Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
FLAKËRÚAR (i, e) mb. 1. Që është ndezur mirë e lëshon flakë, që digjet me flakë. Zjarre të flakëruara.
2. Shumë i nxehtë, që djeg si flakë. Thëngjill i flakëruar. U dogj nga rëra e flakëruar.
3. Që është skuqur si flakë, i përskuqur. Kishte duar të flakëruara (nga të ftohtët).
4. edhe fig. Që shkëlqen, që shndrit si flakë, vezullues, flakërues. Rreze të flakëruara. Ngjyrë e flakëruar.
5. fig. I zjarrtë, i flaktë; që shpreh një ndjenjë të flaktë. Dëshirë e flakëruar. Vështrim i flakëruar. Zemër e flakëruar.
✱Sin.: i ndezur, i ndeztë, i përskuqur, i skuqur, vezullues, flakërues, i zjarrtë, i flaktë.
FLAKËRÚES,~E mb. 1. Që djeg si flakë, që përvëlon; që shkakton zjarr; i flakëruar. Zjarr (diell) flakërues.
2. edhe fig. Që jep shkëlqim, që shndrit si flakë; vezullues, i flakëruar. Diell flakërues. Ngjyra flakëruese.
3. fig. I zjarrtë, i flaktë. Sy flakërues. Vështrime flakëruese.
4. fig. Shumë i ashpër, që djeg, që përvëlon (për një qortim etj.). Fjalë (kritikë) flakëruese.
✱Sin.: i flakëruar, i flaktë, i zjarrtë, vezullues, i përzjarrshëm, i përflaktë.
NDÉZUR (i, e) mb. 1. Që është me zjarr, që vazhdon të digjet, që ka flakë ose që ka prush; kund. i shuar, i fikur. Urë e ndezur. Zjarr i ndezur. Thëngjij të ndezur. Oxhak i ndezur. Sobë e ndezur. E mbaj të ndezur nuk e lë të shuhet.
2. Që bën dritë, që nuk është shuar. Dritat ishin të ndezura. Llambë e ndezur. E lë të ndezur.
3. Që punon, që vazhdon të punojë; kund. i shuar, i fikur. Motor i ndezur. Kompjuter i ndezur. Rri i ndezur. Kondicioner (aspirator) i ndezur.
4. fig. Që është në zemërim e sipër; që është skuqur nga zemërimi; që zemërohet shpejt, që merr zjarr shpejt. Djalë i ndezur. Flet i ndezur. Me kokë të ndezur. Me sy të ndezur.
5. fig. I zjarrtë, plot gjallëri; i tendosur, i acaruar. Bisedë e ndezur. Diskutim (debat) i ndezur. Atmosferë e ndezur. Situatë e ndezur. Garë e ndezur.
6. fig. Që i kapërcen kufijtë e zakonshëm, i theksuar, i fuqishëm. Fantazi (imagjinatë) e ndezur.
7. Që ka ngjyrë të fortë të hapur, e cila bie shumë në sy, që ndrit fort. E kuqe e ndezur. Portokalli e ndezur. Ngjyra të ndezura. Lule të ndezura.
✱Sin.: i pashuar, i flakëruar, bubulak, i ndeztë, i kallur, brambullitës, i hapur, i çelur, i lëshuar, qejfmbetur, i pezmatuar, i përndezur, i thekshëm, i zemëruar, i kërcyer, i zjarrtë, i skuqur, i zjarrtisur, i zijosur, i flaktë, i tendosur, i gjallë, i nderë, i acaruar, i theksuar, i ndritshëm, i fuqishëm, e ngridhur.
♦ Me *gjak të ndezur. E mbaj të ndezur (ndezur) (diçka) nuk lë të bjerë forca, interesimi a vëmendja për diçka, nuk e lë të shuhet. Me *ngjyra të ndezura libr. *Spicë e ndezur keq.
PËRVËLÚES,~E mb. 1. Që ka një nxehtësi të madhe, që të djeg shumë dhe menjëherë. Rërë përvëluese. Rrezet përvëluese të diellit.
2. Që vjen me nxehtësi të madhe, që të sjell shumë të nxehtë a zjarrmi. Ethe përvëluese.
3. fig. Që të bën të vuash ose të digjesh përbrenda. Etje përvëluese. Dëshirë përvëluese. Mall përvëlues.
4. fig., libr. Që është tepër i rëndësishëm dhe kërkon një zgjidhje të shpejtë, që s’duron. Çështje përvëluese.
✱Sin.: përcëllues, zhuritës, djegës, valë, i flakëruar, flakërues.
SKÚQUR (i, e) mb. 1. Që është skuqur; që ka marrë ngjyrë të kuqe a të kuqërremtë. Domate të skuqura (domate të pjekura).
2. Që është fërguar me yndyrë, i fërguar, i tiganisur. Mish i skuqur. Patate të skuqura. Qepë e skuqur.
3. Që është nxehur sa ka marrë ngjyrë të kuqe. Tel i skuqur. Hekur i skuqur.
4. Që është bërë si i kuq në fytyrë a në një pjesë tjetër të trupit nga ardhja e gjakut me shumicë për shkak të të ftohtit, të të nxehtit, të ndonjë sëmundjeje etj. I ka grykët të skuqura. Me sy të skuqur.
5. fig. bised. Që ka sedër e cipë, që turpërohet lehtë. Është vajzë e skuqur.
✱Sin.: i kuqur, i stërkuqur, i përskuqur, i ndezur, i përndezur, i mbërdhezur, i përskuqur, i përkuqur, i lëkuqur, i përgjakur, i kuqërrisur, i kuqërruar, i flakëruar, i flakëritur.
♦ E bëri për *gjalpë të skuqur (dikë). E hëngri *telin e skuqur (dikush) përçm. vulg.
ZJÁRRTË (i, e) mb. 1. Që ka nxehtësi shumë të madhe dhe ndriçim verbues, që të djeg si zjarr, që është si zjarr; që digjet si zjarr. Lëmsh i zjarrtë. Brumë i zjarrtë. Diell i zjarrtë. Rreze të zjarrta. Lumë i zjarrtë llave. Balli i zjarrtë ishte skuqur dhe ishte mbuluar me djersë.
2. Shumë i kuq (zakonisht në fytyrë), i prushtë, lulekuqe. I kishte faqet të zjarrta.
3. fig. Që është i pakapërcyeshëm a i pathyeshëm, që e vë dikë në një gjendje shumë të vështirë e pa shpresë shpëtimi. Darë (unazë) e zjarrtë. Rreth (zinxhir, rrethim) i zjarrtë. Mbrojtje e zjarrtë.
4. fig. Që ka dëshirë të madhe për diçka, i dhënë me mish e me shpirt pas diçkaje; që është shumë i vendosur e guximtar, që ka shpirt luftarak; i flaktë. Luftëtar (atdhetar) i zjarrtë. Mbrojtës (mbështetës) i zjarrtë. Rini e zjarrtë. Skuadër e zjarrtë. Me zemër (me shpirt) të zjarrtë. Pamja e zjarrtë e Dijes i futi dridhmën.
5. fig. Që bëhet me vrull dhe pa u përmbajtur, i fortë; që shpreh ndjenja të fuqishme, shumë i ngrohtë, i ndezur, i flaktë. Dashuri (dëshirë) e zjarrtë. Ndjenja të zjarrta. Përshëndetje (përgëzime, urime) të zjarrta. Përkrahje (pritje) e zjarrtë. Vështrim i zjarrtë. Lutje e zjarrtë. Shprehje e zjarrtë e miqësisë së ngushtë. Ndërkaq, nga autobusi fluturoi një këngë e zjarrtë, burrërore, e shoqëruar me thirrje të rinjsh. Me sytë e zjarrtë, të ndezur si nga një vetëtimë, shihte luftëtarët që hidheshin në sulm.
5. fig. Shumë i gjallë e i fuqishëm, që bëhet e zhvillohet me tërë forcën; që zien, që vlon, i flaktë (për diskutimet etj.). Betejë e zjarrtë. Ditët e zjarrta të luftës. Atmosferë e zjarrtë. Diskutim (fjalim) i zjarrtë. Mbledhje e zjarrtë. Fjala e tij e zjarrtë është shqiptuar madhështore dhe dhembshurore. Një debat i zjarrtë kishte shpërthyer ato ditë të dhjetorit.
✱Sin.: i përzjarrshëm, i përflaktë, i flaktë, i flakëruar, flakërues, i prushtë, i pashuar, i fortë, i ndeztë, zjarrmor, i gjallë, i fuqishëm, i vrullshëm, luftarak.
♦ Me *zemër (me shpirt) të zjarrtë.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë