Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
KAKRRÚK,~U m. sh. ~Ë, ~ËT 1. Sharku i arrës; lëvozhgë e mishtë e arrës, e lajthisë etj.
2. Kokrra e disa pemëve frutore që kanë bërthamë disi të madhe dhe të fortë; arrë gungë.
3. Arrë, lajthi etj. e kahtitur.
4. si mb. Që s’ka thelpinj (për arrën, lajthinë etj.); i zbrazët. Arrë (lajthi) kakrruk.
5. si ndajf., fig., shpërf. Kruspull; shuk, lëmsh. Ishte mbledhur (ishte bërë) kakrruk.
✱Sin.: shark, çaçanik, lëvozhgë, gungë, i zbrazët, bosh, kruspull, shuk, lëmsh.
LËMSH,~I m. sh. ~E, ~ET 1. Një sasi penjsh të mbledhur si top; diçka e rrumbullakët si top a si gogël; rruzull. Lëmsh leshi (pambuku). Dy lëmshe spango. Lëmsh dheu (dëbore). Lëmsh gjalpi top gjalpi. Lëmshi i syrit. vjet. kokërdhoku. Lëmshet e topit. vjet. gjylet e topit. Lëmshet e gjakut. vjet. rruazat e kuqe e të bardha të gjakut. Lëmshet e njeriut. bised. herdhet. E mblodhi turrën lëmsh.
2. astr., gjeogr. Trup qiellor i rrumbullakët, rruzull. Lëmshi tokësor (diellor). Lëmsh i zjarrtë. Lëmshi i Tokës (i Diellit, i Hënës).
3. fig. Diçka që është pleksur në mënyrë të ngatërruar, pleksje, thurje, ndërlikim. Një lëmsh mendimesh (ndjenjash). Lëmsh intrigash (kontradiktash). U bë puna lëmsh u ngatërrua keq, u bë lesh e li.
4. fig. Shtrëngim që ndien njeriu në grykë kur tronditet ose kur hidhërohet shumë, saqë nuk flet dot e nuk përcillet lirisht; komb, nyjë. Kam një lëmsh në fyt. Ndien një lëmsh në grykë.
✱Sin.: top, topth, gogël, lëmak, kokël, xhumbë, boçe, bramsh, palmuç, rruazë, rruzull, pleksje, ndërlikim, shtrëngim, komb, shuk, bungë, nyjë, kruspull, kakrruk, topuz, rrëmujë, çorbë, përshesh, trumë, thes.
♦ Është bërë lëmsh. 1. (dikush) U mblodh (nga frika, nga të ftohtit etj.); u bë një dorë; u bë (një) grusht; u bë shuk; u bë gogël. 2. (diçka) Është ngatërruar keq; është pështjelluar; është bërë rrëmujë; është bërë lëmsh e lesh; është bërë lesh e li; është bërë lesh arapi. U bëfsh lëmsh! mallk. vdeksh!; e pësofsh keq e më keq! M’u bë (një) lëmsh (në grykë) u ngashëreva shumë; ndiej një dëshpërim a mallëngjim të thellë, sa më zihet fryma; m’u mblodh (një) lëmsh (në grykë); m’u bë nyjë (në grykë); m’u bë lak në fyt (në grykë). U bë lëmsh e lesh (diçka) shih është bërë lëmsh2 (diçka). M’u bë mendja (koka) lëmsh shih m’u bë mendja (koka) dhallë. E bëri lëmsh (diçka) e ngatërroi keq (një punë, një çështje etj.), e pështjelloi; e bëri rrëmujë; e bëri lesh arapi; e bëri lesh e li; e bëri çorbë; s’ia gjen fillin (diçkaje); ia drodhi litarin (dikujt). E bëri lëmsh e lesh (diçka) shih e bëri lëmsh (diçka). E ka lëmsh në thes (dikë) shih e sjell (e luan) në majë të gishtit (majë gishtave) (dikë). Kam një lëmsh në zemër (në gjoks, në kraharor) më mundon a më shqetëson shumë diçka, kam diçka që më bën të vuaj shpirtërisht; kam një ankth; kam një gur në zemër. E kap lëmshin nga *peri (dikush). Nuk ia kap *perin lëmshit (dikush). E la lëmsh në vend (dikë) e vrau, e la të vdekur; e la top në vend; e la thes në vend. Lëmsh me nyje (diçka) shih udhë e përpjetë. I mbajnë *anën e lëmshit (njëri-tjetrit). Mbeti lëmsh në vend (dikush) ra e vdiq menjëherë; ra pa ndjenja; mbeti top (në vend); mbeti thes (në vend). Iu mblodh (iu mbështoll) lëmshi (dikujt) po i afrohet fundi; po i mbaron jeta, është shumë plak; po i vjen vdekja; iu mblodh litari; i ka ditët të numëruara (dikush); i ka vdekur ora; e hëngri çairin (dikush); i ka të paka bukët (dikush); iu mblodh (iu mbështoll) kapistalli tall. M’u mblodh (një) lëmsh (në grykë) më zuri një hidhërim a një ankth e më shtrëngon, më mundon sa më zë frymën; m’u bë (një) lëmsh (në grykë); m’u bë (m’u mblodh) nyjë (në grykë); m’u bë lak në fyt (në grykë). M’u mblodh zemra *lëmsh. U ngatërrua lëmshi shih u ngatërruan fijet. Ngatërron lëmshin (dikush) shih ngatërron fijet (dikush). Sillet si lëmshi në shoshë (dikush) sillet kot, vjen vërdallë pa bërë ndonjë punë të dobishme; sorollatet; sillet si kali në lëmë. E sjell si lëmshi në shoshë (dikë) e sorollat pa i mbaruar punë, e sjell poshtë e lart; e sjell vërdallë; e luan në litar; e luan (e sjell) në majë të gishtit (të gishtave). U shthur lëmshi u prish rregulli e disiplina, s’i mban dot më njerëzit ose nuk e ndal dot tatëpjetën e diçkaje; i iku filli; i iku llaca krahin.
LËVÓZHG/Ë,~A f. sh. ~A, ~AT 1. Mbulesa e fortë që mbështjell kokrrat e disa pemëve ose farat e disa bimëve; lëkura e disa pemëve a perimeve, lëvore; gujava e vezës. Lëvozhgë arre (lajthie, bajameje, gështenje). Lëvozhgat e farave të kungullit (të pjeprit, të lules së diellit). Lëvozhga e portokallit (e limonit). Lëvozhgë veze. I heq (i qëroj) lëvozhgën. I theu lëvozhgën.
2. Lëkura e drurëve dhe e degëve të tyre ose lëkura e kërcellit të disa bimëve; lëvore. Lëvozhga e drurëve (e pemëve). Lëvozhgat e pishës.
3. Llapusha e kallirit të misrit, lëvore. Lëvozhgat e misrit. Zhveshin lëvozhgat.
4. fig. Veshja e jashtme e diçkaje, mbulesë, mbështjellje; guaskë. E ka ndërruar lëvozhgën.
✱Sin.: lëvore, lëkurë, cipë, guaskë, kakrruk, gollovezhgë, gëzhojë, gëzholle, gëzhytër, gavole, lëpushë, lëpushkë.
♦ E bëri lëvozhgë (dikë) shih e bëri leckë (rreckë) (dikë). S’ka dalë nga lëvozhga (dikush) mospërf. shih s’ka dalë nga veza (dikush) mospërf. Është mbyllur në lëvozhgën e vet (dikush) sheh vetëm punën e vet, s’jep e merr me të tjerët; u mbyll (u mblodh) në guaskën e vet.
RÚKË mb. 1. Që i është hequr lëvozhga e gjelbër, pa shark (për arrën), kakrruk. Arrë rukë.
2. I zhveshur, pa asgjë përsipër; i rrafshët. Vend rukë. E bëj rukë e rrafshoj, nuk i lë gjë përsipër.
3. si em. Arrë të cilës i është hequr lëvozhga e gjelbër, arrë pa shark. E mbushi thesin me ruka.
✱Sin.: i zhveshur, i rrafshët.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë