Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
ETNOCÍD,~I m. sh. ~E, ~ET soc. Akulturim i dhunshëm nga ana e një shoqërie apo e një grupi etnik më të fortë në dëm të një shoqërie më të dobët. Etnocid kulturor. Etnocidi sistematik. Etnocid i pashembullt. Përndjekjet deri në etnocid.
HYJNÓR,~E mb. 1. Që ka të bëjë me hyjin a me hyjninë; që i përket hyjit a hyjnisë, i hyjit ose i hyjnisë; që ka cilësi të hyjnisë; i shenjtë. Fuqi hyjnore. Fryma hyjnore. E drejta hyjnore. Bekimi hyjnor.
2. fig. Që është shumë i bukur, i mrekullueshëm; i pashembullt. Fytyrë hyjnore. Zë hyjnor. Valle hyjnore.
3. fig., poet. Që ka forcë a fuqi të madhe.
4. vjet. Fetar; kishtar. Predikuesit hyjnorë.
MONSTRUOZITÉT,~I m. sh. ~E, ~ET 1. Diçka jashtëzakonisht e egër dhe mizore, sjellje a veprim çnjerëzor, kafshëri. Të vrasësh njerëz është një monstruozitet i vërtetë. Dokumentimi i monstruoziteteve të kryera nga regjimet diktatoriale. Monstruoziteti i një diktatori.
2. fig. Diçka e shëmtuar dhe e frikshme; shëmtim i paparë. Bllokimi i sheshit pa asnjë paralajmërim iu duk një monstruozitet i pashembullt. Me shpifje e monstruozitete. Shohim dhe dëgjojmë monstruozitete. Monstruozitete letrare.
PADËGJÚAR (i, e) mb. 1. Që nuk është bërë i njohur në shoqëri, jo i dëgjuar; kund. i dëgjuar. Shkrimtar (këngëtar) i padëgjuar. Vend i padëgjuar.
2. Që nuk ka ngjarë ndonjëherë më parë, që ka diçka të çuditshme a të jashtëzakonshme; kund. i dëgjuar. Histori (ngjarje) e padëgjuar.
3. I padëgjueshëm, i pabindur; kund. i dëgjuar. Fëmijë i padëgjuar.
✱Sin.: i panjohur, i paemër, i paparë, i jashtëzakonshëm, i padëgjueshëm, i pangjarë, i pashembullt, i pashoq, i pabindur.
PAGJÁSË (i, e) mb. Që nuk ka të ngjarë të jetë a të ndodhë, që nuk pritet të ndodhë; që nuk ngjan të jetë i vërtetë, i pabesueshëm.
✱Sin.: i pabesueshëm, i pavërtetë, i pagjashëm, pashembullt, i pabesueshëm.
PAKRAHASÚESH/ËM (i), ~ME (e) mb. 1. Që nuk mund të krahasohet me një tjetër për të nxjerrë ngjashmërinë, dallimet e veçoritë e tyre; që nuk mund të krahasohet për nga madhësia, për nga forca etj. me një tjetër; kund. i krahasueshëm. Dukuri të pakrahasueshme. Madhësi të pakrahasueshme.
2. fig. Që dallohet mbi gjithë të tjerët nga cilësitë, nga përmasat etj., që është jashtë çdo krahasimi, i pashoq; kund. i krahasueshëm. Me fuqi (me forcë) të pakrahasueshme. Me zgjuarsi të pakrahasueshme. Bukuri e pakrahasueshme. Guxim i pakrahasueshëm. Ritme (përparime) të pakrahasueshme. Zhvillim (ndryshim) i pakrahasueshëm.
✱Sin.: i pakrahasim, i papërqasshëm, i pashoq, i pashembullt, i paballafaqueshëm, i pabarazueshëm, i pakundshoq, i paarritshëm.
PANGJÁRË (i, e) mb. Që nuk ka ndodhur a që nuk është dëgjuar ndonjëherë, i paparë; i rrallë, i jashtëzakonshëm. Me një shkathtësi të pangjarë. Ishte diçka e pangjarë.
✱Sin.: i paparë, i rrallë, i jashtëzakonshëm, i padëgjuar, i pashembullt, i pandodhur, i patëdytë, i pashoq.
PAPÁRË (i, e) mb. 1. Që nuk e kemi parë ndonjëherë; i panjohur; kund. i parë. Fytyrë e paparë. Njeri i paparë.
2. Që nuk e njeh mirë botën, që nuk i ka parë shumë vende e shumë gjëra; kund. i parë. Njeri i paparë.
3. bised. Që nuk është ngopur ndonjëherë, i babëzitur. Hante si i paparë.
4. Që nuk është parë a nuk është dëgjuar ndonjë herë tjetër; shumë i madh, i pashoq, i jashtëzakonshëm. Hov (vrull) i paparë. Përpjesëtime të papara. Ritme të papara.
✱Sin.: i panjohur, i pavënëre, i pashëtitur, i babëzitur, i pangjarë, i padëgjuar, i jashtëzakonshëm, i pashoq, i padalë, i pabredhur, i pagjezdisur, lakmitar, i rrallë, pashembullt, i pakarakter, i paparim, i paqëndrueshëm, i pavendosur, matrapaz.
PASHÉMBULLT (i, e) mb. Që nuk ngjan ose që nuk mund të krahasohet me dikë a me diçka tjetër; që nuk është parë ose që nuk është dëgjuar ndonjëherë tjetër; i pashoq; i pakrahasueshëm. Përpjesëtime të pashembullta. Suksese të pashembullta. Heroizëm i pashembullt. Zhvillim i pashembullt.
✱Sin.: i pashoq, i pakrahasueshëm, i pagjasë, i pangjarë, i pangjashëm, i paparë, i padëgjuar.
PASHÓQ (i), ~E (e) mb. 1. Që s’mund të krahasohet me tjetër njeri, që s’e ka shokun. Trim (burrë) i pashoq. Mjeshtër (punëtor, artist) i pashoq.
2. Që është i vetmi në llojin e vet, që shfaqet në shkallën më të lartë, i pashembullt, i paparë. Ritëm i pashoq. Me zotësi (me trimëri) të pashoqe. Egërsi e pashoqe. Me guxim të pashoq.
✱Sin.: i pakundshoq, i pashembullt, i paparë, i padëgjuar, i pakrahasueshëm.
SHENJTËRÚAR (i, e) mb. 1. fet. Që është shenjtëruar, që është bërë a është shpallur i shenjtë; kund. profan. Vend i shenjtëruar. Bukë e shenjtëruar. E shtuna e shenjtëruar. Petka të shenjtëruara. - I shenjtëruar qoftë emri yt!
2. fig. Që mbart vlera të padiskutueshme, që është i denjë për nderim. Gjuhë e shenjtëruar. Mbrëmje e shenjtëruar. Shestim i shenjtëruar. Fitore e shenjtëruar.
✱Sin.: i shenjtë, hyjnor, fetar, i pashembullt, i denjë.
SHENJTËRÚES mb., fet. Që është i shenjtë, që shenjtëron; kund. profan. Hiri yt shenjtërues. Vepër shenjtëruese. Kontributi i tij shenjtërues.
✱Sin.: i shenjtë, hyjnor, i pashembullt, i denjë.
STOICÍZ/ËM,~MI m. 1. filoz. Doktrinë filozofike e periudhës së lashtë greko-romake, që predikonte etikën idealiste si nënshtrim ndaj fatit dhe e kërkonte lumturinë te jetesa në përputhje me natyrën e duke mposhtur ndjenjat. Si mund të na frymëzojë stoicizmi. Ithtarë të stoicizmit.
2. fig. Qëndresë me durim dhe gjakftohtësi para fatkeqësive, sprovave e vështirësive të ndryshme të jetës dhe ndaj dhembjes; ngulm. Stoicizëm dhe shpresë. I bëri ballë me stoicizëm. Kishin stoicizëm të pashembullt. Kërkonte të vërtetën me stoicizëm.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë