Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
BUJARÍ,~A f. 1. Të qenët bujar e i pritur, vetia e njeriut dorëdhënë e zemërbardhë; zemërgjerësi, shpirtmadhësi, fisnikëri shpirtërore. Bujaria e shqiptarit. Pres me bujari. Gjest i lartë bujarie. Me bujari të madhe. Dallohej për bujarinë dhe shpirtin e mirë. Bujaria s’matet me kuletë. (fj. u.).
2. Të qenët i ndershëm dhe i drejtë. E shprehte bujarinë në çdo gjë.
3. hist. Shtresa e bujarëve; përmb. tërësia e bujarëve, bujarët, fisnikëria; parësia, shtresa më e lartë në një fis. Bujaria feudale. Bujaria e lartë. Bujaria e fisit. Shtresa e bujarisë.
✱Sin.: dorëdhënie, dorëgjerësi, çiltëri, mirëpritje, fisnikëri, shpirtlartësi, shpirtmadhësi, zemërgjerësi, zemërbardhësi, oborrësi, parësi, pari, aristokraci, kalorësi.
BURRËRÍ,~A f. 1. Të qenët në moshën e burrit, të qenët burrë; mosha e mesme e njeriut ndërmjet djalërisë dhe pleqërisë, mosha e pjekurisë, burrni. Dhëmbi i burrërisë. Arriti burrërinë. Burrëria nuk është me rend. (fj. u.).
2. përmb. Tërësia e burrave të një vendi, të një shtëpie etj., burrat. Burrëria e fshatit. Burrëria e shtëpisë. U mblodh burrëria.
3. Të qenët i fortë, trim, i besës, i fjalës e fisnik, të qenët burrë me veti morale të larta; qëndrim i guximshëm, i vendosur dhe i papërkulur para një vështirësie, fatkeqësie a rreziku; kund. paburrëri. Tregoi burrërinë. E humbi burrërinë. E përballoi (i qëndroi) me burrëri. Kam burrërinë... kam guximin... S'e jep burrëria (etnogr.) nuk e lejon diçka zakoni i mirë a trimëria dhe fisnikëria e burrave. Burrëria nuk njihet duke folur pranë oxhakut. (fj. u.). Më burrëri bën ai që e fal gjakun, se ai që e merr. (fj. u.). Drejtësia është te burrëria. (fj. u.).
✱Sin.: fisnikëri, fisëri, shpirtmadhësi, kalorësi, bujari, trimëri.
FISNIKËRÍ,~A f. 1. Të qenët fisnik, zemërgjerë e i ndershëm, bujari. Sillej me fisnikëri të madhe.
2. përmb., hist. Shtresa më e lartë në shoqërinë feudale, aristokracia feudale; tërësia e fisnikëve; parësia, shtresa më e lartë e një fisi. Fisnikëria feudale.
3. vjet. Titull, me të cilin thirrej një fisnik me nderim. Fisnikëria juaj.
✱Sin.: bujari, fisëri, shpirtmadhësi, burrëri, kalorësi, parësi, pari, aristokraci, oborrësi.
SHPIRTBUJARÍ,~A f. Të qenët shpirtbujar, vetia e njeriut shpirtbujar, zemërbujari, zemërgjerësi. Virtyti i shpirtbujarisë. Shpirtbujaria e shqiptarëve. E priti me shpirtbujari.
✱Sin.: shpirtbujar, zemërbujari, zemërgjerësi, shpirtmadhësi.
SHPIRTMADHËSÍ,~A f. Të qenët shpirtmadh, vetia e njeriut që është shpirtmadh, zemërmadhësi; bujari, fisnikëri; kund. shpirtvogëlsi, shpirtngushtësi. Ndjenjë shpirtmadhësie. Tregoi shpirtmadhësi. Përfitoi nga shpirtmadhësia e saj.
SHPIRTVOGËLSÍ,~A f. Të qenët shpirtvogël, vetia e njeriut që është shpirtvogël, zemërvogëlsi; kund. shpirtmadhësi. I verbuar nga shpirtvogëlsia. Tregoi shpirtvogëlsinë e vet.
ZEMËRBARDHËSÍ,~A f. Të qenët zemërbardhë, vetia e njeriut zemërbardhë; bujari, shpirtbardhësi. Zemërbardhësia e malësorëve. Tërë qenia e saj rrezatonte zemërbardhësi. Të pret me zemërbardhësi. Do t’i ketë pëlqyer zemërbardhësia që tregove. Duke ruajtur si trashëgim zemërbardhësinë e tyre. Unë e kam çmuar gjithnjë zemërbardhësinë tuaj.
✱Sin.: shpirtmadhësi, zemërmirësi, dorëdhënie, bujari, fisnikëri, oborrësi, mirësi, ndershmëri, gjerësi, çiltëri.
ZEMËRGJERËSÍ,~A f. Të qenët zemërgjerë, vetia e njeriut zemërgjerë; zemërmadhësi, shpirtgjerësi; kund. zemërngushtësi. Zemërgjerësi e madhe (madhështore). Zemërgjerësia e popullit. Me zemërgjerësi të pakursyer. Me mjaft zemërgjerësi. Shfaqje zemërgjerësie. Falë zemërgjerësisë suaj. Ia dha me zemërgjerësi. Tregoi një zemërgjerësi si askush tjetër. Buzëqeshi me një zemërgjerësi tepër të ndjeshme. U magjeps nga zemërgjerësia e tij. Aty sikur gatuhej zemërgjerësia e njeriut. Keqpërdor zemërgjerësinë e tyre.
✱Sin.: shpirtmadhësi, zemërbardhësi, gjerësi, oborrsi, bujari.
ZEMËRMADHËSÍ,~A f. Të qenët zemërmadh, i mirë e i dashur; zemërgjerësi, shpirtmadhësi; kund. zemërvogëlsi, shpirtvogëlsi. E trajtoi (e priti) me zemërmadhësi. Gëzohem nga zemërmadhësia jote. Përfitoi nga zemërmadhësia e tij. Një krijim që i kushtohet zemërmadhësisë. U dilte shpejt inati nga zemërmadhësia e tyre e kulluar. - Të gjitha sa më ke treguar dëshmojnë qartë për fisnikërinë e saj e të njerëzve të saj. Zemërmadhësia dhe trimëria janë motra. (fj. u.).
✱Sin.: zemërgjerësi, shpirtmadhësi, fisnikëri.
ZEMËRMIRËSÍ,~A f. Të qenët zemërmirë, vetia e njeriut që është zemërmirë, shpirtmirësi; kund. zemërligësi, shpirtligësi. Shenjë zemërmirësie. Me shumë zemërmirësi. Ia shpërbleu zemërmirësinë. Folëm për zemërmirësitë e tij. Buzëqeshte me një zemërmirësi të këndshme. Thelbi i shqiptarëve është zemërmirësia dhe besa.
✱Sin.: shpirtmirësi, shpirtmadhësi, zemërbardhësi, zemërgjerësi, zemërmadhësi.
ZEMËRVOGËLSÍ,~A f. Të qenët zemërvogël, dallojë e njeriut zemërvogël, shpirtvogëlsi; kund. zemërmadhësi, shpirtmadhësi. Zemërvogëlsia e koprracit. E mori me qafë zemërvogëlsia e vet. - Ç’e kishin atë zemërvogëlsi me njëri-tjetrin? Sipas gjedhes “zemërmadhësi” krijohet dhe fjala me kuptim të kundërt “zemërvogëlsi”.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë