Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
DHISK,~U m. sh. DHÍSQE, DHÍSQET 1. Tabaka për të qerasur miqtë ose për të shërbyer kafe, pije, ëmbëlsira etj. Nusja doli me dhisk në dorë. Vë në dhisk. Dhisku i aluminit. Lashë dhiskun te vendi.
2. Tabaka e rrumbullakët ku mbahet buka e shenjtë e kungimit në kishën ortodokse. Dhisku i shenjtë. Buka e meshës mbi dhisk. Prifti mbart dhiskun dhe kupën e shenjtë.
3. fig., vjet. Ndihmë që mblidhej për dikë që mbetej keq.
4. Disk.
✱Sin.: tabaka, disk, sini.
SINÍ,~AI f. sh. ~, ~TË 1. Enë e nderë prej bakri si tepsi e cekët me anë pak të ngritura, që përdoret për të pjekur lakrorë, byrekë etj.; enë e tillë që përdorej për të shtruar bukën e gjellën, si sofër. Mish i pjekur në sini. E shtroi byrekun në sini. Uleshin rreth e qark sinisë.
2. Tabaka, zakonisht prej bakri. Solli filxhanët në sini.
TABAKÁ,~JAI f. sh. ~, ~TË 1. Enë e sheshtë si sini, në trajtë rrethore, vezake ose drejtkëndore, që përdoret për t’u nxjerrë miqve kafe, gliko, pije etj.; dhisk. Tabakaja e kamerierit. Iu derdh kafeja në tabaka.
2. Kuti duhani. Dridhe këtu një duhan nga tabakaja e mikut.
✱Sin.: dhisk, sini, tabak.
♦ Ia dha në tabaka (në *tepsi, në pjatë) (dikujt).
TEPSÍ,~A f. sh. ~, ~TË 1. Enë e madhe dhe e sheshtë prej bakri ose prej alumini, në trajta të ndryshme (të rrumbullakët, katrore, drejtkëndëshe), me buzë të ngritura rreth katër-pesë gisht, që shërben për të pjekur në furrë a në saç bukë, mish, lakrorë, byrekë, bakllava e gatesa të tjera; sini, tabaka, tavë. Tepsi e madhe (e vogël, e thellë). Tepsi bakri (alumini). Tepsia e bukës tepsi që vihet mbi një fron dhe që shërben si tryezë buke. Një tepsi me mish (me petulla). Një tepsi me grurë. Vuri bukën dhe pjatën në tepsi. Vallja e tepsisë (etnogr.) valle që luhet duke i rënë tepsisë si daulle.
2. Gatesë e pjekur në këtë enë; gatesë a diçka tjetër sa nxë kjo enë. U vuri para një tepsi bakllava (mish). Sonte kemi tepsi kemi gatesa në tepsi (pite, fli, kryelanë). Hëngrën një tepsi të tërë hëngrën shumë. Një plakë me një tepsi në krye (gjëzë: gozhda). Një tepsi me filxhanë farfuri (gjëzë: qielli me yjet).
✱Sin.: çarki, kuze, haronë, lëngjerë; mesore, rrethatore, sini, tabaka, tavë, gatesë.
♦ E do në tepsi (dikush) shih e do në gojë (dikush). Hedh valle në tepsi (dikush) tall. bën diçka edhe kundër dëshirës së tij; bën si do me të; e tall e luan me të sa të duash. Ia dha në tepsi (në tabaka, në pjatë) (dikujt) ia mbaroi një punë të gjithë vetë, nuk e la të lodhet a të mundohet; ia bëri diçka krejt gati, që ta ketë a ta marrë pa bërë asnjë përpjekje; ia dha llokum (në gojë). Ç’ka në *bardhak e hedh në tepsi (në çanak) (dikush). E luan në tepsi (dikë) keq. e mundon shumë, e sorollat, e sfilit; e sjell vërdallë; luan cingël (cingëlthi) (me dikë); e luan në tel; e luan në tagar keq. Luan vallen në tepsi (dikush) e hedh vallen shumë bukur, është valltar i zoti, mund të luajë vallen edhe në një vend të ngushtë. Të than tepsinë (tavën) (dikush). 1. Ha çdo gjë, përlan gjithçka që i vë përpara; është hamës i madh. 2. bised. Të vjedh çdo gjë, s’të lë gjë pa marrë. (Thotë) *gogla në tepsi (dikush).
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë