Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
ALOTROPÍZ/ËM,~MI m., kim. Aftësia e një elementi kimik që të ekzistojë në shumë forma në të njëjtën gjendje agregate, zakonisht në gjendjen e ngurtë ose të gaztë, në forma me renditje ose strukturë tjetër të atomeve, rrjedhimisht edhe me veti fizike e kimike të ndryshme. Alotropizmi i karbonit në diamant, grafit e grafen.
KRÍM,~I m. sh. ~E, ~ET drejt. Akt kriminal a penal i kryer nga veprimi a mosveprimi, që rrjedhimisht sjell pasoja vdekjeprurëse; faj i rëndë. Krim i organizuar (i rëndë, i rrezikshëm, i cilësuar). Krim ndërkombëtar (kundër njerëzimit) krim i paraparë në Konventën e Gjenevës. Krim lufte krim shtetëror i kryer në luftë. Ka bërë krime.
PASÓJ/Ë,~A f. sh. ~A, ~AT 1. Gjurmët a ndikimi që lë një veprim ose një gjendje e mëparshme; diçka zakonisht e padëshirueshme a e keqe, që vjen pas një veprimi; rrjedhim. Pasojë e drejtpërdrejtë. Pasoja të rënda (të këqija, të hidhura). Me pasoja vdekjeprurëse. I mbarsur me pasoja. Ka (sjell) pasoja. U zhdukën të gjitha pasojat e luftës (e tërmetit). Si (për) pasojë... rrjedhimisht, prandaj, për rrjedhim. Urrejtja është pasojë e një jete të pakënaqur (afor.).
2. filoz. Dukuri a gjendje që lind e kushtëzohet nga një shkak ose nga disa shkaqe. Shkaku dhe pasoja.
✱Sin.: gjurmë, rrjedhojë, rrjedhim, konsekuencë, rezultat, përfundim, efekt, fryt, gërmadhë.
PRA ndajf. 1. Në atë rast; kështu; atëherë (përdoret me kuptim përmbyllës). Pra, po nisemi. Pra, u morëm vesh. Pra, do ta plotësojmë planin para afatit.
2. bised. Pastaj. Dëgjoi fjalët, pra u nis. Prit të ngrihem, pra të ta them. Kërkon ta shohë, pra të ikë.
✱Sin.: atëherë, pastaj, pra, kështu, kësisoj, prandaj, domethënë, përfundimisht, rrjedhimisht.
PRANDÁJ lidh. 1. Përdoret në krye të një fjalie të pavarur ose kryesore për të ripërmendur arsyen a shkakun e dhënë në fjalinë tjetër dhe për të treguar se veprimi a gjendja e shprehur në këtë fjali është rrjedhojë e atij shkaku; për këtë shkak, për këtë arsye. Ndërroi aeroplan, prandaj s’erdhi. Nuk e kishte marrë vesh mirë pyetjen, prandaj s’dinte si të përgjigjej. Prandaj s’foli ai?!
2. si ndajf. edhe iron. Për këtë shkak, për këtë arsye. Ishte më i madh, prandaj! Aha, s’i pëlqeu, prandaj!
✱Sin.: ndaj, andaj, pra, pa, rrjedhimisht.
RRJEDHÍM,~I m. sh. ~E, ~ET 1. Pasoja që vjen nga një veprim a nga një ngjarje. Rrjedhim logjik i shkaqeve. Rrjedhim kryesor. Rrjedhim i pashmangshëm. Kjo është rrjedhim i drejtpërdrejtë i politikave pozitive. Si rrjedhim, vendi meriton më shumë.
2. mat. Pasojë e drejtpërdrejtë e një teoreme të vërtetuar më parë. Shihet qartë rrjedhimi i teoremës.
✱Sin.: rrjedhojë, konsekuencë, rezultat, përfundim, efekt, fryt.
♦Si (për) rrjedhim fj. ndërm. domethënë, në këtë mënyrë, rrjedhimisht, prandaj, pra. Si rrjedhim i... nga, për shkak se, si pasojë e...
RRJEDHIMÍSHT ndajf. Si pasojë e diçkaje tjetër, për rrjedhim, domethënë, për pasojë. Detyra iu ngarkua atij, rrjedhimisht, ai mban edhe përgjegjësinë. Përmirësimi i kushteve mjedisore rrit, rrjedhimisht, cilësinë e jetesës së njerëzve.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë