Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
ANTIPARLAMENTÁR,~E mb., pol. Që është kundër parlamentarëve dhe kundër parlamentit; që kundërshton parlamentin si institucion, kundërparlamentar; kund. parlamentar. Qëndrim antiparlamentar. Betejë antiparlamentare. Trazira antiparlamentare. Rryma antiparlamentare.
ANTIPARLAMENTARÍZ/ËM,~MI m., pol. Qëndrim kundër një sistemi parlamentar, të qenët kundër rolit dhe funksionit të parlamentit në qeverisjen e një vendi; kundërparlamentarizëm; kund. parlamentarizëm. Antiparlamentarizmi si antisistem. Strategji të reja të antiparlamentarizmit. Platformë e antiparlamentarizmit.
DEMOKRISTIÁN/E,~IA f. sh. ~E, ~ET Anëtare e një partie demokristiane. Në grupin parlamentar bën pjesë edhe një demokristiane.
EUROPIANÍZ/ËM,~MI m. Europeizëm. Europianizmi i shqiptarëve. Leksione mbi europianizmin politik dhe parlamentar. Përpjekjet për të zbuluar europianizmin e përhershëm. Qendra e europianizmit.
FRAKSIÓN,~I m. sh. ~E, ~ET pol. 1. Grup anëtarësh të një partie politike, që për çështje të veçanta ka pikëpamje të ndryshme me vijën e përgjithshme të partisë dhe që zhvillon veprimtari të mëvetësishme në parlament dhe në organizata politiko-shoqërore; grupazh. Fraksion parlamentar.
2. Bashkim i fshehtë e i përkohshëm politik, i përbërë nga disa elementë kundërshtarë në gjirin e një partie; grupazh. Fraksion përçarës. U ligjëruan fraksionet.
GRUP,~I m. sh. ~E, ~ET 1. Disa njerëz, kafshë a sende të mbledhur në një vend. Grup fëmijësh. 2. Sende, qenie a dukuri të bashkuara sipas një tipari të njëjtë; tërësia e pjesëve të një makine a të një mekanizmi që kryejnë së bashku një punë, agregat. Grupi i kurrizorëve (zool.). Grupet e muskujve (anat.). Grup gjaku (biol.) një nga katër tipat e gjakut te njeriu dhe te kafshët, me cilësi të veçanta të rruazave të kuqe e të serumit. Grup gjuhësh (gjuh.). Grupi i timonit (mek.).
3. Tërësi njerëzish me pikëpamje, me ide, me qëllime etj. të përbashkëta a me profesion të njëjtë; njerëz të organizuar së bashku, që kryejnë të njëjtën punë a veprimtari. Grup shoqëror. Grup artistik (folklorik). Grupi i punës. Grupe sociale. Grup etnik. Grupi i kontaktit. Grup i strukturuar kriminal. Grup parlamentar. Punë në grup.
4. usht. Njësi ushtarake, zakonisht në artileri, i përbërë prej disa baterish. Komanda e grupit.
5. sport. Numër i caktuar skuadrash që ndeshen midis tyre. Ndeshjet e grupit.
6. si ndajf. Grumbull, tufë. Dolëm grup.
✱Sin.: grumbull, masë, tubë, ekip, skuadër, familje, palë, parti, bllok, kamp, klan, fraksion, rreth, shtresë, njësi, kategori, klasë, kompleks, plejadë, repart, stan, kope, bashkë.
IMUNITÉT,~I m. 1. biol., mjek. Veti mbrojtëse që ka një organizëm për t’u bërë ballë disa mikrobeve ose për të mos u dëmtuar nga disa helme; aftësi mbrojtëse e organizmit për të mos u prekur nga një sëmundje. Imunitet i lindur (i vetvetishëm, i fituar). Imuniteti i fëmijëve. Ka humbur imunitetin. Jep imunitet (sëmundja, vaksina). Fiton imunitet (organizmi).
2. drejt. E drejtë e veçantë që i njihet një përfaqësuesi të huaj me detyrë të posaçme për të mos iu nënshtruar disa ligjeve shtetërore të një vendi; e drejtë që gëzon sipas kushtetutës një deputet ose një person tjetër i zgjedhur në një detyrë të rëndësishme për të mos u arrestuar ose për të mos u ndjekur penalisht pa pëlqimin e organit kompetent; paprekshmëri, pacenueshmëri, padhunueshmëri. Imunitet vetjak. Imunitet diplomatik. Imunitet parlamentar. Imuniteti i banesës. Ka (gëzon) imunitet. I hiqet imuniteti.
3. fig. Aftësia për t’i bërë ballë diçkaje të huaj e të dëmshme dhe për të mos u prekur prej saj, mbrojtje paraprake ndaj çdo gjëje të dëmshme; të qenët i paprekshëm ose i mbrojtur nga diçka e huaj dhe e keqe. Fitoj imunitet.
✱Sin.: mbrojtje, paprekshmëri.
JOPARLAMENTÁR,~E mb. Që nuk është parlamentar; kund. parlamentar. Kryetari i grupit joparlamentar.
LEGJISLATÍV,~E mb. 1. Ligjvënës, që ka të drejtën të nxjerrë a të vendosë ligje. Pushteti legjislativ. Asambleja legjislative. Organet legjislative.
2. Që merret me hartimin e ligjeve, që bën ligje. Veprimtaria legjislative.
✱Sin.: ligjvënës, parlamentar.
LIGJVËNËS,~I m. sh. ~, ~IT 1. Organi më i lartë i pushtetit shtetëror që ka të drejtë të nxjerrë a të vendosë ligje; kuvend, parlament.
2. Ai që merret me hartimin e ligjeve, ai që bën ligjet, legjislator; anëtar i parlamentit, deputet. Ligjvënësit e Kuvendit të Shqipërisë. Kushtetuta kurrsesi nuk mund të miratohet me referendum, por nga një ligjvënës.
✱Sin.: kuvend, parlament, ligjhartues, ligjbërës, ligjtar, kuvendar, parlamentar, deputet.
MANDÁT,~I m. sh. ~E, ~ET 1. drejt. Fuqi e plotë që i jepet dikujt për të ushtruar një detyrë gjatë një kohe të caktuar; dokumenti zyrtar që vërteton këtë të drejtë. Mandat parlamentar. Mandati i deputetit (i përfaqësuesit) fuqia e plotë që zgjedhësit i japin deputetit për t’i përfaqësuar në Kuvendin Popullor; dokumenti përkatës i deputetit. Komisioni i mandateve. Vërtetimi i mandatit. I hoqën mandatin. I zgjati mandatin.
2. hist. E drejtë që u jepte Lidhja e Kombeve disa shteteve anëtare të saj për të administruar disa territore që iu shkëputën fuqive të mundura në Luftën I Botërore. Territore nën mandat. Sistemi i mandateve formë e kamufluar e shtypjes koloniale. Populli shqiptar hodhi poshtë çdo formë mandati mbi Shqipërinë.
NAZIFASHÍZ/ËM,~MI m. Ideologji dhe lëvizje politike që përbuz demokracinë liberale dhe sistemin parlamentar. Koha e nazifashizmit.
✱Sin.: nacional-socializëm, nazizëm, hitlerizëm.
NAZÍZ/ËM,~MI m. Fashizmi gjerman, forma më e egër e diktaturës që u vendos në Gjermani para Luftës së Dytë Botërore; formë fashizmi, që përbuz demokracinë liberale dhe sistemin parlamentar; nacional-socializëm. Nazizmi barbar (gjakatar). Fitorja mbi nazizmin. Çrrënjosja e militarizmit dhe e nazizmit. Luftuan kundër nazizmit. Periudha e nazizmit.
✱Sin.: nacional-socializëm, nazifashizëm, hitlerizëm.
NDËRPARTIÁK,~E mb. Që ka të bëjë, që lidhet me, ose që përfshin dy a më shumë parti, që ekziston midis disa partive. Bashkëpunim ndërpartiak. Grup parlamentar ndërpartiak. Konsensus ndërpartiak.
OBSTRUKSIONÍZ/ËM,~MI m. libr. Formë e luftës politike që kundërshton a pengon zgjidhjen e një çështjeje në parlament, duke mbajtur fjalime të gjata, duke bërë zhurmë për ndërprerjen dhe shtyrjen e punimeve, duke mos marrë pjesë në to etj.; taktika e kësaj lufte për të kundërshtuar e për të penguar zgjidhjen e një çështjeje. Obstruksionizmi parlamentar. Përfiton nga obstruksionizmi dhe vonesat e vazhdueshme.
OPORTUNÍZ/ËM,~MI m., libr. 1. Qëndrim a rrymë politike e ideologjike, që u përshtatet situatave e nevojave të çastit për të nxjerrë sa më shumë përfitime. Oportunizmi i djathtë (i majtë). Oportunizmi ndërkombëtar. Oportunizmi parlamentar.
2. Qëndrimi e sjellja e një njeriu që bën lëshime për të mos u prishur me të tjerët dhe për të përfituar prej tyre a prej rrethanave. Shfaqje oportunizmi. Prirje oportunizmi.
OPOZITARÍZ/ËM,~MI m. Qëndrim ose frymë kundërshtuese ndaj pushtetit, ideve, rrymave apo normave të pranuara; veprimtari ose prirje për të kundërshtuar e kritikuar. Opozitarizëm parlamentar. Bënte opozitarizëm. Opozitarizëm me strategji.
PAÁNSH/ËM (i), ~ME (e) mb. 1. Që nuk i del krah një tjetri pa të drejtë, që nuk i mban anën asnjërës palë; që gjykon me paanësi; kund. i njëanshëm. Njeri i paanshëm. Gjykatës i paanshëm. U tregua i paanshëm. Mision i paanshëm. Proces zgjedhor i paanshëm.
2. Që i paraqit gjërat ashtu siç janë, që nuk është nisur nga paramendimet, nga paragjykimet ose nga interesat vetjak; objektiv; kund. i njëanshëm. Qëndrim i paanshëm. Mendim (gjykim) i paanshëm. Për një gazetari (për një medie) të paanshme. Hetim i paanshëm parlamentar.
✱Sin.: i paanë, asnjanës, i asnjanshëm, i paanë, objektiv.
PARLAMENTÁR,~E mb. 1. Që ka të bëjë me parlamentin, që i përket parlamentit, i parlamentit; që bëhet për të zgjedhur anëtarët e parlamentit. Bisedimet parlamentare. Shumica (pakica) parlamentare. Komision parlamentar. Zgjedhjet parlamentare.
2. Që e ka me parlament sistemin e qeverisjes. Republikë parlamentare. Monarki parlamentare. Me rrugë parlamentare.
PARLAMENTARÍZ/ËM,~MI m. Sistem i qeverisjes me parlament i një shteti, regjim parlamentar.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë