Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
►FÚT/EM jovep., ~A (u), ~UR vetv. 1. Hyj në një vend të mbyllur, të rrethuar, të mbrojtur a të fshehtë; depërtoj e vendosem diku. U fut në shtëpi (në klasë, në stadium). U futën në pyll. Futem në shtrat. U futën lopët në arë (në jonxhë). U futën në qytet. U fut në hapësirën ajrore (për aeroplanin).
2. Zhytem në ujë, kridhem diku në thellësi, hyj; kund. dal. Futem në lumë. Futem në baltë. U fut deri në brez.
3. v. III Ngulet në tokë a në një trup; hyn në një vrimë a në zbrazëtinë e një sendi; vendoset brenda në diçka; e merr, e nxë. U fut thellë pyka. Iu fut një gjemb në këmbë.
4. edhe fig. Hyj e zë vend midis njerëzve a sendeve; ndërhyj për dikë a për diçka. U fut ndërmjet tyre. U fut ndërmjetës.
5. fig. Njoh e kuptoj thellë diçka; prek thelbin e një çështjeje; arrij të marr vesh diçka të fshehtë a të panjohur; rrah diçka në mendjen time, zhytem (në mendime etj.). Futem në temë. U fut në hollësira të panevojshme.
6. Hyj në një punë a nis një veprimtari; bëhem anëtar a pjesëmarrës i diçkaje; marr pjesë diku, hyj. Futem në shkollë. U fut në trajnim.
7. fig. Bie në një gjendje të caktuar; vij në një gjendje të veçantë; hyj në marrëdhënie të caktuara me dikë; më kap a më pushton diçka, më zë. Iu fut frika (dyshimi). Iu fut lakmia (babëzia).
8. v. III Ulet, bie, fundoset, thellohet. I janë futur faqet (sytë). I është futur gjoksi brenda.
9. fig. Tregohem i afrueshëm me dikë, afrohem me njerëzit. Futet shumë në shoqëri.
10. v. III, fig. Hyn thellë në mendjen e dikujt, kuptohet e përvetësohet mirë nga dikush (për një ide, një pikëpamje etj.). I janë futur ide të ndryshme në kokë.
11. Filloj të marr pjesë në diçka, hyj; vendos e nis të veproj, filloj të merrem me një veprimtari të caktuar, i hyj një pune, i përvishem diçkaje. U futëm në garë. Iu futën punës. Iu futën bujqësisë (blegtorisë).
12. Filloj një periudhë të re kohe a moshe; nis një etapë të re zhvillimi. U fut në një epokë (në një fazë) të re.
13. v. III Tkurret, zvogëlohet (për një pëlhurë, një rrobë etj.). Është futur mjaft këmisha (nga të larët).
14. bised. Kryej një punë a një veprim shpejt e shpejt me një mjet; i heq, i shkoj; filloj të bëj diçka me një mjet a në një mënyrë të caktuar (edhe fig.). Iu fut me drapër e korri shpejt e shpejt. Iu fut me fshesë e fshiu shpejt e shpejt.
15. bised. Filloj t’i bie a ta qëlloj me diçka; filloj ta godas fort; i hyj. Iu fut me grushte (me shkelma).
16. bised. Filloj të ha a të pi diçka me një frymë a me shumicë; e bëj zakon të ha a të pi diçka vazhdimisht; e bëj diçka me një frymë e me kënaqësi. Iu fut byrekut. I është futur duhanit e s’po e lë dot.
17. vet. v. III, bised. Perëndon. U fut dielli (hëna).
18. pës. e FUT.
✱Sin.: kallem, rrasem, ulem, përvishem.
♦ I hyj (i futem) *brenda (diçkaje). I futet detit në këmbë nis një punë që është shumë e vështirë. Futem (hidhem) në flakë (në zjarr) veproj pa përfillur fare rrezikun. I është futur (i ka hyrë) në *gjak (diçka). Ku futet gjilpëra do të futet dhe peri (fj. u.) ku është njëri, do të jetë edhe tjetri (patjetër). Nuk më futet (nuk më hyn) në *kaptinë (diçka). Më futet (më ngatërrohet) nëpër *këmbë (dikush). Nuk më futet (nuk më hyn) në *kokë (në krye) (diçka). Nuk më futet (nuk më hyn) në krye (në *kokë) (diçka). Futem në *labirint. Futem (hyj) në *lëkurën (e dikujt). Futet (hyn) në *lojë (dikush). Futem (hyj) në *mes. Futem pesë para në grosh ndërhyj atje ku nuk më përket; fut hundët kot në punët e të tjerëve. U fut në *poçe (dikush). Futet (hyn) si *pykë (dikush). Futem (hyj) në *rol libr. Iu fut (i shkoi) në *taban (diçkaje). U futa në *thekër. Futem *thellë. U fut (ra) në të *thella (dikush). Futet (hyn) në *valle (dikush) i hyn një pune që kërkon mund. S’gjen *vend ku të futet (dikush). Nuk lë *vrimë pa u futur (dikush) hyj kudo. Futet (hyn) si *xhol (dikush).
LABIRÍNT,~I m. sh. ~E, ~ET 1. Strukturë ose rrjet i përbërë prej shtigjesh të shumta, të ndërlikuara dhe të ndërlidhura, që shpesh ka një rrugë të vetme të saktë drejt qendrës e cila mund të gjendet me shumë vështirësi. Hyri në një labirint. Ishte një lagje labirint.
2. fig. Rrjet i ndërlikuar që krijohet për të sfiduar logjikën, orientimin, këmbënguljen ose për të simbolizuar rrugëtimin e jetës. E sfiduan me një labirint.
3. anat. Struktura e përbërë e veshit të brendshëm, që përfshin pjesët e kockës së veshit të brendshëm dhe që është përgjegjëse për dëgjimin dhe drejtpeshimin. Vizitoj labirintin e veshit.
4. hist. Ndërtesë e madhe me shumë të ndara e me korridore të ngatërruara, ku ishte e vështirë të gjendej rruga e daljes (në Egjiptin dhe në Greqinë e lashtë), katakomb. Labirinti i Kretës.
5. fig. Diçka shumë e ndërlikuar, së cilës mezi i gjendet filli, çështje shumë e ngatërruar. Labirinti i kujtimeve (i mendimeve, i ndjenjave). Labirinti i historisë. I futi në një labirint. 6. gjuh. Ngatërresa gjuhësore, përdorim i strukturave të paqarta që çojnë në pështjellim. E fut bisedën nëpër labirinte gjuhësore.
♦ Futem në labirint libr. ngatërrohem keq në një punë a në një çështje shumë të ndërlikuar, sa nuk di të dal prej andej, futem në një çështje a në një gjendje që nuk ia gjen dot fillin.
LABIRINTNGJÁSH/ËM,~ME (e) mb. Që i ngjan një labirinti në formë ose në kompleksitet, që është i ndërlikuar dhe i paqartë, si një labirint. Shtegu labirintngjashëm i kujtimeve të tij. Ajo bëri një plan të labirintngjashëm për të arritur qëllimin.
LABIRINTNGJÁSH/ËM,~JA f. (lat. Diploria labyrinthiformis) bot. Strukturë ose formacion bimor (inde, qeliza, fruta, fara), që krijon rrjetëzim të ndërlikuar ose të ndërlidhur, i ngjashëm me një labirint, me qëllim përshtatjeje ndaj kushteve të mjedisit ose për të përmbushur nevoja të caktuara biologjike, koral truri, një specie e koraleve gurore. Studimi i labirintgjashmes.
LABIRINTÓR,~E mb. Që është si labirint, i vështirë për t’u kuptuar ose për t’u zgjidhur, me shumë kthesa e pengesa, i ndërlikuar, i ngatërruar. Situatë labirintore. Mendim labirintor. Ndjenja labirintore.
RRUGÍC/Ë,~A f. sh. ~A, ~AT 1. Rrugë e vogël dhe e ngushtë në një qendër të banuar; ndërtesat anës kësaj rruge dhe ata që banojnë në to. Kaloj në rrugicën e ngushtë. Kjo është rrugicë qorre (pa krye). Rrugicat e lagjes ndriçoheshin mirë. Rrugicë me kalldrëm. Shkonte rrugicave
2. Shteg i ngushtë, i shtruar a i rrahur nëpër një lulishte, në oborrin e një ndërtese etj. Rrugicat e lulishtes ishin si labirint. Rrugicë mes luleve.
3. Rruginë. Rrugicat e shtëpisë.
✱Sin.: rrugëz, rrugë, udhëz, sokak.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë