Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
►PÍQEM jovep., PÓQA (u), PJÉKUR 1. vetv., vet. v. III Bëhet i gatshëm për t’u ngrënë pasi zbruhet e rreshket në furrë ose në zjarr. U poqën bukët. U poq mishi. U poq byreku (lakrori). U poqën patatet (specat). U poq kafeja.
2. vetv., vet. v. III Bëhet më i fortë, më i qëndrueshëm, më i ngjeshur etj. në furrë ose në një vend të mbyllur me temperaturë të lartë. U poqën tullat (tjegullat, shtambat, qypat). U poq gëlqerja.
3. vetv., vet. v. III Arrin zhvillimin e vet të plotë (një pemë, drithi etj.) dhe është në kohën më të mirë për t’u vjelë, për t’u korrur a për t’u përdorur. U poq gruri. U poqën mollët (fiqtë). U poq rrushi. U poqën pjeprat. U poqën para kohe (vonë). S’është pjekur mirë.
4. fig., vetv. Nxehem shumë e skuqem a rreshkem duke qëndruar në diell, pranë zjarrit etj., thekem. U poqëm në diell (pranë zjarrit). U poq nga këmbët (nga shpatullat).
5. vetv., vet. v. III Mbledh qelbin plaga, arrin në një fazë kur, pasi ka mbledhur, është gati të çahet.
6. vetv., vet. v. III Arrin në fazën kur e nxjerr këlbazën. M’u poq kolla.
7. fig., vetv. Bëhem i aftë për jetën a për një veprimtari, duke fituar përvojën e njohuritë e nevojshme, duke u kalitur etj.. Është pjekur shpejt ai djalë. U poq para kohe. Në të ri çka piqet, s’hiqet. (fj. u.).
8. fig., vetv. Arrij moshën e pjekurisë. U poq e duhet të ngrejë familje.
9. vetv., vet. v. III Arrin kulmin ose pikën më të lartë të zhvillimit (një gjendje, një dukuri etj.).
10. vetv., vet. v. III Arrin në një gjendje kur është gati të shpërthejë e të veprojë për të sjellë ndryshime të reja cilësore. U poqën kushtet për diçka. U poq situata për ndryshime statutore. U poqën kushtet ekonomike (politike).
11. pës. e PJEK.
✱Sin.: arrihet, bëhem, vjen, digjem, burrërohem, rritem, mushtohem, urtësohem, nxehem, skuqem, rreshkem, thekem, kalitem, stërvitem, forcohem, kërthndezem, ndreqem, përmirësohem, ngrihem, zhvillohem, përgatitem, shenjet, përshenjet, motëson, karrtet, zbruhet, zhunget, ndulket, përflaket, përcëllohet.
♦ *Digjem e piqem. M’u poq (m’u tha) *buza (për diçka). I është pjekur *gruri (dikujt) keq. *Mishi të piqet e helli të mos digjet. (fj. u.). Nuk i është pjekur ashti (*kocka) (dikujt). Piqet (digjet) në *prush (dikush). Sheh *molla mollën e piqet. Sheh *rrushi rrushin e piqet. E pjek *mendjen (për diçka).
►PËRSHÉNJ/ET jovep., ~ (u), ~UR vetv., vet. v. III 1. Sapo fillon të piqet një pemë, jep shenjat e para të pjekjes. U përshenj rrushi. U përshenjën portokallet.
2. fig. Jep shenjat e para të zhvillimit një dukuri etj.; shfaqet diçka. U përshenjën tiparet e një dramaturgjie të re.
✱Sin.: shenjet, shënon, laroshet, larohet, laracohet, larushitet, mufkohet, shfaqet, duket, buthton.
►SHÉNJ/ET jovep., ~(u), ~UR vetv., vet. v. III 1. Nis të piqet, fillon e merr ngjyrë, përshenjet (për pemët). Kajsitë kanë filluar të shenjen. I volën fiqtë pa u shenjur. U shenj rrushi i bardhë. Pemët u shenjën.
2. vetv., vet. v. III Nxjerr gjethe e lule. Është shenjur mali. Janë shenjur pemët.
3. Zë e duket më shumë diçka. I është shenjur gjiri nga shtatzënia. Ka filluar t’i shenjet barku.
✱Sin.: përshenjet, shenjohet, skuqet, përskuqet, kuqërrohet, larohet, laracohet, blerohet, gjelbërohet, bulëzohet, fryhet, duket, shenjohet, shfaqet.
►SHENJ/ÓHET jovep., ~ÚA (u), ~ÚAR 1. vetv., vet. v. III Përshenjet, është duke u pjekur. Shenjohet rrushi. Është shenjuar misri.
2. vet. v. III, pës. e SHENJÓJ. Shenjohet shtegu verior i ngjitjes në majë. U shenjua edhe shtegu i Dajtit. Shenjohet vendvarrimi i dyshuar. Gjatësia e zanores nuk shenjohet në gjuhën shqipe. Kryetari shenjohet me shumicë votash. Janë shenjuar librat që duhen lexuar. Jeta e saj shenjohet nga ngjarje tragjike. Leximi shenjohet nga një ngjarje tjetër e rëndësishme. Fjala shenjohet me një domethënie tjetër. Të shenjohet fjala me të gjitha kuptimet.
✱Sin.: caktohet, përzgjidhet, larohet, laracohet, piqet, shenjet, përshenjet, kuptohet, tregohet.
SHËN/ÓJ vep., ~ÓVA, ~ÚAR kal. 1. I bëj një shenjë dikujt a diçkaje për ta dalluar; i vë shenjën e fabrikës. Shënoj bagëtinë. Shënoj pemët e thara për prerje. Shënoj me laps të kuq.
2. Mbaj shënim për diçka; shkruaj shënime të shkurtra, regjistroj me shkrim. Shënoj ngjarjet. Shënoj numrin e fletëve të votimit. Shënoj ditët e pushimit. Shënoj ankesat. - Shëno numrin e celularit. - Shënomëni edhe mua!
3. E paraqit një send, një madhësi, një të panjohur etj. me një shenjë konvencionale, e jap diçka me një shenjë të posaçme. Shënoj me x (me y, me a, me b). E shënoj me një katror (me një rreth, me një kryq).
4. Tregoj a vendos cakun e diçkaje, caktoj; caktoj dikë a diçka për një punë; vë në dukje, theksoj. Shënoj kufijtë në një lidhje. Shënuan ditën e fejesës. Siç e shënuam më lart.
5. vet. v. III Tregon një madhësi. Termometri shënoi 300 C. Temperatura shënoi -100 C.
6. Arrij një përfundim të mirë, një sukses. Shënojmë arritje të reja. Shënoi kohën më të mirë (në një garë atletike). Shënoj një rekord botëror. Shënon një arritje të re.
7. vet. v. III Dëshmon a pohon për momente a ngjarje të rëndësishme, një pikë kthese. Marrëveshja shënoi një hap përpara në marrëdhënien e tyre. Ky vit shënon një etapë të re tek prodhuesit vendas. Ngjarja shënoi një kthesë të papritur. Botimi shënon sprovën e parë të autorit. Shënon kulmin e diçkaje.
8. fig. Kujtoj një ditë të shënuar, përkujtoj. Shënoj 28 Nëntorin. Shënoi 1 Majin. Shënojmë Ditën e Flamurit.
9. Bëj vaksinën, vaksinoj. Shënoj linë. Shënova fëmijët.
10. edhe jokal. Marr shenjë me armë, shënjoj. - Mbaj frymën e pastaj shëno! - Shënoje në mes!
11. sport. Bëj gol, kosh a pikë (në futboll, në basketboll ose në volejboll). Shënoi golin e parë. Shënoi me skuadrën e zemrës. Shënoi tre kosha. Shënoi në setin e parë.
12. jokal., vet. v. III Shenjet, përshenjet; nis të formojë frytin, nis të nxjerrë kokrra. Kanë shënuar dardhat. Shënuan fiqtë. Edhe qershitë kanë shënuar.
✱Sin.: shkruaj, regjistroj, qëmtoj, vë, caktoj, pres, tregon, theksoj, arrij, vaksinoj, përkujtoj.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë