Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
ADMINISTRATÓR,~I m. sh. ~Ë, ~ËT drejt. 1. Personi që drejton ose mbikëqyr një institucion, një organizatë, një biznes ose një sistem të caktuar; përgjegjës për vendimmarrjen dhe zbatimin e rregullave administrative; punonjës me përgjegjësi i administratës. Administratori i ndërmarrjes (i fabrikës, i institutit, i spitalit etj.). Administrator i sistemit. Zyra e administratorit.
2. Nëpunës me përgjegjësi, i ngarkuar të administrojë një sipërmarrje a një pasuri dhe të kujdeset për të, që t’i sigurojë fitimet pronarit. Administrator i pronave (i pasurive). Administrator i Kompanisë. Administrator i Bankës së Shtetit. Administrator në Entin pensional.
✱Sin.: qeverisës, udhëheqës, drejtues, menaxhues, mbarështues, ndorues.
ADMINISTRÚES,~E mb., drejt. Që ka të bëjë me administratën ose administrimin, me drejtimin dhe me organizmin e një institucioni, të një ndërmarrjeje, të një pasurie të paluajtshme ose të luajtshme; mbikëqyrës. Bordi administrues. Këshilli administrues. Shërbimi administrues.
✱Sin.: drejtues, qeverisës, udhëheqës, menaxhues.
ADMINISTRÚES,~I m. sh. ~, ~IT drejt. Ai që merret me administrimin e një ndërmarrjeje, të një institucioni, të një kompanie, të një pasurie, të një prone etj.; mbikëqyrës. Administrues i doganave. Administrues i Qendrës kompjuterike. Administrues i pronave shtetërore. Administrues në Administratën tatimore. Administrues i burimeve energjetike.
✱Sin.: udhëheqës, qeverisës, drejtues, drejtor, menaxhues.
ARBITRARITÉT,~I m. sh. ~E, ~ET libr. 1. Zgjidhje e çështjeve pa përfillur ligjet e rregullat, pa pyetur të tjerët; veprim që kryen dikush me kokë të vet; të qenët arbitrar; sjellje ose vendimmarrje e padrejtë, e njëanshme ose e paarsyetuar ligjërisht dhe moralisht. Arbitraritet burokratik. Arbitrariteti i pushteteve. Arbitrariteti politik. Arbitraritet administrativ. Sundon arbitrariteti. Parimi i mbrojtjes nga arbitrariteti. Arbitrariteti qeverisës. Arbitrariteti i sundimit mendor.
2. gjuh. Veçoria e shenjës gjuhësore sipas së cilës kuptimi gjuhësor nuk varet nga shprehja ose nga forma gjuhësore. Arbitrariteti i shenjave gjuhësore. Koncepti i arbitraritetit. Parimi i arbitraritetit. Arbitrariteti i lidhjes midis shënjuesit dhe të shënjuarit.
►DEKOMPOZ/ÓHET jovep., ~ÚA (u), ~ÚAR libr., vet. v. III 1. vetv. Zbërthehet. U dekompozua në pjesët përbërëse.
2. vetv. Prishen, shkatërrohen indet që e përbëjnë; prishet (një lëndë organike). Dekompozohen yndyrnat. Lënda filloi të dekompozohet. Kufoma u dekompozua.
3. fig., keq., vetv. Prishet, çoroditet. Sistemi qeverisës po dekompozohet.
4. pës. e DEKOMPOZÓJ.
✱Sin.: zbërthehet, shpërbëhet, prishet, shthuret, çoroditet, përdhoset.
KABINÉT,~I m. sh. ~E, ~ET zyrt. 1. Organi më i lartë qeverisës që përfshin kryeministrinë dhe ministritë, kryeministrin dhe tërësinë e ministrave, së bashku me departamentet dhe gjithë punonjësit e qeverisë. Kabineti i këshillit të ministrave kryeministria. Kabinet i përkohshëm (krize, urgjence) qeveri e përkohshme teknike. Kabinetet e ministrive. Nëpunësi (shefi) i kabinetit. Mblidhet kabineti qeveritar.
2. Zyrë a dhomë pune e veçantë, e pajisur me të gjitha mjetet e nevojshme, ku zhvillohen këshillime me karakter mësimor, studimor etj. Kabinet pedagogjik dhomë pune e mësuesve të një shkollë etj. Kabineti i gjeografisë (i fizikës, të biologjisë) dhomë e tillë pune ose klasë e një shkolle, ku mbahen mjete të ndryshme të lëndës së gjeografisë (të fizikës, të biologjisë).
KOMUNIKÁT/Ë,~A f. sh. ~A, ~AT 1. Njoftim a kumtim zyrtar që u bëhet njerëzve, qytetarëve etj. nga ana e një organi qeverisës ose nga ana e kryesisë së një partie etj.; kumtim; komunikim. Komunikatë shtypi.
2. Dokumenti i shkruar që përmban këtë kumtim. Komunikatë radiofonike. Shpërndarja e komunikatave. Lëshoi një komunikatë.
✱Sin.: kumtim, komunikim.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë