Fjalori

Rezultate në përkufizime për “pilohem”

Mëso si ta përdorësh
<<< Kthehu te kërkimi kryesor në fjalor

LËSHOHEM

►LËSH/ÓHEM jovep., ~ÓVA (u), ~ÚAR 1. vetv. Bie poshtë menjëherë, këputem e bie diku; ulem a shtrihem menjëherë diku; vet. v. III varet poshtë lirisht a mbështetet mbi diçka, derdhet. U lëshua përdhe (në dysheme, në shtrat). Koka iu lëshua mënjanë. Flokët i lëshoheshin mbi supe.
2. vetv. Lirohem nga diçka dhe iki, shkëputem, çlirohem. U lëshua qeni nga zinxhiri.
3. edhe fig., vetv. Shkoj diku me nxitim, sulem, turrem; i vërsulem dikujt a diçkaje, i hidhem, i sulem, e sulmoj me të gjitha forcat; ia hyj një pune me vrull, i përvishem me hov. U lëshuan tatëpjetë. Iu lëshuan qentë. U lëshuan mbi armikun. Iu lëshuan me gurë (me bomba dore, me shqelma, me grushta). Iu lëshuan me të shara (me fjalë). U lëshua deri në Elbasan. Iu lëshuan kodrave (maleve, arave). Iu lëshuan grurit (kanalit) të gjithë së bashku. Iu lëshuan bunkerit gjerman.
4. fig., vetv. Jepem shumë pas diçkaje; ha ose pi me lakmi të madhe e me të shpejtë. Ishte lëshuar pas pijeve (pas qejfeve). Lëshohet pas ëmbëlsirave. Nuk lëshohet në të ngrënë.
5. fig., vetv. Nuk u qëndroj dot vështirësive, pengesave e fatkeqësive, përkulem; humbas guximin e vendosmërinë, s'kam më zemër për të vepruar, me priten fuqitë; e lëshoj veten. U lëshua keq. Nuk lëshohet para vështirësive.
6. fig., vetv. Dobësohem, bie nga shëndeti e s'kam fuqi të bëj diçka, të lëviz etj. I është lëshuar trupi. M'u lëshuan këmbët s'kam fuqi të qëndroj më në këmbë.
7. vetv., vet. v. III Rrit vëllimin e vet, bymehet; zgjatet, varet. Hekuri (bakri) lëshohet. Lëshohet ky stof.
8. vjet., vetv. Ndahem nga burri a nga gruaja.
9. pës. e LËSHOJ.
✱Sin.: lëshohem, plandosem, rrëzohem, shembem, këputem, jepem, ulem, shtrihem, varet, mbështetet, derdhen, lirohem, shkëputem, çlirohem, sulem, pilohem, furem, fugem, vërsulem, hidhem, vërvitem, dyndem, vrullem, turrem, hamullohem, përvishem, jepem, përkulem, tërhiqem, dorëzohem, shkrehem, zbruhem, shpartallohem, zgajtem, zgërlaqem, zdatem, derdhet, bymehet, zgjatet, lirohet, shkrehet, labërgohet, shtendoset.
♦ Iu lëshua gusha dikujt shih te GUSH/Ë,~A. Iu lëshua (iu vu) në shpinë dikujt shih te SHPIN/Ë, ~A. U lëshuan si miza në mjaltë shih te MIZ/Ë,~A.

NDJEK

NDJEK vep., NDÓQA, NDJÉKUR kal. 1. Shkoj prapa dikujt a prapa diçkaje për ta kapur, i vihem pas për ta zënë ose për ta dëmtuar a për ta asgjësuar. Ndjek ujkun. Ndjek gjakun. Ndjek armikun (keqbërësin). E ndoqi këmba-këmbës. E ndjek nga pas. I ndoqi deri larg.
2. Eci pas dikujt a pas diçkaje që prin, i shkoj prapa pa iu ndarë. Qeni e ndjek të zotin. Ndoqëm udhërrëfyesin. Ndjek gjurmën. Ishte lodhur e nuk e ndiqte dot nga pas.
3. Eci në një rrugë, në një shteg a në një drejtim të caktuar. Ndoqën rrjedhën e lumit. Ndoqën vazhdën e gjurmëve.
4. fig. Zbatoj një mënyrë a një metodë të caktuar, eci sipas ideve a sipas parimeve specifike. Ndjek një rrugë të drejtë (të gabuar). Ndjek një politikë të drejtë.
5. Shoqëroj veprimet e një tjetri, e dëgjoj çfarë thotë ose përsërit atë që bën dikush tjetër. Ndjek fillin e mendimeve të dikujt. Nxënësit ndiqnin leximin e mësuesit. Nuk po më ndjek me vëmendje.
6. fig. Veproj ose sillem sipas shembullit të dikujt, e kam si udhëheqje a si udhërrëfyes; Ndjek këshillat e dikujt. Ndjekin modën. Ndjek shembullin e më të mirëve. Ndoqën rrugën e të parëve të tyre.
7. Lexoj, dëgjoj a shikoj rregullisht veprimtarinë apo aktivitetet e një shkrimtari, gazetari, këngëtari, të një emisioni etj. Ndjek emisionin tim të preferuar. Ndjek dikë në rrjetet sociale.
8. Jam pasues a përkrahës i dikujt a i diçkaje, jam ithtar. Ndjek një rrymë politike (filozofike, artistike etj.).
9. Vështroj diçka që lëviz, e shoqëroj me shikim. Ndjek me sy. E ndoqi deri sa u zhduk nga sytë.
10. Shoh ose dëgjoj një shfaqje, një program etj. Ndjek një ndeshje (një lojë). Ndjek punimet e një konference. E ndoqi deri në fund.
11. fig. Mbikëqyr vazhdimisht për të parë si ecën e si zhvillohet diçka; kujdesem vazhdimisht për mbarëvajtjen e diçkaje, kam përsipër një punë për ta çuar deri në fund; shoh. Ndjek një çështje. Ndjek zbatimin e një projekti. Ndjek ecurinë (frekuentimin) e nxënësve. Ndjek zhvillimin e ngjarjeve. Ndjek me vëmendje (me kujdes, me interesim, me kënaqësi, me padurim, me ankth) diçka.
12. fig. Synoj të arrij diçka. Ndjek një qëllim (një objektiv).
13. Shkoj rregullisht në një shkollë a diku tjetër për të mësuar; vijoj. Ndjek shkollën (kursin). Ndjek mësimet (studimet). Ndjek një trajnim online. Ndjek klasën e parë.
14. bised. Dëboj; përzë. E ndoqën nga puna. E ndoqi nga shtëpia. I ndoqëm pushtuesit e huaj. Ndiqi ato mendime nga koka!
15. jokal., vet. v. III Vjen në radhë pas dikujt a pas diçkaje, pason. Në kapitujt që ndjekin. Bibliografia që ndjek përfundimet, është shumë e pasur.
✱Sin.: ndehem, pilohem, qepem, gjurmoj, ith, shkreh, gjëmoj, nuhurit, hetoj, shoqëroj, dëgjoj, përsëris, veproj, sillem, vijoj, shkoj, pasoj, përkrah, vështroj, sodis, frekuentoj, përcjell, vëzhgoj, vij, shoh, shikoj, mbikëqyr, trajtoj, synoj, dëboj, përzë, shkul, përndjek.
♦ E ndjek në çdo çap (në çdo *hap) (dikë a diçka). Ndjek *gjurmët (e dikujt). E ndjek *gjurmë për gjurmë (gjurmë pas gjurme) (dikë a diçka). E ndjek *hap për (më) hap (dikë a diçka). E ndjek *hap pas hapi (dikë a diçka). Ndjek një *hulli. As të *prin e as të ndjek (dikush). Ndjek *rrugën (udhën) (e dikujt). Ndjek udhën (*rrugën) (e dikujt).

SULEM

SÚL/EM jovep., ~A (u), ~UR vetv. 1. Nisem me vrap për diku, derdhem me turr deri në një vend, turrem. Sulu deri te libraria. U sul brenda duke iu marrë fryma. Aeroplanët sulen drejt qiellit. U sul të gjente mjekun.
2. Hidhem mbi dikë për ta mposhtur, për ta rrëzuar a për ta mundur; i lëshohem dikujt, e sulmoj; kund. tërhiqem, sprapsem. U sulën mbi armikun. U sulën me armë. Iu sulën qentë e rrugës. Ata suleshin përpara me guxim.
3. fig. I vihem një pune me ngulm, e marr me vrull diçka. U sulen arave. Iu sul malit me guxim.
4. bised. I drejtohem dikujt me qortime e fjalë të rënda, e sulmoj me fjalë. Mos iu sul ashtu! Iu sul me fjalë të ashpra.
✱Sin.: vërsulem, lëshohem, derdhem, pilohem, vrapoj, sulmoj, hov, hidhem, lëshohem, flakëroj, furem, mësyj, kërcej.

VRULLOJ

VRULL/ÓJ jovep., ~ÓVA, ~ÚAR jokal. Sulem me vrull kundër dikujt a diçkaje; vrapoj a eci me vrull, dal ose lëviz përpara me vrull; marr vrull. Vrulloi kundër armikut. Vrulluan kuajt. Vrulloi makina. Vrulloi drejt derës. Vrulloi era. Vrulloi me sa kishte fuqi. Vrulloi dhe kërceu.
✱Sin.: vrullem, turrem, flakem, derdhem, hidhem, vërsulem, vrundulloj, pilohem.

Ky fjalor është domosdoshmëri për shkrimtarët e për publicistët, për shkollarët e për studentët, për mësuesit e për pedagogët, për studiuesit e për këdo që merret me përdorimin e kultivimin e gjuhës amtare.

Ai u vjen në ndihmë gjithë atyre që merren veçanërisht me gjuhën e shkruar, por edhe të folur, me krijime e me përkthime, me hartimin e fjalorëve të tipave të ndryshëm etj.

...lexo më tepër.


© Akademia e Shkencave e Shqipërisë, 2026 — Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.

www.akad.gov.al
Adresa: Sheshi "Fan Noli", Tiranë