Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
NATYRALIZÚAR (i, e) mb. 1. Që lidhet me një bimë a me një kafshë të stabilizuar mirë në një areal ose në një sipërfaqe të caktuar, pasi është ndërfutur prej një vendi tjetër, që riprodhohet lirshëm dhe ruan pozicionin e saj në konkurrencë me bimët apo me kafshët vendase; kund. i çnatyralizuar. Bimë (kafshë) e natyralizuar. Speciet e natyralizuara.
2. I përshtatur mirë me kushtet e reja në një vend tjetër, me mjedisin social të atij vendi. Emigrantë të natyralizuar.
NDËRFÚTUR (i, e) mb., libr. 1. Që ka hyrë ndërmjet dy gjërave të tjera ose ndërmjet pjesëve të diçkaje; i ndërkallur. Një shërbim i ndërfutur në ekzekutivin e qytetit. Fjali e ndërfutur (gjuh.) fjali e vendosur ndërmjet gjymtyrëve të një fjalie tjetër.
2. Që vendoset ose që shtohet si pjesë e një kompleti, grupi ose kategorie.
3. Që lidhet me një specie bimore në një zonë të caktuar, që nuk është pjesë e florës origjinale, por e sjellë prej njeriut nga një rajon gjeografik tjetër. Shafrani është bimë e ndërfutur.
✱Sin.: i ndërkallur, i pykëzuar.
NDËRKÁLLUR (i, e) mb. I ndërfutur. Fjali e ndërkallur (gjuh.).
NDËRMJÉT/ËM (i), ~ME (e) mb. 1. Që ndodhet në mes të dy gjërave a të dy njerëzve, midisës, i midistë. Dhoma e ndërmjetme. Kat i ndërmjetëm. Çmim i ndërmjetëm. Rol i ndërmjetëm.
2. Që zë një vend kalimtar midis dy gjërave a midis dy dukurive, që shërben si pikë lidhjeje në mes të dy gjërave a dy dukurive; që është në mes të dy anëve të kundërta. Hallkë e ndërmjetme. Qëndrim i ndërmjetëm. Elemente të ndërmjetme. Zë një vend të ndërmjetëm. Shtet i ndërmjetëm. Prodhim i ndërmjetëm lëndë druri, e hequr nga pylli nëpërmjet prerjeve të kujdesimit, nga momenti i krijimit të gjendjes së masivit e deri në shfrytëzueshmëri.
3. gjuh. Që futet ndërmjet gjymtyrëve të fjalisë ose brenda një fjalie tjetër e veçohet nëpërmjet intonacionit, pa u lidhur formalisht nga ana gramatikore me asnjërën nga gjymtyrët dhe që shpreh qëndrimin e folësit ndaj asaj që thotë. Fjalë e ndërmjetme. Fjali e ndërmjetme.
4. Që nuk është as i mirë, as i keq; mesatar. Raport i ndërmjetëm. Opinion i ndërmjetëm. Propozim i ndërmjetëm. Produkt i ndërmjetëm. Projektvendimi i ndërmjetëm për marrje provash në seancë dëgjimore.
5. dogan. Mallra me regjim të ndërmjetëm quhen ato mallra që kalojnë tranzit nëpër një vend dhe si të tilla nuk paguajnë në këtë vend tarifë doganore.
✱Sin.: ndërmjetës, i ndërmjetshëm, i ndërmjemë, kalimtar, i mesëm, midisës, i midistë, i ndërkallur, i ndërfutur, mesatar.
PYKËZÚAR (i, e) mb. 1. usht. Që ka hyrë si pykë në thellësi të ushtrisë së armikut; i ndërfutur. Forcat e pykëzuara.
2. min. Që është ngushtuar dalëngadalë deri sa ka mbaruar krejt (për shtresat e qymyrgurit, të hekur-nikelit etj.). Shtresat e pykëzuara.
✱Sin.: i ndërfutur, i çarë, i ngushtuar, i ndarë.
PËRBRENDËSÚAR (i, e) mb. Që është përbrendësuar. Fjalë (trajta të shkurtra) të përbrendësuara (gjuh.).
✱Sin.: i ndërfutur, i ndërkallur, i brendësuar.
TÁNGO,~JA f. sh. ~, ~T 1. Pjesë muzikore e lehtë, me ritëm të ngadalshëm.
2. Vallëzim gjatë të cilit çiftet bëjnë një hap në njërën anë dhe dy nga ana tjetër. Tango e lehtë. Vallëzoj (kërcej) një tango. Tango argjentinase vallëzim salloni, sipas të cilit çifti bën shumë lëvizje të ngadalta duke ndërfutur këmbët te njëri-tjetri. Duhen dy vetë për të kërcyer tango thuhet kur veprimet duhet të kryhet nga dy vetë dhe jo në mënyrë të njëanshme.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë