dhëna sipas qëllimit të misionit ose për t'u lidhur me një stacion ndërplanetar.
TERMOMETRÍK,~E mb., fiz., mjek. Që ka të bëjë me termometrin, me temperaturën, me matjen e nxehtësisë. Shkallë termometrike. Sondë termometrike.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë