Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
APOSTROFÍM,~II m. sh. ~E, ~ET 1. Veprim kur apostrofoj ose kur apostrofohem, kur i drejtohem dikujt me thirrje a kur qortohem rëndë etj.
2. Shquarje e dikujt ose e një çështjeje a teme kur flasim ose kur shkruajmë; shquarje e diçkaje nga dikush; përmendje, thirrje, nënvizim, theksim i dikujt ose i diçkaje. Apostrofim i emrit të saj. Apostrofim i çështjes së vaksinave.
3. Qortoj dikë publikisht duke ia përmendur emrin, punën, sjelljen. Apostrofim në medie. Ua bëri një apostrofim edhe atyre.
4. let. Përdorimi i apostrofës si figurë stilistike në poezi, në prozë ose në një tekst dramatik. Poezia shquhej me apostrofime.
SHËNÍM,~I m. sh. ~E, ~ET 1. Veprimi kur i vëmë një shenje diçkaje, mjeti me anë të të cilit i vendosim shenjën diçkaje. Shënimi i drurëve që do të priten. Shënim me shkumës. Shënim me rreze X. Makina e shënimit.
2. Veprimi kur regjistrojmë me shkrim diçka, fjalë a frazë që e shënojmë për të mos e harruar diçka. Shënimi i pikëve të fituara. Shënimi i kufijve. Shënimi i kandidatëve me emra. Me anë të një shënimi në rrjetet sociale. Shënimi i datës së skadimit të një produkti. Shënim kadastral (drejt.) lloj i regjistrimit kadastral me të cilin evidencohen marrëdhënie personale relevante juridike të titullarit të së drejtës kadastrale, si dhe të disa fakteve juridike.
3. Paraqitje me shenja konvencionale e një madhësie të panjohur; përfaqësimi i një fjale, fjalimi etj. me shenja konvencionale në stenografi. Shënimi i x-it. Shënimi i y-nit. Shënim stenografik.
2. Veprimi kur hedhim në letër mendime, përshtypje etj.; kur duam t’i shënojmë me qëllim që t’u rikthehemi sërish më vonë. Shënimet e leksionit. Fletore shënimesh. Mori shënime. Mësoj me shënime. I mblodhi shënimet.
3. Shpjegime, sqarime plotësuese për një çështje etj., që bëhen nga autori ose nga redaktori të paraprira nga një numër dhe vendosen zakonisht në fund të faqes, të kapitullit a në fund të librit; të dhëna a njoftime të ndryshme që plotësojnë, sqarojnë, komentojnë diçka. Shënim i përkthyesit. Shënimi i autorit. Shënime bibliografike (biografike). Shënim në fund të faqes. Pajisje me shënime. Botim me shënime. Shënime historike. Shënime gjuhësore. Shënime gramatikore. Shënime me karakter filologjik. Shënimi CIP i katalogut term në bibliotekonomi që ka të bëjë me regjistrimin bibliografik të një materiali që parashikohet të botohet.
4. Diçka e shkruar me dorë në anë të një shkrese, të një dokumenti, të një dorëshkrimi etj. për të dhënë një mendim, një vërejtje ose një udhëzim për një çështje. Pasi e lexoi, bëri disa shënime. Shënimi i eprorit. Vë shënime.
5. fig. Përkujtimi i një dite të veçantë a një feste. Shënimi i Ditës së Fëmijëve. Shënimi i 7 Majit. Shënimi i lisë.
5. Rezultate në një fushë të caktuar, arritje. Shënimi i një rekordi të ri. Shënimi i lumturisë.
6. usht. Shënjim. Vija e shënimit. Pikë shënimi. Marr shënim.
7. sport. Akti i bërjes së golit, koshit a pikës në një ndeshje sportive futbolli, basketbolli etj. Rast shënimi. Shënimi i golave.
8. vjet. Shenjë. Nuk mbeti asnjë për shënim.
✱Sin.: shenjë, gjurmë, nënvizim.
♦ Marr (mbaj) shënim (për diçka) libr. mësoj për diçka dhe i kushtoj kujdes e vëmendje, e kam parasysh për ta ndjekur e për ta zgjidhur.
THÉKS,~I m. sh. ~A, ~AT 1. gjuh. Shqiptim me zë më të fortë ose me ton më të ngritur i një rrokjeje a i një zanoreje në fjalë, dallim që i bëhet një rrokjeje a një zanoreje në fjalë gjatë të folurit; shenjë e posaçme që, kur shkruajmë, vihet mbi zanoren e shqiptuar në këtë mënyrë. Theks i mprehtë. Theks hundor. Theks dinamik (melodik). Theks i lëvizshëm (i lirë, i ngulët ose i palëvizshëm). Theksat ritmikë theksat e një vargu. Theksi i fjalës. Shenja e theksit. Lëvizja (shpërngulja) e theksit. Theksi bie mbi rrokjen e parafundit. Vuri theksat.
2. gjuh. Shqiptim me zë më të fortë ose me ton më të ngritur i një fjale a i një pjese të fjalisë, dallim që i bëhet një fjale a një pjese të fjalisë për të vënë në dukje rëndësinë kuptimore të saj, peshën emocionale që ka etj. Theksi logjik (kuptimor). Theksi emocional. Theksi i fjalisë.
3. muz. Rritja e forcës në një notë të caktuar të melodisë; shenjë e posaçme që përdoret për të treguar këtë notë.
4. Mënyrë shqiptimi ose theksimi e tingujve, e fjalëve ose e fjalive në të folur, mënyrë të foluri që është karakteristike për një njeri a për një grup shoqëror; ndryshim i zërit (ngritje, ulje, forcim, dobësim etj.), që shpreh ndjenja të caktuara të folësit; theksim. Theks i këndshëm (i butë, i ëmbël, i ashpër). Foli me theks të veçantë (të huaj).
5. fig. Vëmendje e posaçme që i kushtohet diçkaje, rëndësi e veçantë që i jepet një gjëje; dallim i veçantë që i bëjmë diçkaje, nxjerrje në pah e diçkaje, vënie në dukje. Foli me theks të veçantë për diçka. Mori një theks të ri. Vë theksin mbi diçka përqendroj vëmendjen te diçka, e vë në dukje në mënyrë të veçantë, e nënvizoj, e theksoj.
6. fig. Karakteri i veçantë që ka ose që merr diçka; ngjyrimi i diçkaje. Theks shoqëror (politik, filozofik). Theks epik (tragjik).
✱Sin.: theksim, nënvizim, rëndësi, rëndim, përforcim.
♦ Vë theksin (mbi diçka) libr. i jap rëndësi të veçantë diçkaje, e përqendroj vëmendjen te diçka, e vë në dukje, e theksoj, e nënvizoj për të tërhequr edhe vëmendjen e të tjerëve; nxjerr në pah (diçka).
VIZÍM,~I m. 1. Veprimi kur vizoj a vizohet diçka. Vizimi i dërrasës së zezë. Vizimi i fushës së futbollit. Thikë për vizim (tek.). Vizimi i vijave të bardha për kalimtarët. Vizimi i skicës. Vizimi i fjalëve kryesore. Vizimi i paragrafit.
2. fig. Veprimi kur paraqesim në vija të përgjithshme, vizatojmë, përvijojmë (diçka). Vizimi i portretit nga kujtesa.
3. vjet. Veprimi kur vizatojmë diçka. Vizimi i një rrethi. Vizimi i një figure gjeometrike.
4. Bërja e vizës a shënimi i saj në pasaportë, në letërnjoftim. Vizimi i pasaportës. Ia bëri vizimin pasaportës.
✱Sin.: vijëzim, vizatim, nënvizim.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë