Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
SFYTYRÍM,~I m. sh. ~E, ~ET [SFYTYRÍM/Ë,~A f. sh. ~A, ~AT] Veprimi kur sfytyrin; turfullimë nga inati. Lëshoi një sfytyrim. Dëgjoheshin sfytyrimet e tij. Mjaft me këto sfytyrime.
✱Sin.: turfullim, shkrofëtimë, shfryrje, ftorrje, fërgëllim, tërhuzje.
SHFRE/J vep., ~VA, ~ÝER 1. jokal. Shpreh në mënyrë të vrullshme ndjenjat e mendimet e mia për dikë a për diçka, që kanë qenë deri atëherë të ndrydhura, nxjerr atë që më është mbledhur në zemër për t’u lehtësuar, zbraz zemrën; flas hapur me dikë. Shfreu me lot në sy. Shfrej me sharje e kërcënime. Shfrej kundër dhunës. Shfreu hapur. Nuk më la kohë të shfrej. Shfrej me fuqi.
2. kal. Shfaq së jashtmi dhe lirshëm ndjenjat, pasionet, nxjerr jashtë çfarë ndiej; nxjerr inatin a zemërimin mbi dikë, bëj që ta pësojë për ato që më ka shkaktuar, shfryj. Shfreu mllefin (zemërimin, inatin, dufin, urrejtjen, dhembjen, tërbimin). Shfrej brengën. Shfrej atë që ndiej. Shfreu mbi të. Shfrej me vete.
3. jokal. Dal nga një mjedis i mbyllur e eci për të marrë pak ajër të pastër, shëtis lirshëm andej-këtej për t’u çlodhur a për t’u argëtuar. Pas asaj grindjeje, doli të shfrente pak. Shfreu tërë ditën arave.
4. kal. I shfryj a i shfryhem dikujt. I shfreu me zemërim. I shfreu tërë duf. I shfreu me mllef.
✱Sin.: shkarkoj, zbraz, zhdëfrej, shfryj, shpërthej, sfytyrin, grafulloj, gulfoj.
SHFRY/J vep., ~VA, ~RË 1. jokal. E nxjerr frymën me shumë forcë e me zhurmë, turfulloj. Shfryn e turfullon. Kali (pela) shfrynte.
2. kal. Nxjerr diçka nga goja a nga hundët, duke e fryrë me forcë. Shfryj hundët liroj, pastroj hundët. Shfryj ujin. Hante fara e shfrynte lëvozhgat. Shfrynte tymin e llullës.
3. kal. Zbraz ajrin e ngjeshur pjesërisht a tërësisht nga një send i fryrë, ia zvogëloj vëllimin; kund. fryj. I shfrynë gomat e biçikletës. Shfryj topin e basketbollit. Shfrynë tullumbacet.
4. jokal., vet. v. III Nxjerr me forcë avull a ajër, zakonisht për motorin e një mjeti; gulçon. Shfryn avullorja. Motori shfrynte. Treni shfryu sapo mbërriti në stacionin e fundit.
5. jokal., vet. v. III Fryn me tërbim (për tufanin etj.); ka dallgë të mëdha, tërbohet (për detin etj.); nxjerr jashtë me vrull gazra e hi, shpërthen (për vullkanet). Shfryn stuhia (murrlani, tufani, dimri). Era shfryn furishëm. Shfryn veriu. Deti shfryn tallaze. Shfryn oqeani. Shfryn vullkani. Shiu shfryu.
6. jokal. E rrit vëllimin e vet dhe del jashtë shtratit duke përmbytur vendet përreth (për lumin, përroin etj.), vërshon. Shfryu lumi (përroi). Kishte shfryrë liqeni dhe rrugët qenë mbushur me ujë.
7. kal. Ul plotësisht të ënjturit në një pjesë trupi, e largon pezmatimin; çënjt. Ilaçi që shfryn këmbët. Shfryj dorën me kompresa. Shfryn barkun.
8. jokal., vet. v. III Lëshon sytha, bulon, sython (zakonisht për pemët). Shfryu kumbulla. E fundit shfryu dardha.
9. jokal. edhe kal., fig. Nxjerr jashtë me furi ndjenjat; ia nxjerr inatin a zemërimin dikujt duke i folur rëndë a duke bërë diçka me rrëmbim, shfrej. Shfryu zemërimin (dufin, urrejtjen, mllefin, inatin). U shfryn punëtorëve. Shfryn me të shara. Shfrynte me vete. Shfryn kundër diktaturës. Ia tregoi dhëmbët duke shfryrë. Iku duke shfryrë. Shfryu në lot. Shfryn si bualli për dikë që bërtet shumë.
10. jokal. Rënkon thellë, psherëtin, ofshan. Shfryu thellë. Ç’ke që shfryn?
11. kal., fig. Ul numrin, e reduktoj sasinë, duke lënë vetëm atë që është e domosdoshme; pakësoj, shkurtoj. I shfrynë organikat. I shfrynë nevojat për punë. I shfrynë normat e mësuesve.
✱Sin.: shfrej, gulçoj, shkordh, shkreh, turfulloj, nxjerr, gulfon, sfytyrin, çënjt, shpërthen, vërshon, pakësoj, shkurtoj, zvogëloj, grafulloj, ofshan, bulëzon, shpërthen, çel.
TURFULL/ÓJ vep., ~ÓVA, ~ÚAR jokal. 1. vet. v. III Nxjerr ajrin nga hundët dhe nga goja me zhurmë kur është i lodhur a i egërsuar ose kur ka frikë; shfryn me forcë nga hundët; sfytyrin (zakonisht për kalin). Turfullon kali (derri, bualli).
2. vet. v. III Nxjerr një zhurmë të mbytur, të zgjatur e të rëndë, lëshon gërvima të mbytura. Kamioni turfulloi dhe u nis. Lokomotiva turfullonte.
3. fig., bised. Shfryj tërë inat, nxjerr dufin ose zemërimin kundër dikujt a diçkaje duke shfryrë e duke sharë, duke murmuritur me vete, shfryj me vete nga marazi, shaj nëpër dhëmbë. Ç’ka që turfullon ashtu? Turfullonte nga inati.
✱Sin.: shfryn, shfren, sfytyrin, ftorr, shkrofëtin, fërgëllon, shaj, murmurit.
TËRRFÁT vep., ~A, ~UR jokal. 1. vet. v. III Shfryn hundët (kali, dhia, cjapi etj.); turfullon, shkrofëtin, sfytyrin. Kali tërrfati me të ndierë të zotin.
2. fig., bised., tall. Shpreh pakënaqësi duke sharë, duke murmuritur, turfulloj. Po ai ç’ka që tërrfat ashtu? Kur s’të vjen përshtat, nis e tërrfat. (fj. u.).
✱Sin.: shfryn, turfullon, tërrfatem, shkrofëtin, sfytyrin, shaj, murmuris, shfrej.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë