Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
FSHÉS/Ë,~A f. sh. ~A, ~AT 1. Përdorëse me melekuqe, me fije bimësh të tjera a sintetike ose me degë të holla shkurresh që shërben për të fshirë truallin, oborrin, shtëpinë etj. Fshesë melekuqeje (bari, shqope). Fshesa e re fshin më mirë (fj. u.).
2. Aparat i posaçëm elektrik që përdoret për të thithur pluhurin në dhoma e në vende të tjera, për të pastruar mobiliet, raftet me libra, veshjet etj. Fshesë elektrike (me korent, automatike).
3. Tufë kashte me një bisht, që përdoret zakonisht nga farkëtari për të mbledhur zjarrin dhe për ta spërkatur atë me ujë. Fshesë zjarri. Fshesa e farkëtarit.
4. bot. Melekuqe. Mbjellin fshesë. Korrin fshesën.
5. bot. Pjesë e parë e emërtimeve të pathjeshta që tregojnë lloje të ndryshme bimësh barishtore ose shkurresh etj. Fshesa e butë (lat. Erica scoparia). Fshesa dredhake (lat. Limonium anfractum, Statice anfracta). Fshesa e dunave (lat. Parryella filifolia). Fshesë deti (lat. Phaeophyceae) grup algash me ngjyrë jeshile të errët në kafe. Fshesë e egër (lat. Anthyllis) bimë barishtore ose shkurre e ulët e familjes së bishtajoreve e përhapur në disa vende të Evropës dhe në kontinente të tjera. Fshesë e qershisë tufë e dendur degësh që del në trungun e qershisë e të vishnjës (bujq.).
6. Fshirje me fshesë. I dha (i shkoi) një fshesë dhomës (shtëpisë, oborrit) e fshiu shpejt e shpejt.
✱Sin.: kashtare, netull, shqopë, melekuqe.
♦ E ka bërë fshesë (dikë) mospërf. nuk ka respekt dhe e trajton shumë keq dikë, e ul e s’e përfill fare; e merr nëpër këmbë. I ra fshesa (dikujt a diçkaje) u hoq nga një vend a nga një detyrë dikush, u shkurtua, u largua; u spastrua diçka, u pakësua a u hoq fare; i ra gërshëra. *Bishti i fshesës. Me fshesë të hekurt libr. me ashpërsinë më të madhe, në mënyrën më të rreptë e më të egër; rrënjësisht. Fshesë e re dikush që sapo ka filluar të punojë dhe është shpejt për ta vlerësuar punën e tij; njeri që në fillim mund të punojë mirë, por s’dihet si do të punojë më vonë. Unë për *lisa e ti për fshesa! iron. I vuri fshesën përb. 1. (dikujt). E përzuri, e dëboi; e shkurtoi. 2. (diçkaje). E zhduku fare, e spastroi, e përlau; e fshiu (e zhduku) nga faqja e dheut (diçka); i vuri fugën.
MËRSÍN/Ë,~A f. sh. ~A, ~AT bot. 1. (lat. Myrtus communis) Shkurre me gjethe të imta me majë të mprehtë e përherë të gjelbra, me lule të bardha që bëjnë kokrra të vogla të ngrënshme ngjyrë blu, nga degët e së cilës kullon një lëng me erë të mirë; netull. Mërsina është përdorur për kurimin e shumë sëmundjeve. Shkoi në mal e solli degë mërsine. Kokrra mërsine. Erë mërsine. Mërsinë mali qershigël, rrush thëllëze.
2. (lat. Myrtus cerifera) Pjesë e parë e emërtimit për një lloj mërsine të njohur si mërsina e dyllit ose mërsina dyllëmbajtëse, frutat e së cilës përdoren si burim për të bërë dyllë, kryesisht për qirinj dhe dekorime tradicionale.
3. (lat. D. Oleoides) Pjesë e parë e emërtimit për një lloj mërsine të njohur si mërsina e malit; xerxele, xerxele si ulli, bar thëllëze, qershi e egër, rrush thëllëze, xerxele gjetheulliri, xerxele fletulliri.
✱Sin.: netull, xerxele.
NÉTULL,~A f. sh. ~A, ~AT 1. bot. Bimë e egër barishtore dyvjeçare, që rritet deri në një metër e gjysmë, me gjethe si të lëpjetës, me kërcell të fortë e me lule të vogla e të verdha në formë vileje, fijet e së cilës përdoren për të bërë fshesa.
2. bot. (Myrtus communis) Mërsinë. Ha netulla. Fshesë netulle.
3. krahin. Fshesë. Fshij me netull.
4. Ana e pëlhurës, e endur në mënyrë që të mos i dalin fijet, palë e rrobës. Pres netullën.
✱Sin.: fshesë, mërsinë, palë, melekuqe.
SHIMSHÍR,~I m. sh. ~Ë, ~ËT [SHEMSHÍR,~I] bot. 1. (lat. Buxus sempervirens L.) Shkurre me gjelbërim të përhershëm. Çibuk shimshiri. Shtëpi e rrethuar me shimshir. Krasit shimshirin. Gërshërë për shimshir.
2. bot. (lat. Salix) Lloj shelgu.
3. (lat. Myrthus communis) Shkurre ose dru me gjelbërim të përhershëm, me gjethe përgjatë gjithë degëve, që përmbajnë një lloj vaji aromatik, me lule të bardha me ngjyrim të kuq, që lidhin kokrra të vogla që nxihen kur piqen; mërsinë, mente.
✱Sin.: bush, bushk, kastër, pikës, mërsinë, mente, merët, lestine, cimarte, netull.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë