Fjalori

Rezultate në përkufizime për “nistor”

Mëso si ta përdorësh
<<< Kthehu te kërkimi kryesor në fjalor

ASPIRIM

ASPIRÍM,~I m. 1. Dëshirë e madhe për të arritur diçka. Aspirim për postin e kryeministrit. Aspirim për të studiuar mjekësinë.
2. mjek. Procesi i thithjes ose i largimit të lëngjeve, të gazrave ose të lëndëve të tjera nga trupi i njeriut përmes një pajisjeje thithëse ose një aspiratori, që përdoret në situata të ndryshme mjekësore. Aspirimi i rrugëve të frymëmarrjes. Aspirim diagnostik. Aspirimi kirurgjikal. Proces i aspirimit. Pajisje e aspirimit. Kreu procedurën e aspirimit. Aspirimi me gjilpërë për të marrë mostra tumorale.
3. gjuh. Frymëtim; shqiptimi i disa bashkëtingëlloreve i shoqëruar ne një rrymë të lehtë ajri. Aspirim i brendshëm. Aspirim nistor.
4. tek. Thithja e ajrit ose e gazrave në një sistem ose në një pajisje si në rastin e motorëve me djegie të brendshme, ku ajri aspirohet në cilindrat e motorit për t’u përzier me karburantin. Procesi i aspirimit të ajrit.
✱Sin.: përpjekje, përkushtim, dëshirë, qëllim, synim, mëtim, gjakim, aspiratë.

FILLESTAR

FILLESTÁR,~E mb. 1. Që ka të bëjë a që lidhet me fillimin, që i përket fillimit, i fillimit; që bëhet në fillim; që shërben si fillim; i parë. Shënoj të dhënat fillestare. Faza fillestare. Shpejtësi fillestare.
2. Që sapo e ka nisur një punë, një mjeshtëri etj., që është në hapat e parë të një pune a të një veprimtarie; që nuk ka shumë përvojë në një punë. Kamerier fillestar. Mjek fillestar.
3. Që është i thjeshtë, që është më i domosdoshëm për të njohur diçka a për të filluar një punë; i parë. Rregulla fillestare. Kam njohuri (shprehi) fillestare.
4. Që është forma e parë e zhvillimit të diçkaje; që merret si bazë e krijimit a e zhvillimit; origjinar. Lënda fillestare. Lloji fillestar.
5. Që nuk është përfundimtar; paraprak. Komunikim fillestar.
✱Sin.: i parë, nistor, zanafillës, fillimor, fillimtar, fillues, elementar, origjinar, paraprak.

FILLOR

FILLÓR,~E mb. Që është në ciklin e parë të shkollimit, ku jepen e merren njohuritë e para të dijes. Shkollë fillore. Kreu arsimin fillor.
✱Sin.: elementar, nistor.

JONISTOR

JONISTÓR,~E mb. Që nuk është nistor. Tingull jonistor.

NISTOR

NISTÓR,~E mb. 1. Që gjendet në fillim, i fillimit. Zanore (bashkëtingëllore, shkronjë) nistore. gjuh. zanore që ndodhet në fillim të fjalës a të rrokjes. Tingull nistor (gjuh.).
2. vjet. Fillor. Shkollë nistore shkollë fillore.
✱Sin.: fillor, fillestar, burimor.

Ky fjalor është domosdoshmëri për shkrimtarët e për publicistët, për shkollarët e për studentët, për mësuesit e për pedagogët, për studiuesit e për këdo që merret me përdorimin e kultivimin e gjuhës amtare.

Ai u vjen në ndihmë gjithë atyre që merren veçanërisht me gjuhën e shkruar, por edhe të folur, me krijime e me përkthime, me hartimin e fjalorëve të tipave të ndryshëm etj.

...lexo më tepër.


© Akademia e Shkencave e Shqipërisë, 2026 — Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.

www.akad.gov.al
Adresa: Sheshi "Fan Noli", Tiranë