Fjalori

Rezultate në përkufizime për “gjymtis”

Mëso si ta përdorësh
<<< Kthehu te kërkimi kryesor në fjalor

GJYMTISJE

GJYMTÍSJ/E,~A f. Veprimi kur gjymtis apo gjymtiset. Gjymtisje e tërë zonës.

SHFAROJ

SHFAR/ÓJ vep., ~ÓVA, ÚAR kal. E zhduk krejt, shfaros, shkretoj. Shfaroj papunësinë. Epidemia i shfaroi shpezët. Lufta e shfaroi si popull.
✱Sin.: asgjësoj, faroj, faros, shfaros, përfaroj, zhbëj, zhbij, zhduk, shuaj, fshij, kërdis, pres, përfshij, masakroj, gjymtis, shuaj, shqim.

SHFAROS

SHFARÓS vep., ~A, ~UR kal. 1. Ia shuaj farën, e zhduk krejt, e asgjësoj; shfaroj. Shfaros armikun. Shfaros mushkonjat. Shfaros minjtë. Shfaros jetën në një planet.
2. fig. Shkul nga rrënjët një fenomen, mendim a diçka të keqe; çrrënjos. Shfaros të keqen. I shfarosi kujtimet e hidhura.
✱Sin.: shfaroj, çrrënjos, asgjësoj, faroj, faros, përfaroj, zhbëj, zhbij, zhduk, shuaj, fshij, kërdis, pres, përfshij, masakroj, gjymtis, shuaj.

SHUAJ

SHÚAJ vep., SHÓVA, SHÚAR 1. kal. Ndaloj djegien e një zjarri a diçkaje tjetër që është ndezur, fik zjarrin; kund. ndez. Zjarrfikësit arritën ta shuanin zjarrin në kohë. Shuaj puron (cigaren). Shuaj flakën. E shuaj me ujë (me rërë).
2. kal. Bëj që të mos ndriçojë më diçka. Shuaj dritën (llambën). Shuaj qiriun (shkrepësen).
3. kal. Ndal a ndërpres punën e një pajisjeje duke e ndërprerë furnizimin me energji elektrike; fik; kund. ndez. Shuaj celularin (radion, televizorin). Shuaj makinën (motorin). Shuaj furrën.
4. kal., fig. Fashit një sherr a debat dalëngadalë; i jap fund gradualisht; shtyp, mbyt; kund. ndez. Shuaj një konflikt (një sherr, një grindje). Shuan debatet. E shuan me zjarr e me hekur.
5. kal., fig. Ia heq dikujt shpresën për diçka, e shkatërroj plotësisht. Ia shoi ëndrrat. Ia shoi etjen për dije. Ia shoi shpresën (frymëzimin). Ia shuaj flakën e dashurisë.
6. fig. Zvogëloj a zhduk dalëngadalë diçka, zbut a fshij krejt; rrafshoj, sheshoj. Shuaj dallimet (ndryshimet) mes klasave të ndryshme shoqërore. Nuk i shuan dot dallimet mes dialekteve. I shoi dilemat. E shuan grevën. I shoi kujtimet.
7. kal., fig. E ul dhe e dobësoj diçka pak nga pak derisa të mos ndihet më; mek, pushoj. E shoi zërin. E shuan muzikën dalëngadalë. S’e shuan dot zhurmën. E shoi të qeshurën.
8. kal., edhe fig. Përmbush një nevojë jetësore a dëshirë shpirtërore. Shuaj etjen (urinë). Shuaj mallin (dufin, kureshtjen). E shoi nepsin.
9. kal., bised. I jep fund; shfaros, zhduk nga faqja e dheut; rrënoj, përfaroj. I shoi të gjitha insektet e dëmshme. Lufta e shoi ushtrinë. I vrau e i shoi. E shoi gjithë fshatin. I shoi strukturat paralele. Ua shoi farën i asgjësoi, i zhduku krejt, i përfaroi. Ia shuan oxhakun (shtëpinë, fisin). E shoftë mortja (kolera)! (mallk.)
10. kal., bised. E harxhoj të gjithë pasurinë, i prish të gjitha paratë. I shoi të gjitha lekët. E shoi gjithë kartën e bankës. E shoi gjithë rrogën. E shoi pasurinë.
11. kal., bised. E lodh shumë dikë, e stërmundoj; rraskapit. Vajzën e shoi barra e rëndë që mbante në krah. Më shuan këpucët. Më shoi dhëmballa.
12. kal., bised. E qëlloj fort dikë me dorë a diçka tjetër, e shemb; rrah, kërdis. E shoi me dajak (me shkop, me dru, me hu, me shkelma). E shoi së rrahuri.
13. kal., fig., bised. Bëj diçka me tepri; shemb, kërdis. Të shuan me gënjeshtra.
14. kal., edhe fig. Prish diçka të shkruar; e heq dikë nga lista; fshij. Shuaj fjalën. Shuaj emrin e dikujt. E shuaj me gomë. E shuan nga lista emërore. Kryetari e shoi nga lista kandidatin.
15. kal., fig. Fshij diçka nga kujtesa. E shuaj nga kujtesa (nga mendja).
16. kal. Shkrij në ujë diçka për ta tretur a për ta zbutur etj. Shuaj rakinë (uzon). Shuaj gjellën me verë të bardhë (me ujë, me uthull). Shuaj gëlqeren e shtie gëlqeren e pashuar në ujë, që të bëhet e përshtatshme për t’u përdorur.
17. jokal., bised. edhe fig. Vdes; mbaroj. Shoi ndaj të gdhirë. Epidemia i shoi bagëtitë.
18. jokal., bised., fig. Plas, mbaroj. Shoi së qari fëmija.
✱Sin.: fik, fal, ftoh, mbyll, ndal, ndërpres, fikas, porris, shtyp, mbys, fashis, zbus, ul, qetësoj, resht, dobësoj, platis, mek, mpak, shqim, shugas, tulat, struk, pushoj, shlyej, fshij, çregjistroj, plotësoj, përmbush, asgjësoj, shfaros, zhduk, rrënoj, faroj, rrafshoj, sheshoj, shkatërroj, shkretoj, gjymtis, davaris, zhdavaris, shtyp, mposht, largoj.
♦ As *të kruan e as të shuan (dikush). As *ndez e as shuan (dikush). Është *ndiz e shuaj (dikush). Të shuan *binanë (dikush). Të shuan (të fik) *derën (dikush). E shuaj *etjen (për diçka). Shuaj *flakën. Të shoftë (të ngrëntë, të preftë) *kolera! mallk. Të shuan (të fik) *pishën (dikush). Shuaj *zjarrin.

Ky fjalor është domosdoshmëri për shkrimtarët e për publicistët, për shkollarët e për studentët, për mësuesit e për pedagogët, për studiuesit e për këdo që merret me përdorimin e kultivimin e gjuhës amtare.

Ai u vjen në ndihmë gjithë atyre që merren veçanërisht me gjuhën e shkruar, por edhe të folur, me krijime e me përkthime, me hartimin e fjalorëve të tipave të ndryshëm etj.

...lexo më tepër.


© Akademia e Shkencave e Shqipërisë, 2026 — Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.

www.akad.gov.al
Adresa: Sheshi "Fan Noli", Tiranë