Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
HIPNOTIZÚES,~E mb. Që merret me hipnozën; që të hipnotizon; magjepsës. Zë hipnotizues. Fuqi hipnotizuese. Pamje hipnotizuese. Këngë hipnotizuese.
MAGJÉPSSH/ËM (i), ~ME (e) mb. Që të magjeps, magjepsës. Është një libër i magjepsshëm që të mban pezull. Kishte ëndrra të magjepsshme.
✱Sin.: magjepsës, mahnitës, i mrekullueshëm.
MAGJÉPSËS,~E mb. 1. Që ka fuqi magjike për të magjepsur dikë ose diçka; kund. çmagjepsës. Ata pinë ujë nga burimi magjepsës.
2. Që të mahnit, që të mrekullon, që të magjeps. Ujëvarë më magjepsëse nuk kishte parë ndonjëherë. Bukuri magjepsëse. Rrezet magjepsëse të hënës. Sy magjepsës. Zë magjepsës. Tregim magjepsës.
✱Sin.: mahnitës, i mrekullueshëm, joshës, hipnotizues.
MAGJÍK,~E mb. 1. Që përdor fuqitë e magjisë për të realizuar gjëra të pamundura; që ka të bëjë me magjinë, i magjisë. Ka një shkop magjik. Fluturoi me qilimin magjik. Hap kyçin magjik. Përdor unazën magjike. Pasqyra magjike fliste të vërtetën. Di formula (fjalë) magjike. Shfaq fuqi magjike. Ai veshi çizmet magjike.
2. Që të josh me forcë të madhe si me magji, që të sjell kënaqësi të madhe me cilësitë misterioze të jashtëzakonshme që ka; tërheqës, joshës, i mrekullueshëm, magjepsës. Ajo vajzë njihej për burinë e saj magjike.
3. Që ka ndikim të madh, të fshehtë e të pashpjegueshëm mbi dikë ose diçka. Nëna kishte aftësi magjike për të të qetësuar. Asaj iu duk se aparati magjik ia shëroi veshin. Pushteti vendor është një çelës magjik.
4. Pjesë e dytë e togut sy magjik, i cili është një vrimë e vogël e rrumbullakët në derë, e mbuluar me xham zmadhues përmes të cilit mund të shohësh nga brenda jashtë, por jo edhe anasjelltas.
✱Sin.: tërheqës, joshës, i mrekullueshëm, magjepsës.
♦ *Çelës magjik. *Shkop magjik. Me *shkopin magjik.
MAGJIPLÓTË mb. Që të tërheq a të rrëmben me fuqi të jashtëzakonshme, që të josh plotësisht si me magji, që të magjeps tërësisht. Fytyrë (pamje) magjiplotë. Buzëqeshje (bukuri) magjiplotë. Çele zërin magjiplotë! Dëgjoj tingujt magjiplotë të këngës.
✱Sin.: magjepsës, joshës, mahnitës, i mrekullueshëm.
MAGNETIZÚES,~E mb. 1. Që e bën një metal ose material të ketë veti magnetike, që e magnetizon; kund. çmagnetizues. Metal me efekt magnetizues. Përdor materiale magnetizuese.
2. Që të tërheq shumë, që të bën për vete, magjepsës. Sytë e saj ishin magnetizues.
✱Sin.: tërheqës, magjepsës, joshës.
MAHNÍTSH/ËM (i), ~ME (e) mb. Që të shkakton habi apo kënaqësi shumë të madhe, që të mrekullon, që të lë me gojë hapur, mahnitës. Pamje (bukuri) e mahnitshme e maleve. Pikturë e mahnitshme. Sy të mahnitshëm. Njeri me forcë të mahnitshme. Shkencëtar me mendje të mahnitshme. Përparime (ndryshime) të mahnitshme. Zhvillime të mahnitshme të teknologjisë. Ka një durim të mahnitshëm.
✱Sin.: mahnitës, magjepsës, i mrekullueshëm, i habitshëm, i çuditshëm, magjik.
PERËNDÍM,~I m. 1. Veprimi kur perëndon Dielli; ulja e Diellit ose e ndonjë trupi tjetër qiellor poshtë vijës së dukshme të horizontit në anën e kundërt të lindjes.
2. Pamja e natyrës dhe drita kur perëndon dielli. Perëndim i bukur (i mrekullueshëm, magjepsës) i diellit.
3. Koha kur perëndon dielli. Para (pas) perëndimit të diellit. Në perëndim të diellit.
4. Pika e horizontit nga perëndon dielli, ana që është në të majtë kur kthehemi me fytyrë nga veriu, drejtimi i përkundërt me lindjen; vend (pjesë e një shteti a kontinenti, krahinë a tërësi krahinash, zonë) që ndodhet në anën nga perëndon dielli. Në perëndim të qytetit (të fshatit, të vendit). Me dritare nga perëndimi. Era e perëndimit. Sheh nga perëndimi. Fryn nga perëndimi. Shkonin drejt perëndimit.
5. (gjeogr.) Vendet a shtetet e Evropës Perëndimore e të Amerikës. Perëndimi i largët vendet e Shteteve të Bashkuara të Amerikës në Malet Shkëmbore dhe përgjatë bregut të Paqësorit. Perëndimi i Mesëm krahinë në shtetet veriore të Shteteve të Bashkuara të Amerikës nga Ohajoja deri në Malet Shkëmbore.
6. fig. Fundi i dikujt a i diçkaje, mbarim; rënie nga fuqia, nga gjendja e mirë etj. Perëndimi i sistemit feudal. Perëndimi i mitit të pathyeshmërisë së ushtrisë gjermane.
7. Vdekja e dikujt a zhdukja e diçkaje.
✱Sin.: kaptim, hyrje, falje, përfalje, fund, mbarim, rënie, vdekje, zhdukje.
PRISHAMÉNDËS,~E mb. Që të prish mendjen, mendjeprishës.
✱Sin.: joshës, magjepsës, lajkatar, prishaqejf.
ROBËRÚES,~E mb. 1. Që synon të robërojë një tjetër; që e vë nën zgjedhë dikë, që e kthen në rob. Luftë robëruese. Politikë robëruese.
2. Që është krejt në dëm të njërës palë, që përmban kushte të rënda për njërën anë. Marrëveshje robëruese. Kushte robëruese.
3. fig. Që të bën për vete, që të magjeps. Vështrim robërues.
✱Sin.: skllavërues, skllavërues, magjepsës.
SKLLAVËRÚES,~E mb. Që e vë dikë në gjendjen e një skllavi, që i heq çdo liri e pavarësi, që e nënshtron dikë si skllav; robërues; magjepsës. Ishte një sistem skllavërues. Firmosën një traktat skllavërues. Hartuan politika skllavëruese. Kishte një shikim skllavërues.
SPEKTÁK/ËL,~I m. sh. ~LE, ~LET 1. Përfaqësim, veprim skenik, shfaqje artistike që zhvillohet para publikut; çdo paraqitje madhështore e këtij lloji. Spektakli do të fillonte në orën tetë. Duartrokitën gjatë dhe pas spektaklit. Dhanë një spektakël magjepsës. Morën pjesë në një spektakël. Ishte një spektakël i bukur.
2. Tërësia e veprimtarive artistike, krijuese dhe teknike që lidhen me kinemanë, teatrin, këngën, radion dhe televizionin etj. Botë spektakli. Njerëz të spektaklit.
3. Diçka që tërheq vëmendjen për shkak të karakteristikave të saj të jashtëzakonshme. Spektaklet e mëdha që ofron natyra. Spektakli që jep deti në stuhi. Nuk dua të jem dëshmitar i këtyre spektakleve të dhunës.
♦ *Të japësh spektakël. Të bësh një shfaqje, të veprosh në atë mënyrë që të tërheqësh vëmendjen dhe interesimin e të tjerëve, për shkak të aftësive të veçanta që shfaq, por edhe në kuptimin negativ. Ai ishte një kampion që bënte gjithmonë spektakël në fushë. Dhanë spektakël.
TËRHÉQËS,~E mb. 1. Që shërben për të tërhequr diçka, që tërheq. Kafshë tërheqëse. Makinë tërheqëse. Mjete tërheqëse. Forcë tërheqëse.
2. fig. Që të bën për vete, që të josh, që të bën ta shohësh, ta lexosh a ta dëgjosh me kënaqësi; që të tërheq me bukurinë a me mirësinë e tij. Libër (film) tërheqës. Pamje tërheqëse. Vajzë tërheqëse. Bukuri tërheqëse. Është shumë tërheqëse.
✱Sin.: joshës ngashënjyes, miklues, lajkatar, tundues, rrëmbyes, shtytës, nxitës, intrigues, i magjishëm, magjepsës, magjik.
ÇMAGJÉPSËS,~E mb. 1. Që prish a heq magjinë; kund. magjepsës. Rituali çmagjepsës. Prifti çmagjepsës nisi ritualin me murmurimë.
2. fig. Që largon joshjen a mahnitjen nga diçka. Këta zëra çmagjepsës na bëjnë të humbasim më shumë energji. Ai u bë çmagjepsës gjatë periudhës së komunizmit.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë