Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
AKOMODÍTET,~I m. Gjendje përshtashmërie, rehatie nga ana fizike, psikologjike ose sociale; ndjenjë qetësie dhe kënaqësie. Akomoditet shoqëror. Ofron (garanton, siguron) akomoditet. Mobiliet moderne sigurojnë akomoditet maksimal. Shërbimi cilësor është çelësi i akomoditetit.
✱Sin.: përshtatshmëri, komoditet, mirëqenie, adaptim, rehati.
AKTUALIZÍM,~I m. sh. ~E, ~ET libr. 1. Përtashësim, shndërrim i diçkaje në të tashme, dhënie e karakterit aktual diçkaje, bërje aktuale a bashkëkohore e dikujt a e diçkaje; sjellje në përputhje me realitetin e tashëm, përshtatje me kohën; jetësim, sendërtim, realizim. Aktualizim i temave (i të dhënave, i informacioneve etj.). Aktualizimi i njohurive të mëparshme. Aktualizim i softuerit. Aktualizim i së shkuarës në filmin e ri. Aktualizimi i vetvetes – arritje e potencialit maksimal (filoz.).
2. gjuh. Kalimi i një njësie kuptimore nga sistemi gjuhësor në procesin e të folurit. Aktualizim i së tashmes historike. Aktualizimi i thirrores. Aktualizimi i habitores.
✱Sin.: përditësim, bashkëkohorëzim, modernizim, përshtatje, jetësim, sendërtim, realizim.
DIGRESIÓN,~I m. sh. ~E, ~ET 1. let. Shmangie, largim nga tematika kryesore e një bisede, e një shkrimi a e një diskutimi për të folur rreth diçkaje, që nuk ka lidhje të drejtpërdrejtë me temën e diskutuar; ndërprerje e idesë kryesore ose e linjës së diskutimit. Shpesh ai shërben si digresion i rrëfimit epik.
2. astr., fiz. Largim, zgjatim, shmangie nga një pozicion i dhënë ose nga rruga e pritur. Venusi ndodhet në digresionin e tij maksimal lindor. Digresioni i rrezeve të dritës. Digresioni nga vlera mesatare.
EKSPIRATÓR,~E mb., libr. Që shërben për nxjerrjen e frymës. Fluksi ekspirator maksimal. Vëllimi ekspirator. Theksi ekspirator. Gjatë një prove të shkurtër ekspiratore.
MAKSIMÁL,~E mb. Që arrin nivelin më të mirë ose më të lartë të mundshëm, që është më i miri ndër të gjithë, më i madhi ndër të tjerë, i lartë sa më s’bëhet; kund. minimal. Uji në liqen arriti nivelin maksimal. Lartësia maksimale që mund të arrijë ndërtesa. Regjistrohen temperaturat maksimale të verës. Çmimi maksimal i mallrave. Shpejtësia (fuqia) maksimale e makinës. Bëri përpjekje maksimale për të fituar.
MAKSIMALÍSHT ndajf. Në nivel maksimal. U vlerësua maksimalisht. U dënua maksimalisht. Rriten taksat maksimalisht. Pranohen maksimalisht pesë vetë.
MAKSIMALIZÍM,~I m. Arritje e nivelit maksimal. Maksimalizimi i fuqisë së shtetit.
MAKSIMALIZÚES,~E mb. 1. Që e bën të arrijë nivelin maksimal, më i miri i mundshëm, më i larti ndër të gjithë. Ndjek parimin maksimaliues në konceptimin e hapësirës. Slogan me synim pajtues dhe maksimalizues në vota.
2. si em. Ai që e bën diçka të arrijë nivelin nivelin maksimal. Vepron si maksimalizues i sigurisë.
MINIMÁL,~E mb., libr. Më i vogli a më i ulëti ndër të tjerët në një shkallëzim të caktuar, i shkallës më të ulët a i cakut më të poshtëm; i vogël, i ulët e i tillë sa më s’bëhet; kund. maksimal. Kërkesa minimale. Me mbështetje minimale. Temperatura minimale. Koha minimale e nevojshme për diçka. Çmime minimale. Kufiri minimal. Pension minimal. Paga minimale. Të ardhura minimale. Mori dënim minimal.
MÚNDSH/ËM (i), ~ME (e) mb. 1. Që ekziston si mundësi por nuk është plotësisht e sigurt; që mund të bëhet, të arrihet, të plotësohet a të zbatohet. Marrëveshje e mundshme. Zgjidhje e mundshme. Sulm i mundshëm. Armiqtë e mundshëm. Është plotësisht e mundshme. Gjej zgjidhjet e mundshme. Bëj përmirësimet e mundshme. E shoh këtë gjë plotësisht të mundshme.
2. Që mund të ndodhë ose që mund të jetë i vërtetë duke u mbështetur në faktet apo rrethanat e dhëna; që mund të ekzistojë në disa kushte e rrethana të caktuara. Tani është e mundshme që robotët të bëjnë shumë punë të njeriut.
3. Që kap maksimalen e asaj që mund të bëhet ose që mund arrihet; maksimal. Mori të gjitha pikët e mundshme. Kapërceu të gjithë kufijtë e mundshëm. Bëri gjithçka të mundshme. U përpoq me të gjitha mjetet (forcat) e mundshme.
4. Që është i lejueshëm, që mund të lejohet a të pranohet. A është e mundshme të vizitojmë muzeun tani?
5. Që kërkon mund, i mundimshëm. Punë e mundshme. Udhëtim i mundshëm.
✱Sin.: i bëshëm, i realizueshëm, i mundur, i arritshëm, i plotësueshëm, maksimal, i lejueshëm, i pranueshëm.
NDËSHKÍM,~I m. sh. ~E, ~ET 1. Veprimi kur ndëshkoj ose kur ndëshkohem. Ndëshkimi i fajtorëve. Ndëshkimi i veprave kriminale.
2. Masë dënimi që merret kundër dikujt për një faj, dënim. Ndëshkim i lehtë (i rëndë, i rreptë). Ndëshkim maksimal. Ndëshkim për korrupsion. Ndëshkime trupore (fizike). Ndëshkim disiplinor. Ndëshkim i veprave kriminale. Ndëshkim administrativ. Ndëshkim politik. Ndëshkim me gjobë. Vuan ndëshkimin.
✱Sin.: shpagim, dënim, gjobë, shembull, shitë, shuplakje, të shuplakur, të ndëshkuar, të shituar, xheza.
PROGRÁM,~I m. sh. ~E, ~ET 1. Tërësia e detyrave dhe e punëve të parashikuara për t’u plotësuar në të ardhmen; plan i gjerë që parashikon një punë a një veprimtari të ardhshme dhe ecurinë për plotësimin e saj. Program zhvillimi. Program pune.
2. Tërësia e parimeve, e tezave, e qëllimeve dhe e detyrave themelore të një partie politike, të një qeverie ose të një organizate shoqërore. Program politik. Programi minimal (maksimal). Programi i qeverisë. Shpalli programin.
3. Përmbledhje e shkurtër e përmbajtjes dhe e qëllimeve të një lënde mësimore në shkollë. Program mësimor. Programi i gjuhës shqipe (i letërsisë shqiptare, i historisë, i fizikës).
4. Tërësia e pjesëve që luhen në një koncert, në një estradë, në një shfaqje cirku etj.; tërësia e pikave që përmban një veprimtari kulturore e artistike. Program muzikor. Program artistik (kulturor). Program televiziv. Program i pasur (i bukur, i shkurtër). Program me këngë (me recitime).
5. Tërësia e emisioneve që jepen me radio ose me televizion gjatë një dite, një jave etj. Programi i emisioneve të radios (të televizioneve).
6. Fleta ose libërthi ku janë shtypur sipas një rendi të caktuar këto pjesë, emisione etj. Programi i shfaqjes. Programi i festivalit (i konferencës, i kongresit).
✱Sin.: plan, përmbledhje, pjesë, emision.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë