Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
AKRÉP,~E mb., fig. 1. Që është i shkathët, shumë i zoti. Burrë akrep. Grua akrepe.
2. Që është i vrazhdë, i egër, i papërshtatshëm, i pashoqërueshëm (për një njeri). Ai është njeri akrep. Ka shpirtin akrep. Qëndrim akrep.
✱Sin.: i zhdërvjellët, i aftë, i shpejtë, i gjallë, i lehtë, i ashpër, i rreptë, inatçi, inatçor, smirëzi, gjaknxehtë, zemërak, idhnak, i rrëmbyer, i papërmbajtur.
AKSÍ,~E mb. Që është i vrazhdë, i papërshtatshëm, që flet fjalë të rënda, i pashoqërueshëm (për një njeri). Djalë aksi. Plakë aksie. Sjellje aksie.
✱Sin.: i vrazhdë, i ashpër, i rreptë, fjalërëndë, gojëvrazhdë, i papërshtatshëm, i pashoqërueshëm.
CED/ÓJ vep., ~ÓVA, ~ÚAR kal. dhe jokal. 1. zyrt. Tërhiqem a dorëhiqem nga një detyrë a funksion etj. Specialistët që marrin urdhër nga politika, fillojnë e cedojnë. Ka njerëz që cedojnë nga detyrimet e tyre familjare. Shoqata cedoi publikisht nga një premtim elektoral.
2. I jap dikujt të drejtën e një prone a një pasurie. Qeveria nuk pranoi t’i cedojë një pjesë të territorit të vet shtetit fqinj.
3. vet. v. III Pjerr nga njëra anë, anon. Rruga cedon në hyrje e në dalje.
4. fig., vet. v. III Humbet vlerën e vet, ka dobësi, nuk qëndron; është i papërshtatshëm. Projektligji i paraqitur cedon në këtë drejtim. Skema cedon në të gjitha aspektet.
PAADAPTÚESH/ËM (i), ~ME (e) mb. Që nuk është i adaptueshëm; që nuk mund të adaptohet; që nuk është i përshtatshëm, i papërshtatshëm; kund. i adaptueshëm. Instrument i paadaptueshëm.
PABANÚESH/ËM (i), ~ME (e) mb. Që nuk është i banueshëm, që është i papërshtatshëm për të banuar njerëzit; që nuk mund të shërbejë si banesë; kund. i banueshëm. Vend i pabanueshëm. Ndërtesë e pabanueshme.
✱Sin.: i papërshtatshëm, i braktisur, i shkretë.
PADOBÍSH/ËM (i), ~ME (e) mb. 1. Që nuk hyn në punë për asgjë, që nuk është i dobishëm për diçka; kund. i dobishëm. Pjesa e padobishme e ushqimit.
2. Që nuk sjell ndonjë dobi, që nuk ka ndonjë vlerë, i kotë; kund. i dobishëm. Punë e padobishme.
✱Sin.: i padobi, i pavlefshëm, i pavlerë, i papërshtatshëm, i panevojshëm, i tepërt, i pafrytshëm, i pafryt, i pabukë, i pabukshëm, i pagratshëm, i pagrat, i pabulmet, i pabulmetshëm, i paefektshëm, i kotë, bosh, mufkë, tytosh, i zbrazët.
PAFAVÓRSH/ËM (i), ~ME (e) mb., libr. Që nuk është në dobinë e dikujt a të diçkaje, që nuk ndikon për të mirë, që nuk e lehtëson diçka; i papërshtatshëm; kund. i favorshëm. Kushte (rrethana) të pafavorshme.
✱Sin.: i papërshtatshëm, i padobishëm.
PAHÍJSH/ËM (i), ~ME (e) mb. 1. Që nuk është i hijshëm, jo i pashëm; i shëmtuar; kund. i hijshëm. Djalë i pahijshëm. Grua e pahijshme. Pamje e pahijshme.
2. Që është në kundërshtim me normat e përgjithshme të shoqërisë e të mirësjelljes; që është turp ta thuash, ta dëgjosh ose ta bësh; i turpshëm. Sjellje e pahijshme. Qëndrim i pahijshëm. Fjalë (përgjigje) e pahijshme. Punë e pahijshme.
✱Sin.: i papashëm, i palezetshëm, i palezet, i pabukur, i pahije, i shëmtuar, i papëlqyeshëm, i papërshtatshëm, i pakëndshëm, i turpshëm, i pangjashëm, i pamirë, i pacilësueshëm, i papranueshëm, i trashë, i ndyrë.
PAKRAHÚSH/ËM (i), ~ME mb. I papërshtatshëm. Vend i pakrahushëm.
PALUNDRÚESH/ËM (i), ~ME (e) mb. Që është i papërshtatshëm për lundrim, ku nuk mund të kalojnë anijet e mëdha; kund. i lundrueshëm. Lumë i palundrueshëm. Liqen i palundrueshëm.
PAPARAQÍTSH/ËM (i), ~ME (e) mb. 1. Që nuk është i paraqitshëm; jo tërheqës, i pahijshëm; kund. i paraqitshëm. Njeri i paparaqitshëm.
2. Që nuk mund të paraqitet para një grupimi njerëzish, para një jurie etj.; i papërshtatshëm. Material i paparaqitshëm.
PAPËLQÝESH/ËM (i), ~ME (e) mb. 1. Që nuk është i këndshëm për shqisat ose për shijet e njeriut, që nuk pëlqehet, i keq; kund. i pëlqyeshëm. Erë e papëlqyeshme. Me shije të papëlqyeshme.
2. Që është në kundërshtim me normat e përgjithshme të mirësjelljes, i pahijshëm; kund. i pëlqyeshëm. Qëndrim i papëlqyeshëm. Sjellje (punë) e papëlqyeshme. Gjëra të papëlqyeshme.
3. Që është në kundërshtim me dëshirat, me ndjenjat e me mendimet tona, që na sjell diçka të keqe, i padëshirueshëm; kund. i pëlqyeshëm. Me pasoja (rrjedhime) të papëlqyeshme. Ishte në një gjendje të papëlqyeshme.
✱Sin.: i papëlqyer, i pakëndshëm, i pahijshëm, i papërshtatshëm, i palezetshëm, i palezet, i padëshirueshëm, i hidhur, i thartë, i vrazhdë, i ashpër, i egër, jotërheqës, i ulët, i pandershëm.
PAPËRDÓRSH/ËM (i), ~ME (e) mb. Që është në gjendje të keqe ose i papërshtatshëm për ta futur në punë; që nuk mund të përdoret për diçka; kund. i përdorshëm. Enë e papërdorshme. Teprica të papërdorshme,
✱Sin.: batall, i papijshëm, i pangrënshëm, i pakonsumueshëm, i pashfrytëzueshëm, i papërshtatshëm, i pakollajshëm, i pavolitshëm, i vjetruar, i prishur.
PAPËRSHTATSHMËRÍ,~A f., libr. Të qenët i papërshtatshëm; vetia e diçkaje që është e papërshtatshme; mospërshtatje, pavlefshmëri; kund. përshtatshmëri.
✱Sin.: mospërshtatje, keqpërshtatje, pavlefshmëri.
PAPËRSHTÁTSH/ËM (i), ~ME (e) mb. 1. Që nuk është i përshtatshëm për dikë a për diçka; që nuk vlen a nuk bën për një punë, që nuk i ka cilësitë e duhura; kund. i përshtatshëm. Vend i papërshtatshëm. Ndërtesë e papërshtatshme Kushte të papërshtatshme.. Kohë e papërshtatshme. Shok i papërshtatshëm.
2. I papëlqyeshëm, i pahijshëm; kund. i përshtatshëm. Fjalë (shprehje) e papërshtatshme.
✱Sin.: i pavolitshëm, i pafavorshëm, i papëlqyeshëm, i pavlefshëm, i parehatshëm, i papërdorshëm, i pavend, i padobishëm, i pahijshëm.
PAREHÁTSH/ËM (i), ~ME (e) mb., bised. 1. Që nuk i ka kushtet e përshtatshme për të ndenjur, për të pushuar ose për të jetuar; kund. i rehatshëm. Shtëpi e parehatshme.
2. Që bëhet me shqetësime, jo i qetë, i shqetësuar; kund. i rehatshëm. Gjumë i parehatshëm.
✱Sin.: i papërshtatshëm, i shqetësuar.
PAVÉNDSH/ËM (i), ~ME (e) mb. Që s’është me vend të bëhet; jo i duhur, i papërshtatshëm.
PAVLÉFSH/ËM (i), ~ME (e) mb. 1. Që s’ka asnjë vlerë, që s’i plotëson kërkesat e nevojshme për diçka; i papërshtatshëm për diçka; që s’hyn më në punë, i padobishëm; kund. i vlefshëm. Gjë e pavlefshme. Dru i pavlefshëm. Ushqim i pavlefshëm. U bë i pavlefshëm.
2. zyrt., drejt. Që nuk është bërë sipas rregullave, sipas ligjeve etj. të vendosura a që nuk plotëson kërkesat e duhura; që s’është më në fuqi, që s’vlen më e që s’pranohet; kund. i vlefshëm. Autorizim (dokument) i pavlefshëm. Shkresë (fletë votimi) e pavlefshme. E shpallën (e quajtën) të pavlefshëm.
3. Që s’ka ndonjë rëndësi për dikë a për diçka; që nuk sjell ndonjë dobi, i padobishëm, i kotë; kund. i vlefshëm. Veprim (mendim, propozim) i pavlefshëm. Tezë e pavlefshme. Është e pavlefshme.
✱Sin.: i pavlerë, i pavlershëm, i parëndësishëm, i kotë, i batall, i padobishëm, i papërshtatshëm, hulinë, i zgjyrosur, i rrëzuar, skuriq, surrogat, rrozg, rrozgan, i zbrazët, i zhvlerësuar, i varfër, baltë, byk, krimb, beribat, rrangallë, i humbur, vulëhumbur, baltë, zarbë, mizë, leckë, leckaman, zhelan, zhele, i kalbur, i krimbur, i panevojshëm, i papranueshëm.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë