Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
►MBÝLL/EM jovep., ~A (u), ~UR 1. vetv., vet. v. III Lëviz vetë dhe afrohet a puthitet në vendin e hapur për kalim ose për punë të tjera (për një derë, një kanat, një kapak etj.); zihet me diçka që e mbyll; kund. hapet, çelet. U mbyll dera (dritarja). U mbyllën kanatet. U mbyll valixhja. Mbyllet vetë.
2. vetv. Futem a rri diku brenda, nuk dal jashtë, sepse merrem me diçka pa ndërprerje e me këmbëngulje; rri për një kohë të gjatë në një mjedis të mbyllur; ngujohem, ndryhem. U mbyll në shtëpi (në zyrë, në laborator, në bibliotekë). Mbylleshin në kulla për shkak të hakmarrjes. Armiku u mbyll në qytet.
3. vetv., vet. v. III Bashkohet, puthitet ose afrohet me një pjesë tjetër a me pjesën kryesore (për diçka që është e hapur); paloset, mblidhet (për diçka që është e shtrirë); kund. hapet. Mezi i mbylleshin gishtat. Iu mbyllën sytë (qepallat). Nuk mbyllet çadra.
4. vetv., vet. v. III Zihet vetë me diçka, mbushet (një e çarë, një vrimë, një gropë etj.); mbulohet. U mbyllën vrimat (plasat). U mbyllën gropat. U mbyll plaga zuri dregëz e u përtha, u shërua.
5. vetv., vet. v. III Ndërpret veprimtarinë e vet (një ndërmarrje, një institucion etj.); nuk punon më për një kohë a përgjithnjë; kund. hapet; çelet. Marketet (dyqanet) mbyllen vonë në mbrëmje. Shkollat mbyllen në fund të qershorit dhe çelen me 1 shtator. U mbyll ekspozita. U mbyllën shumë sipërmarrje.
6. vetv., vet. v. III Ndërpritet diçka, merr fund, nuk vijon më tej; mbetet me aq, nuk i shtohet me gjë tjetër. U mbyll mbledhja (konferenca). U mbyllën diskutimet. U mbyll ajo çështje.
7. fig., vetv. Rri i veçuar nga të tjerët, nuk shoqërohem a nuk përzihem me ta; nuk u hapem të tjerëve; merrem me një punë të kufizuar duke iu kushtuar tërësisht asaj, duke lënë punët e tjera e duke mos u shqetësuar për asgjë tjetër. Është mbyllur në vete (në vetvete). U mbyll vetëm në punën e tij.
8. vetv., vet. v. III Mbushet një kohë e caktuar, merr fund, i vjen fundi, mbaron. U mbyll java. Pa u mbyllur mirë viti.
9. vetv., vet. v. III Nxihet, erret; vrenjtet (për motin); ngryset. U mbyll moti. U mbyll fare dielli.
10. pës. e MBYLL.
✱Sin.: kyçet, bllokohet, ndryhem, ngujohem, mbushem, ndërpritet, ndalet, ndrydhem, mbaron, përfundon, vrenjtem, përthahet.
♦ Iu mbyll *dera (dikujt). T’u mbylltë *dera (t’u mbylltë)! mallk., edhe shak. S’i mbyllet (s’i rri) *goja (dikujt). M’u mbyll *plaga. Më mbyllen *sytë. Iu mbyll *shtëpia (dikujt). Mbyllem në *vetvete.
MSHEL vep., ~A, ~UR kal. 1. Mbyll; kund. hap, çel. Mshel derën (dritaren). E ka mshelur shtëpinë me dry. I msheli pulat në kotec. Ma keni mshelur derën e shtëpisë (edhe fig., nuk më pranoni më në shtëpi). E kam mshelur llogarinë bankare. I msheli sytë (edhe fig., i mbylli sytë, vdiq).
2. Mbyll me kyç a me çelës, kyç. E kam mshelur derën me çelës.
3. Mbuloj (me dhe, me kapak etj.) E mshelën varrin.
4. E fus në burg, e mbyll në izolim; kund. nxjerr; liroj. U munduan t'i mshilnin në burg.
5. entogr. Mbyllem brenda banesës dhe nuk dal për një kohë të caktuar, ngujohem, ndryhem.
6. I jap fund; nuk e vazhdoj më; e përfundoj, e mbyll; kund. hap, çel. Ti e di çfarë gabimi ke bërë, por unë dua ta mshel. E msheli debatin. E mshelën projektin. E mshelëm edhe këtë vit. Mshele gojën e mos llomotit kot! (fig.) mos vazhdo të flasësh, mbylle gojën.
7. fig. Mbyll mendjen a zemrën; kund. hap, çel. E msheli zemrën dhe nuk dashuroi më.
►MSHÍLEM jovep., MSHÉLA (u), MSHÉLUR
1. etnogr., vetv. Ngujohem, ndryhem. U mshel prej hasmërisë.
2. fig., vetv. Mbyllem në vetvete. U mshel djali, nuk e dimë çfarë ka.
3. pës., vet. v. III e MSHEL. U mshel dera. U mshel një projekt i madh. U mshelën dyert e bashkëpunimit. Ventilator që mshilet. U mshel firma (kompania).
►NDRÝDH/EM jovep., ~A (u), ~UR 1. vetv., vet. v. III Del nga vendi, përdridhet (për gjymtyrët). M’u ndrydh këmba (dora).
2. fig., vetv. Mbyll në vetvete ndjenjat a mendimet nga druajtja, nga turpi a nga frika; mbyllem në vetvete. Është ndrydhur në vetvete. Vajza u ndrydh.
3. vetv. Rrudhem; vrenjtem, ngrysem. Babai u ndrydh në fytyrë.
4. pës. e NDRÝDH. Brumi ndrydhet dhe lihet të vijë.
✱Sin.: ngjeshëm, përndrydhet, përdridhet, ndërliket, shtrydhem, rrudhem, vrenjtem, ngrysem, topitem, shtypem, mbyllem, ndryhem, nënshtrohem, tulatem.
♦ M’u ndrydh *zemra.
►NGUJ/ÓHEM jovep., ~ÓVA (u), ~ÚAR 1. vetv. Mbyllem brenda në një kullë, kështjellë etj. për t’u mbrojtur a për të luftuar; mbetem i mbyllur diku. Ngujoheshin ndër kulla. U ngujuan në kala (në kështjellë). U ngujuan për luftë. - Mos u ngujo në shtëpi! mos qëndro vazhdimisht brenda, pa lëvizur nga shtëpia.
2. vetv. Mbyllem brenda për një kohë të gjatë për t’u ruajtur nga gjakësi. U ngujua për dhjetëra vite. U ngujuan të dy djemtë e familjes.
3. vetv. Ngulem në një vend të përshtatshëm e nuk shkulem që aty, zë vend mirë. U ngujuan në një pritë (pas një shkëmbi). U ngujuan në rrëzë të kodrës.
4. vetv., vet. v. III Bllokohet (një vegël etj.). I është ngujuar pushka.
5. vetv. I fiksohet dikujt diçka; i bëhet fiksim. I është ngujuar të shkojë në atë vend.
6. pës. e NGUJÓJ. Gjakësia ia ngujoi djemtë.
✱Sin.: mbyllem, kyçem, kyçosem, ndryhem, ngulem, bllokohet, fiksohem, gozhdohem, mbërthehem.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë