Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
BESËKÉQ,~E mb. 1. Që e shkel fjalën e dhënë, që s'mund a s'duhet t'i zihet besë, i pabesë, besëprerë, besëqen; kund. besëmirë. Njeri besëkeq. Si një vëlla besëkeq. Doli besëkeq.
2. Që e ka të dobët ndjenjën e besimit fetar, që është i lëkundur në besimin e vet fetar; fig., bised. i pafe, i pabesim. Njeri besëkeq.
3. si em. m. e f. Sipas kuptimeve të mbiemrit. S’ka më të lig se besëkeqi. (fj. u.).
MOSBESÍM,~I m. sh. ~E, ~ET 1. Mungesë e besimit te dikush a te diçka, dyshim për vërtetësinë a sigurinë e diçkaje, ngurrim a hezitim për të besuar te dikush a diçka; pabesim; kund. besim. Veprime që rritin mosbesimin. Mosbesim i dyanshëm (reciprok). Mosbesim te shoku (tek të panjohurit). Mosbesim në forcat e veta. Shprehje (shenja) mosbesimi. Tregon (shfaq, shpreh) mosbesim. Përhap (mbjell mosbesim). Flet (pyet) me mosbesim. E sheh (e trajton, e diskuton) me mosbesim.
2. Mungesë dëshire, vullneti a përpjekjesh për të besuar ose për të pranuar diçka si të vërtetë; diçka që nuk e beson si të vërtetë, pabesim. Ata duhet të lirohen nga mosbesime të tilla.
3. fet. Mospasje e një bindjeje të fortë, veçanërisht për çështje fetare; mungesë besimi fetar, pabesim; kund. besim. Mosbesimi në paragjykimet (në një fe, në mrekullitë, në ëndrrat, në besëtytnitë, në forcat e mbinatyrshme, në fatin).
4. Shprehje e mospëlqimit a e mospranimit që të zgjidhet një qeveri e caktuar, duke votuar kundër; kund. besim. Votë mosbesimi.
✱Sin.: skepticizëm, mospëlqim, dyshim, mospranim, pabesim.
PABESÍ,~A f. sh. ~, ~TË 1. vet. nj. Të qenët i pabesë, qëndrim i pabesë ndaj dikujt a diçkaje; tradhti. Pabesia e armikut. Ia punoi në (me) pabesi.
2. Veprim i pabesë; shkelje e besnikërisë bashkëshortore. Pabesitë e armikut.
3. vet. nj. Mungesë besimi, mosbesim.
✱Sin.: pabesëri, besëprerje, tradhti, ladutëri, pabesim, njimti, thikashpinë, pusi, mosbesim, pandershmëri, dinakëri, fshehtësi, fshehuri.
PAFÉ (i, e) mb. 1. Që nuk beson në fe, që nuk pranon asnjë fe. Njeri i pafe.
2. hist. Që hiqte dorë nga feja sunduese dhe që për këtë ndiqej nga përfaqësuesit e saj, heretik. E shpalli të pafe. I ndiqnin si të pafe.
3. fig. bised., vjet. I pabesë. Njeri i pafe.
✱Sin.: i pabesim, afetar, heretik, i pabesë.
TRADHTÍ,~A f. 1. Veprimtari në dëm të interesave të kombit, të atdheut, të popullit etj., duke u bashkuar me armikun ose duke bërë punën e tij; cenim i interesave themelore të kombit, i kryer nga një vendës; shkelje e betimit për mbrojtjen e interesave të atdheut. Tradhti e lartë. Tradhti e hapur. Tradhti ndaj atdheut (ndaj popullit).
2. Shkelje e besës a e fjalës së dhënë; prerja në besë. Tradhti ndaj mikut.
3. Qëndrim jobesnik, gjatë jetës bashkëshortore, shkelje e besës a e besnikërisë bashkëshortore (për bashkëshortët a të dashurit), shkelje kurore. Tradhtia ndaj burrit (ndaj gruas). Tradhti bashkëshortore.
✱Sin.: spiunim, spiunazh, pabesi, besëshkelje, besëprerje, kobitje, pabesim, kob.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë