Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
NDÍEJ vep., NDJÉVA, NDÍER kal. 1. psikol. Kap me anë të shqisave ngacmimet dhe dukuritë e botës së jashtme; ndijoj. Ndiej shijen (erën). Ndiej cicërimat e zogjve. Ndiej puhinë erëmirë. Ndien të ftohtët.
2. Kap tingujt me vesh; dëgjoj. Nuk ndien mirë. I ndjeu zërin. E kam ndier nga të tjerët. Të ndjefsha të mirën! (ur.) Ndjefsha mirë për ty! (ur.) Të ndjefsha zërin e mirë! (ur.)
3. Provoj në të gjithë trupin ose në një pjesë të tij një gjendje fizike të caktuar. Ndiej dhembje. Ndiej të ftohtë. Ndien lodhje (këputje, rraskapitje). S’i ndiej gjunjët (kurrizin) më janë bërë si të huaj nga lodhja. E ndien veten mirë (keq). E ndjeu veten lehtë (rëndë, të fortë, të përtërirë). S’e ndiem rrugën nuk u lodhëm gjatë ecjes ose gjatë udhëtimit. E kam ndier në kurrizin tim.
4. Kap me anë të shqisave në përgjithësi a me anë të intuitës një dukuri nga bota që na rrethon; vë re, nuhat, kuptoj. Ndiej prishjen e motit. Kafshët e ndiejnë më shpejt tërmetin. Pa e ndier fare. E ndjeu që po binte (po rrëzohej). S’e ndiem beharin (dimrin) nuk pati verë shumë të nxehtë (dimër shumë të ftohtë).
5. Provoj një ndjenjë a një gjendje shpirtërore, kam. Ndiej kënaqësi (mërzi, bezdi). Ndien gëzim (hidhërim, pezmatim). Ndiente urrejtje. Ndien një dëshirë. Ndiente frikë. Ndien neveri (krupë). Nuk ndien asgjë për të nuk e do, nuk e dashuron.
6. Kuptoj pasojat e një veprimi, prekem moralisht për diçka; kam vetëdije për një gjendje. Ndien përgjegjësi. E ndjeu gabimin. E ndiente veten fajtor. E ndien veten borxhli. E ndiej veten ngushtë (pisk). E ndien nevojën (mungesën) për diçka. E ndien për detyrë. E ndien thellë. Ndjeu mbi shpinë pasojat e luftës.
7. Jam në gjendje të shijoj të bukurën, e cila më bën përshtypje të thellë. E ndien muzikën (poezinë). E ndien natyrën.
8. Kuptoj me anë të intuitës; e kuptoj nga disa shenja të jashtme se po ndodh diçka, parandiej. E ndiente ftohtësinë e tij. E ndiente se po afrohej rreziku. E ndjeu si do të përfundonte.
9. (me pjesëzat mohuese nuk, s, mos). S’dua t’ia di për diçka, s’më bën përshtypje; s’pyes, nuk shqetësohem për dikë a për diçka. S’ndiej për të. Hiç mos ndiej! mos u shqetëso!, mos pyet fare! S’ma ndien për të as që dua t’ia di për të.
✱Sin.: ndijoj, dëgjoj, provoj, vërej, nuhas, nuhurit, përjetoj, kuptoj, prekem, shijoj, parandiej, kam.
♦ Ma ndien (ma zë, ma kap, ma heq) *hunda (diçka). Ia ndiej *lezetin (diçkaje). E ndjeu *Perëndia (dikë) lart. Ma ndien (ma thotë, ma ndjell) *zemra (diçka).
NDJEK vep., NDÓQA, NDJÉKUR kal. 1. Shkoj prapa dikujt a prapa diçkaje për ta kapur, i vihem pas për ta zënë ose për ta dëmtuar a për ta asgjësuar. Ndjek ujkun. Ndjek gjakun. Ndjek armikun (keqbërësin). E ndoqi këmba-këmbës. E ndjek nga pas. I ndoqi deri larg.
2. Eci pas dikujt a pas diçkaje që prin, i shkoj prapa pa iu ndarë. Qeni e ndjek të zotin. Ndoqëm udhërrëfyesin. Ndjek gjurmën. Ishte lodhur e nuk e ndiqte dot nga pas.
3. Eci në një rrugë, në një shteg a në një drejtim të caktuar. Ndoqën rrjedhën e lumit. Ndoqën vazhdën e gjurmëve.
4. fig. Zbatoj një mënyrë a një metodë të caktuar, eci sipas ideve a sipas parimeve specifike. Ndjek një rrugë të drejtë (të gabuar). Ndjek një politikë të drejtë.
5. Shoqëroj veprimet e një tjetri, e dëgjoj çfarë thotë ose përsërit atë që bën dikush tjetër. Ndjek fillin e mendimeve të dikujt. Nxënësit ndiqnin leximin e mësuesit. Nuk po më ndjek me vëmendje.
6. fig. Veproj ose sillem sipas shembullit të dikujt, e kam si udhëheqje a si udhërrëfyes; Ndjek këshillat e dikujt. Ndjekin modën. Ndjek shembullin e më të mirëve. Ndoqën rrugën e të parëve të tyre.
7. Lexoj, dëgjoj a shikoj rregullisht veprimtarinë apo aktivitetet e një shkrimtari, gazetari, këngëtari, të një emisioni etj. Ndjek emisionin tim të preferuar. Ndjek dikë në rrjetet sociale.
8. Jam pasues a përkrahës i dikujt a i diçkaje, jam ithtar. Ndjek një rrymë politike (filozofike, artistike etj.).
9. Vështroj diçka që lëviz, e shoqëroj me shikim. Ndjek me sy. E ndoqi deri sa u zhduk nga sytë.
10. Shoh ose dëgjoj një shfaqje, një program etj. Ndjek një ndeshje (një lojë). Ndjek punimet e një konference. E ndoqi deri në fund.
11. fig. Mbikëqyr vazhdimisht për të parë si ecën e si zhvillohet diçka; kujdesem vazhdimisht për mbarëvajtjen e diçkaje, kam përsipër një punë për ta çuar deri në fund; shoh. Ndjek një çështje. Ndjek zbatimin e një projekti. Ndjek ecurinë (frekuentimin) e nxënësve. Ndjek zhvillimin e ngjarjeve. Ndjek me vëmendje (me kujdes, me interesim, me kënaqësi, me padurim, me ankth) diçka.
12. fig. Synoj të arrij diçka. Ndjek një qëllim (një objektiv).
13. Shkoj rregullisht në një shkollë a diku tjetër për të mësuar; vijoj. Ndjek shkollën (kursin). Ndjek mësimet (studimet). Ndjek një trajnim online. Ndjek klasën e parë.
14. bised. Dëboj; përzë. E ndoqën nga puna. E ndoqi nga shtëpia. I ndoqëm pushtuesit e huaj. Ndiqi ato mendime nga koka!
15. jokal., vet. v. III Vjen në radhë pas dikujt a pas diçkaje, pason. Në kapitujt që ndjekin. Bibliografia që ndjek përfundimet, është shumë e pasur.
✱Sin.: ndehem, pilohem, qepem, gjurmoj, ith, shkreh, gjëmoj, nuhurit, hetoj, shoqëroj, dëgjoj, përsëris, veproj, sillem, vijoj, shkoj, pasoj, përkrah, vështroj, sodis, frekuentoj, përcjell, vëzhgoj, vij, shoh, shikoj, mbikëqyr, trajtoj, synoj, dëboj, përzë, shkul, përndjek.
♦ E ndjek në çdo çap (në çdo *hap) (dikë a diçka). Ndjek *gjurmët (e dikujt). E ndjek *gjurmë për gjurmë (gjurmë pas gjurme) (dikë a diçka). E ndjek *hap për (më) hap (dikë a diçka). E ndjek *hap pas hapi (dikë a diçka). Ndjek një *hulli. As të *prin e as të ndjek (dikush). Ndjek *rrugën (udhën) (e dikujt). Ndjek udhën (*rrugën) (e dikujt).
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë