Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
DHJÉTËSH,~E mb. 1. Që përbëhet nga dhjetë njësi, pjesë, sende etj., që ka një pjesë me dhjetë njësi. Strofa dhjetëshe strofa me dhjetë vargje. Revole dhjetëshe revole me dhjetë fishekë.
2. Që ka përmasa ose vlerë prej dhjetë njësish. Shkronja dhjetëshe. Teksti duhet të jetë me shkronja dhjetëshe. Dallimi i numrave njëshe dhe dhjetëshe. Xham dhjetësh.
DHJÉTËSH/E,~JAI f. sh. ~E, ~ET 1. mat., kryes. sh. Njësi e rendit të dytë në sistemin dhjetor të numërimit që përbëhet nga dhjetë njëshe; shifër që shënon këtë njësi e që shkruhet para njësheve të një numri, shifër e parafundit në klasën e parë a në klasën e njësheve. Dhjetëshe të plota. Dhjetëshet, qindëshet dhe mijëshet e një numri. Radha e dhjetësheve. Pjesëtoj dhjetëshet e plota me njëshet. Numërimi me dhjetëshe të plota.
2. Tërësi e përbërë nga dhjetë njësi, grup i përbërë nga dhjetë qenie ose sende. Dhjetëshja e parë. Dhjetëshja më e mirë. Dhjetëshja më e pasur e botës. Plotësohet dhjetëshja e skuadrave të Superiores. Dhjetëshja e lojtarëve më të shtrenjtë.
3. shtypshkr. Shkronja dhjetëshe. Dhjetëshe të drejta (të holla). Dhjetëshe të zeza. Shkruaj me dhjetëshe.
NJË́SH/E,~JA f. sh. ~E, ~ET 1. Enë që nxë një njësi. E bëri kafen në njëshe.
2. Dhomë me një shtrat për një njeri. Njëshet janë zënë.
3. Këngë në një zë. Ia mori një njësheje.
4. mat., sh. Numrat nga një deri në nëntë, që formojnë shtyllën e parë nga e djathta në numrat me shumë shifra. Mbledhim njëshet. Shtylla e njësheve. Veprimet me njëshe.
NJËSÍ,~A f. sh. ~, ~TË 1. Numri më i vogël në vargun e numrave natyrorë; madhësia që përfaqëson ky numër. Katra ka katër njëshe ose katër njësi. Shtoj (heq) disa njësi. Është tetë njësi më i madh.
2. Madhësi që merret si bazë për të numëruar ose për të matur madhësi të tjera të një fare. Njësi themelore (bazë). Njësi elektrike (magnetike) (elektr.). Njësi këndore (mat.). Njësi lëvizore (spec.). Njësi termike (spec.). Njësi e prejardhur (spec.). Njësi e rendit të dytë (mat.) dhjeta. Njësi e rendit të tretë (mat.) njëqind. Njësi hamullore (bujq.). Njësia jonë monetare. (fin.) leku. Njësi ushqimore (spec.). Njësi gjatësie (vëllimi, peshe). Njësi prodhimi (ek.). Njësi matjeje. Njësi pune (spec.). Njësi toke (bujq.). Njësitë e masës (e peshës) (fiz.). Njësia e kohës (fiz.). Njësitë e sipërfaqes. Sistemi ndërkombëtar i njësive.
3. Individ, grup, strukturë ose një entitet tjetër i konsideruar si përbërës strukturor ose funksional i një të tëre.
4. usht. Formacion i madh ushtarak, që përbëhet nga disa reparte (batalione, grupe etj.) a nga disa brigada të një arme ose të armëve të ndryshme dhe që kryen detyra të caktuara luftarake; formacion i vogël ushtarak që kryen një detyrë të veçantë. Njësi ushtarake. Njësi tokësore (detare, ajrore). Njësi partizane. Njësi të zgjedhura. Njësi luftuese. Njësi tankiste. Njësi të specializuara. Njësi të motorizuara. Njësi operative (taktike). Njësi gjitharmëshe. Njësi të flotës (të aviacionit). Njësi e nëndetëseve. Njësi raketash. Njësi patrullimi. Njësi të vetëmbrojtjes.
5. Dyqan i veçantë ku shiten, ku grumbullohen a ku ndreqen sende lë ndryshme. Njësi tregtare (ushqimore, industrial). Njësi shërbimi. U hapën njësi të reja.
6. Ndarje gjeografike, administrative, ekonomike etj., që bën pjesë në një të tërë. Njësi gjeografike (territoriale). Njësi administrative. Njësi ekonomike.
7. Të qenët i bashkuar si një gjë e vetme, të qenët i pandashëm, të qenët një; të qenët i njëjtë a shumë i ngjashëm; lidhje e ngushtë dhe e pandashme ndërmjet njerëzish, gjërash etj.; përbashkësi. Njësia ekonomike. Njësia politike. Njësia kombëtare. Njësia e mendimit dhe e veprimit. Njësi pikëpamjesh. Njësi veprimesh.
8. Të qenët i njësuar, i përgjithshëm e i përbashkët, të qenët një për të gjithë. Njësia e gjuhës u konsiderua arritje kulturore. U punua për njësinë e normës gjuhësore (e drejtshkrimit).
9. gjuh. Element bazë në sistemin e gjuhës ose në nënsistemet e saj. Njësi fonetike (fonologjike, sintaksore, leksikore, frazeologjike). Parashtesat dhe prapashtesat e fjalëve janë njësi të fjalëformimit.
10. Vijimësi e pandërprerë dhe e rregullt në ndërtimin e në thurjen e një vepre letrare, shtjellim i ngjarjeve i lidhur si duhet etj.; lidhje e ngushtë e shkrirje e harmonishme e elementeve rreth një ideje, rreth një çështjeje themelore në një vepër letrare, shkencore etj. Njësia e ndërtimit. Njësia e veprimit. Njësia e veprës.
✱Sin.: unitet, përbashkësi, njëjësi, barazi.
PJESËTÍM,~I m. sh. ~E, ~ET 1. Veprimi kur pjesëtoj ose kur pjesëtohet diçka. Pjesëtimi i pasurisë. Pjesëtimi i të hollave. Pjesëtimi i fondeve.
2. mat. Një nga katër veprimet themelore, që bëhet për të gjetur sa herë ndahet një numër në pjesë të barabarta ose sa herë përmbahet një numër te një tjetër. Pjesëtim i plotë. Pjesëtimi me njëshe (me dhjetëshe). Pjesëtimi i dy numrave. Shenjat e pjesëtimit. Tabela e pjesëtimit. Prova e pjesëtimit. Bëjmë pjesëtim.
✱Sin.: ndarje, përpjesëtim, plotpjesëtim.
TÉK/E,~JAII f. sh. ~E, ~ET bised. 1. Sasia më e vogël e një pijeje alkoolike (raki, konjak, fërnet, ponç, vodkë etj.) që jepet me gota në një bufe, në një restorant etj. (rreth 5 cl (50 gr); gotë e vogël që nxë këtë masë pijeje; njëshe. Një teke raki (konjak). Porositi (rrëkëlleu, mori) një teke. Piu një teke. I mbushi një teke. Një dopio është e barabartë me dy teke. Dehet me teken e parë.
2. Kokërr. S´të jep sikur një teke arrë.
3. vulg. Marrëdhënie seksuale (nëpër shprehje). I futi një teke. I hoqi një teke. Bëri një teke kapi, zuri, palloi (një femër).
✱Sin.: gotë, njëshe, kokërr.
XHÉZV/E,~JA f. sh. ~E, ~ET 1. Enë e vogël prej metali, me bisht të gjatë e zakonisht me grykë të ngushtuar, që përdoret për të bërë kafe, për të zier qumësht a vezë etj. Xhezve e madhe (e vogël). Xhezve njëshe (dyshe). Xhezve elektrike. Xhezve bakri (alumini). Bishti i xhezves. Vë xhezven në zjarr. Ziej në xhezve.
2. krahin. Gryka e kacekut nga del ajri për t’i fryrë zjarrit.
✱Sin.: bishtarake, bishtore, ceke, kokme.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë