Fjalori

Rezultate në përkufizime për “mëtim”

Mëso si ta përdorësh
<<< Kthehu te kërkimi kryesor në fjalor

AKUZIM

AKUZÍM,~I m. sh. ~E, ~ET 1. drejt. Veprimi kur akuzoj ose kur akuzohem.
2. drejt. Ngritja a paraqitja e një akuze. Akuzim zyrtar. Akuzim i provuar. Akuzim i padrejtë. Akuzim i pabazë. Bëj akuzim privat. Hedh poshtë akuzimin.
3. bised. Fajësimi i dikujt si fajtor. Akuzim i rrejshëm. Akuzim për vjedhje (për fyerje).
✱Sin.: paditje, pandehje, fajësim, mëtim, pretendim.

AMBICIE

AMBÍCI/E,~A f. sh. ~E, ~ET libr. 1. Dëshirë e fortë dhe synim këmbëngulës për të bërë diçka me vlerë, që të ngre në sytë e të tjerëve dhe të shtyn përpara. Kam ambicie. Ajo ka shumë ambicie. Ambicie reale. Ambicia do përkushtim. Mungesë e ambicies. Ambicie pushtuese.
2. keq. Dëshirë e fortë dhe synim këmbëngulës për të arritur diçka të madhe, për t’u dalluar, ose për të pasur sukses në një fushë të caktuar, për lavdi personale, për pushtet, për famë, për suksese, për ngritje në karrierë; synim për të dalë me çdo mënyrë mbi të tjerët në përpjekjet për të arritur një qëllim të caktuar. Ambicie e sëmurë. Ngjall ambicien. Kënaq ambiciet e dikujt.
✱Sin.: mëtesë, mëtim, mësim, synim, pretendim.

ASPIRIM

ASPIRÍM,~I m. 1. Dëshirë e madhe për të arritur diçka. Aspirim për postin e kryeministrit. Aspirim për të studiuar mjekësinë.
2. mjek. Procesi i thithjes ose i largimit të lëngjeve, të gazrave ose të lëndëve të tjera nga trupi i njeriut përmes një pajisjeje thithëse ose një aspiratori, që përdoret në situata të ndryshme mjekësore. Aspirimi i rrugëve të frymëmarrjes. Aspirim diagnostik. Aspirimi kirurgjikal. Proces i aspirimit. Pajisje e aspirimit. Kreu procedurën e aspirimit. Aspirimi me gjilpërë për të marrë mostra tumorale.
3. gjuh. Frymëtim; shqiptimi i disa bashkëtingëlloreve i shoqëruar ne një rrymë të lehtë ajri. Aspirim i brendshëm. Aspirim nistor.
4. tek. Thithja e ajrit ose e gazrave në një sistem ose në një pajisje si në rastin e motorëve me djegie të brendshme, ku ajri aspirohet në cilindrat e motorit për t’u përzier me karburantin. Procesi i aspirimit të ajrit.
✱Sin.: përpjekje, përkushtim, dëshirë, qëllim, synim, mëtim, gjakim, aspiratë.

MËTESË

MËTÉS/Ë,~A f. sh. ~A, ~AT Mëtim, pretendim. Mëtesë për zgjerim të kufijve të vendit.

MËTIM

MËTÍM,~I m. sh. ~E, ~ET Veprimi kur mëtojI ose kur mëtohetI diçka; kërkim, pretendim. Mëtim i përligjur. Mëtime të pakuptueshme. Heq dorë nga mëtimet e veta.
✱Sin.: kërkim, pretendim.

PARAJSOJ

PARAJS/ÓJ vep., ~ÓVA, ~ÚAR 1. libr., jokal. Ikën në parajsë dikush që vdes.
2. fig., kal. I krijoj kushtet për të jetuar i lumtur e pa telashe a si në parajsë. Mëtim për t’i parajsuar ditët e netët.
3. fig., kal. Vlerësoj skajshmërisht.

PATHEMEL

PATHEMÉL (i, e) mb. 1. Që nuk ka themel (për një ndërtesë etj.). Ndërtesë e pathemel.
2. fig. I pathemeltë. Mëtim i pathemel.

PRETENDIM

PRETENDÍM,~I m. sh. ~E, ~ET libr. 1. Veprimi kur pretendoj ose kur pretendohet diçka.
2. Kërkesë e tepruar, të cilën dikush e paraqit si një të drejtë që i takon; kërkesë e pambështetur për diçka që dikush dëshiron ta ketë si privilegj; deklaratë a dokument ku paraqitet një kërkesë e tillë; mëtesë, mëtim. Njeri pa pretendime.
✱Sin.: kërkesë, mëtim, mëtesë, lakmi.

THELË

THÉL/Ë,~A f. sh. ~A, ~AT 1. Copë e vogël mishi, pjepri etj., zakonisht e prerë nga e tëra ose nga një pjesë më e madhe. Thelë e madhe (e vogël). Thelë mishi (peshku). Thelë shalqiri (pjepri, molle). Thelë djathi. E bëri thela. E preu në thela.
2. Secila nga pjesët që përbëjnë kokrrën e disa fryteve e që zakonisht mund të ndahen njëra nga tjetra. Thelë portokalli (mandarine). Nuk kishte mbetur asnjë thelë portokalli.
3. E çarë a plasaritje zakonisht në lëkurë, që është bërë me të prerë ose për ndonjë shkak tjetër. I është bërë një thelë në këmbë. I janë bërë duart thela.
4. fig. Pjesë nga një pasuri, nga një fitim etj., që e merr dikush. Mori thelën më të madhe.
✱Sin.: copë, rruazë, llokmë, nuskë, filetë, rriskë, flegër.
♦ U bë thelë e copë (dikush a diçka) shih u bë fërtele (dikush a diçka). U bënë thela për poçe u zunë keq; u vranë e u grinë me njëri-tjetrin; u bënë fërtele. Çon një *pelë e ha një thelë (dikush). Hyn (drejt e) në thela (dikush) ia hyn diçkaje drejtpërdrejt, kap ç’është kryesorja, pa i ardhur rrotull; e kërkon menjëherë atë që do; kërkon menjëherë gjënë më të mirë e më me vlerë; e lë lëngun e hyn në thela. S’është as për *lëng e as për thelë (dikush) keq. Të jep një thelë e të merr (të rrëmben) një pelë (dikush) keq. të jep pak për të të marrë shumë; të jep kusinë e të merr shtëpinë; hedh skortin të zërë troftën; ta merr lopën me gjithë viç. Nuk ka më thela shih s’ka më qofte te daja iron. E lë *lëngun e hyn në thela (dikush). Mbeti (katandisi) kokoshi (kaposhi) një thelë mbeti shumë më pak nga ç’ishte a nga sa duhej; duke hequr pak e nga pak, duke harxhuar pjesë-pjesë etj., u zvogëlua a u pakësua shumë diçka, katandisi fare pak. Thelë mbi bisht diçka e mirë që vjen kur s’e pret e kur nuk je keq; diçka shumë e mirë mbi të zakonshmen; diçka më shumë sesa të takon a mëtim për më shumë; e mirë mbi të mirat; bukë mbi pogaçe. Një thelë sa për një pelë shumë shtrenjtë; diçka e vogël me një çmim shumë të lartë; sa frëngu pulën; kund. për një copë bukë.

Ky fjalor është domosdoshmëri për shkrimtarët e për publicistët, për shkollarët e për studentët, për mësuesit e për pedagogët, për studiuesit e për këdo që merret me përdorimin e kultivimin e gjuhës amtare.

Ai u vjen në ndihmë gjithë atyre që merren veçanërisht me gjuhën e shkruar, por edhe të folur, me krijime e me përkthime, me hartimin e fjalorëve të tipave të ndryshëm etj.

...lexo më tepër.


© Akademia e Shkencave e Shqipërisë, 2026 — Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.

www.akad.gov.al
Adresa: Sheshi "Fan Noli", Tiranë