Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
►MBLÍDH/EM jovep., MBLÓDHA (u), MBLÉDHUR 1. vetv., zakon. sh. Grumbullohemi në një vend; afrohemi e bashkohemi diku; vet. v. III bëhet grumbull, tufë etj. U mblodhën shumë njerëz. U mblodhën te sheshi. U mblodh i gjithë fshati. Fëmijët u mblodhën kokë më kokë. U mblodhën pranë vatrës (rreth nënës, në qoshe). U mblodhën pulat (dhentë). Uji u mblodh nëpër gropa. U mblodh shumë dëborë para shtëpisë. Gjethet e rëna u mblodhën në cep. U derdh vaji, s’mblidhet më. (fj. u.). S’mblidhen pleshtat në grusht (s’futen pleshtat në thes). (fj. u.).
2. vetv., vet. v. III Bën mbledhje për të shqyrtuar diçka, për të zgjidhur një çështje etj. (për një organizatë, forum, organ drejtues, njësi prodhimi etj.); zakon. sh. për të gjitha vetat bashkohemi në një vend për një punë a veprimtari; grumbullohemi me rastin e një feste, të një gëzimi etj. U mblodh kongresi (konferenca). U mblodh kryesia (drejtoria). U mblodh kolektivi (klasa). Mblidhemi në klasë (në sallë, në fushë). Mblidhemi një herë në muaj. U mblodhën me rastin e ditëlindjes (e dasmës).
3. bised., vetv. Kthehem në shtëpi (zakonisht në mbrëmje); bashkohem me pjesëtarët e tjerë të familjes dhe rri me ta. Mezi mblidhet në shtëpi. Fëmijët mblidhen herët dhe bien të flenë. Me kë do të mblidhet kur të ikë i biri?
4. vetv. Mbledh gjymtyrët, trupin etj.; edhe fig. zvogëlohem, rrëgjohem, shtrëngohem e strukem (nga të ftohtët, nga sëmundja, nga frika etj.). U mblodh grusht (shuk, lëmsh, kruspull). U mblodh në një qoshe. U mblodh për t’u hedhur. U mblodh e u përmblodh u bë sa një grusht, s’dinte ku të futej, u struk (nga frika etj.).
5. vetv., vet. v. III Tkurret, hyn (për një plaçkë kur laget ose kur lahet). Mblidhet doku (basma, këmisha) nga të larët. Mblidhet shumë (pak). Nuk mblidhet fare.
6. vetv. Mbështillem me diçka, mbulohem nga të gjitha anët me një rrobë etj. U mblodh me pallto. U mblodh me shall.
7. fig., vetv. Bëhem i urtë, shtrohem. Djali (vajza) është mbledhur mjaft. Duke u rritur e duke u mbledhur.
8. fig., vetv. Më përqendrohet në një vend, më bëhet si lëmsh e më shtrëngon, më zë frymën, më mundon (përdoret me një trajtë të shkurtër të përemrit vetor në rasën dhanore). M’u mblodh lëmsh (nyjë) diçka. M’u mblodh (diçka) në grykë (në fyt, në zemër). Iu mblodh inati (zemërimi, mëria, urrejtja).
9. pës. e MBLEDH. Kallinjtë u mblodhën nga makineria.
✱Sin.: grumbullohem, bashkohem, tubohem, përqendrohem, mbështillem, rrudhem, ngushtohet, zvogëlohem, tkurret, hyn, paloset, rrëgjohem, kruspullohem, urtësohem, shtrohem, përmblidhem, bëhem.
♦ M’u mblodh (m’u mbështoll) në *grykë. Iu mblodh (iu mbështoll) *kapistalli (dikujt). Iu mblodhën *këmbët (dikujt). Iu mblodh *laku (dikujt). Iu mblodh (iu mbështoll) *lëmshi (dikujt). Iu mblodh *litari (dikujt).
MOSGRUMBULLÍM,~I m. sh. ~E, ~ET Pamundësi, paaftësi a mospranim për të grumbulluar ose për t’u grumbulluar; veprimi dhe gjendja kur nuk grumbulloj ose kur nuk grumbullohem; kund. grumbullim. Mosgrumbullimi i lojtarëve për ndeshje. Mosgrumbullimi i mbeturinave në vendin e duhur. Nuk mungonin edhe mosgrumbullimet. E nisi analizën me mosgrumbullimet.
NGARR/ÓJ vep., ~ÓVA, ~ÚAR kal., zakon. sh. Grumbullohemi rreth dikujt a diçkaje, i mbështillemi përreth, e rrethojmë. E ngarruan bletët. E kishin ngarruar të sëmurin. E ngarruan fëmijët mësuesin.
✱Sin.: grumbullohem, rrethoj, mbështillem.
►NGRÝDH/EM jovep., ~A (u), ~UR vetv., vet. sh. Grumbullohemi në një vend me shumicë e ngjishemi a shtrëngohemi njëri pas tjetrit. U ngrydhën njerëzit te sheshi. U ngrydhën në stadium tifozët.
✱Sin.: grumbullohem, ngjishem, shtrëngohem, rrasem.
►PËRQENDR/ÓHEM jovep., ~ÓVA (u), ~ÚAR 1. vetv., zakon. sh. Shkojmë për t’u mbledhur a për t’u grumbulluar në një vend; kund. shpërqendrohem. Turistët u përqendruan në sheshin qendror të qytetit.
2. fig., vetv. I kushtoj vëmendjen dhe kujdesin kryesor një pune a një drejtimi, ngulit gjithë vëmendjen në një punë a në një drejtim, mbaj të ngulitur vëmendjen vetëm në diçka, aty i vë të gjitha forcat, me atë merrem kryesisht, aty ndalem më shumë. Ishin përqendruar më shumë projektet për infrastrukturën digjitale. Diskutimi u përqendrua te çështja kryesore (në pikën e dytë).
3. vetv. Jam i aftë të mbledh forcat mendore dhe të mbaj të tendosur vëmendjen, përmbledh veten; kund. shpërqendrohem. U përqendrua mirë para se t’i hynte punës (studimit). Nuk përqendrohet dot. Përqendrohu këtu!
4. pës. e PËRQENDRÓJ.
✱Sin.: grumbullohem, dislokohem, mblidhem, ndalem, drejtohem, përmblidhem, merrem, kridhem, përpihem, zhytem.
TUB/ÓHEM jovep., ~ÓVA (u), ~ÚAR 1. vetv. Mblidhem në një grup bashkë me të tjerë, bëhem grup me të tjerë, bashkohem në një vend me ta. U tubuan në mes të sheshit. U tubua i gjithë populli. Dhentë u tubuan nën hijen e lisit.
2. vet. v. III Mblidhet, grumbullohet në një vend. Hapin vija që të mos tubohet uji.
3. pës. e TUBÓJ.
✱Sin.: mblidhem, tubëzohem, grumbullohem, bashkohem, grupohem.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë