Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
DËSHMÓR,~I m. sh. ~Ë, ~ËT 1. Ai që fal jetën për liri e për drejtësi shoqërore, për të mirën e popullit e të atdheut. Dëshmorët e lirisë. Dëshmorët e Luftës Nacionalçlirimtare. Dëshmorët e Rilindjes. Dëshmor i gjuhës shqipe. Gjaku i dëshmorëve. Dita e dëshmorëve. Varret (varrezat) e dëshmorëve. Amaneti i dëshmorëve. Familje dëshmori. Ra dëshmor.
2. vjet. Dëshmitar.
✱Sin.: theror, i rënë, martir, fli, dëshmitar.
FLI,~AI f. sh. ~, ~TË 1. fet. Qenie e gjallë (kafshë, shpend, etj.) që theret si dhuratë për nder të Perëndisë; kurban, sakrificë. Bënë fli një qengj pa të meta.
2. Ai që jep jetën për një qëllim madhor, për një çështje të madhe, për interesa të lartë kombëtarë e njerëzorë; martir, theror, dëshmor. Ra fli.
✱Sin.: kurban, sakrificë, martir, theror, dëshmor.
♦ Bëhem (bie) fli flijohem; sakrifikohem për dikë a për diçka të shenjtë a të shtrenjtë. E bëj fli (dikë a diçka) e flijoj; e sakrifikoj për dikë a për diçka.
FLIJIMTÁR,~I m. sh. ~Ë, ~ËT Martir. Ra si flijimtarët.
MARTÍR,~E mb. 1. Që pranon vdekjen në vend që të heqë dorë nga besimi i vet fetar. Misionarë martirë.
2. Që vuan shumë dhe jep jetën për një çështje të lartë e të shenjtë Popull martir. Kosova martire. Në Drenicën martire. I këndoj Borovës (tokës) martire.
3. Që sakrifikon jetën për diçka me vlerë të madhe. Poet martir.
MARTÍR,~I m. sh. ~Ë, ~ËT 1. Ai që pranon vdekjen në vend që të heqë dorë nga besimi i vet fetar.
2. Ai që vuan shumë e jep edhe jetën për një çështje të lartë e të shenjtë, ai që sakrifikon veten për një kauzë (për çlirimin a për mbrojtjen e Atdheut, për drejtësinë shoqërore etj.); dëshmor. Martirët e Atdheut (e lirisë). Martirët e Borovës. Gjaku i martirëve. Varret e martirëve. Përkujtimi i martirëve të rënë për Atdhe. Dha jetën si martir. U ngrit një obelisk në kujtim të martirëve.
3. Ai që jep jetën për diçka me vlerë të madhe. Martir i dashurisë.
MARTIRIZÍM,~I m. 1. Veprimi kur martirizoj dikë ose kur martirizohem. Martirizimi i heronjve. Dita e martirizimit. Përkujtoj martirizimin e dy shqiptarëve.
2. Vuajtje e rëndë dhe e gjatë që e heq një martir; therori. Martirizim i gjatë.
✱Sin.: therorizim, therori, flijim.
MARTIRIZ/ÓJ vep., ~ÓVA, ~ÚAR kal. 1. E dënoj dhe e vras për përkushtimin ndaj një kauze të madhe, e bëj martir. Pushtuesi që martirizoi një numër të madh shqiptarësh.
2. E mundoj apo e sfilit shumë dikë trupërisht e shpirtërisht, e përndjek me egërsi, e torturoj. Martirizon një popull heroik.
✱Sin.: therorizoj, flijoj, mundoj, sfilit, përndjek, torturoj.
MARTIRIZÚAR (i, e) mb. 1. Që e kanë vrarë për një kauzë të madhe, që ka rënë martir. Prift i martirizuar. Ushtarë të martirizuar.
2. Që ka vuajtur dhe është torturuar si martir. Popull i martirizuar.
✱Sin.: i therorizuar, i flijuar.
MARTIRIZÚAR,~I (i) m. sh. ~, ~IT (të) Ai që është martirizuar, ai që ka rënë martir. Të martirizuarit për atdhe.
PASHTRÍSH/ËM (i), ~ME (e) mb. 1. Që nuk mund të shtrihet.
2. fig. Që nuk gjunjëzohet, që nuk shtrihet përdhe; i pagjunjëzueshëm. Popull martir e i pashtrishëm.
SHAHÍT,~I m. sh. ~Ë, ~ËT vjet. 1. Ai që është në dijeni të drejtpërdrejtë të një fakti (e ka parë, e ka dëgjuar) dhe thirret për të dëshmuar rreth tij, dëshmitar. Kam shahit gjithë fshatin. U thirr shahit. E morën për shahit. I duhej një shahit që e kishte parë vetë ngjarjen.
2. Ai që sakrifikon në mënyrë të vullnetshme jetën, pa marrë parasysh rreziqet, dëshmor. Ra shahit. Emri i shahitit. Shahitëve u kishin bërë një lapidar.
✱Sin.: dëshmitar, dëshmues, dëshmor, martir, veqil.
SHEHÍT,~I m. sh. ~Ë, ~ËT vjet. 1. Ai që është i pranishëm në një ngjarje, dëshmitar, dëshmues. Doli shehit. Nuk po gjente asnjë shehit. Avokati numëroi shehitët.
2. Ai që jep jetën për lirinë e atdheut, dëshmor, theror, martir. Kishte rënë shehit. Në atë luftë shumë kishin mbetur shehitë.
✱Sin.: dëshmitar, dëshmues, dëshmor, theror, martir, i rënë, veqil.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë