Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
CELEBR/ÓJ vep., ~ÓVA, ~ÚAR kal. 1. zyrt. Bëj veprimet zyrtare të martesës në zyrën e gjendjes civile. Celebroj martesën.
2. fig. Përkujtoj dhe festoj një datë a një ngjarje të shënuar. Celebroj një ngjarje. Celebron fitoren. Celebruan parlamentarizmin e demokracinë shqiptare.
3. fet. Kryej një shërbesë fetare. Celebroi meshën.
DÁSM/Ë,~A f. sh. ~A, ~AT etnogr. Festë që bëhet me rastin e martesës, e shoqëruar me një ceremoni të gëzueshme. Dasmë e madhe (e thjeshtë). Zakonet e dasmës. Këngë dasme. Ftesë dasme. I zoti i dasmës. - Në dasmë të djalit (të vajzës)! (ur.). - Në dasmë të të pamartuarve! (ur.) Bëj dasmë. Ftoj për dasmë. -Të ngrënçim dasmën! (ur.). Atje ku bëhet dasmë e madhe, merr lugë të vogël! (fj. u.). Po dëgjove daullen, dasmën e ke prapa (te dera.) (fj. u.). Mos rri si nusja në dasmë. (fj. u.). S’bëhet dasmë pa nuse (fj. u.). 2. Dita kur bëhet kjo festë. Dita (java) e dasmës. Në shtator ka shumë dasma. - Kur e ka dasmën? Shkoj në dasmë.
♦ Bëj dasmë e festoj me gëzim të madh diçka që mezi e pres; jam në gaz e hare. E bën dasmën me një *këngë (dikush). Dasmë pa aheng. 1. Punë së cilës i mungon gjëja kryesore, ajo që e karakterizon dhe i jep lezet. 2. shih gjellë pa kripë. Dasmë minjsh (diku) tall. rrëmujë e madhe; ngjarje a mjedis me rrëmujë e zhurmë, ku secili nuk di kush është e çfarë po bën; nuk e merr vesh (nuk e njeh) i pari të dytin. Ç’t’u desh dasma në Karbunarë! iron. pse ia hyre kësaj pune që nuk e bën dot; pse u ngatërrove në këtë çështje që nuk të takon e që të prish punë. Gjetkë *daullet e gjetkë dasma. I kërcen *arusha në dasmë (dikujt). Kërcen pas dasme (dikush) është shumë i vonuar për një punë, kujtohet vonë për diçka, nuk e bën në kohën e duhur; nis vallen kur pushon daullja; (është) si kofini pas së vjeli (pas të vjelave); (është) pushkë pas lufte; vjen pas pilafit. Lë dasmën e shkon për shkarpa (dikush) lë një punë të rëndësishme a të ngutshme e merret me një punë të parëndësishme, jo të domosdoshme e jo të ngutshme; nuk i vlerëson drejt gjërat; lë të vdekurin e shkon në dasmë; lë zanatin e zë zurnanë. Lë *të vdekurin e shkon në dasmë (dikush) keq. E prish dasmën për një *limon (dikush). Ta prish dasmën për një tas çorbë (dikush) shih e prish dasmën për një limon (dikush).
INAUGUR/ÓJ vep., ~ÓVA, ~ÚAR kal. Bëj një ceremoni zyrtare kur fillon të ndërtohet ose kur përfundon së ndërtuari një vepër industriale, një rrugë etj., kur fillon veprimtarinë një institucion etj.; kremtoj vënien në punë a në përdorim të diçkaje, festoj fillimin e saj; përuroj. Inauguruan uzinën (fabrikën, teatrin e ri).
✱Sin.: përuroj, kremtoj.
KREMT/ÓJ vep., ~ÓVA, ~ÚAR 1. fet. E bëj ditë pushimi një të kremte; festoj. Kremtojmë Pashkët (ditën e Pavarësisë).
2. Përkujtoj një ngjarje të rëndësishme. Kremtuam ditëlindjen (përvjetorin).
✱Sin.: festoj, përkujtoj, lus.
SHAMPÁNJ/Ë,~A f. sh. ~A, ~AT 1. Lloj vere e bardhë e gazuar, e prodhuar në Francën Verilindore, e cila flluskon kur shërbehet në gotë. Shampanjë e ëmbël (gjysmë e ëmbël). Festojmë me shampanjë. Flluska shampanje u përhapën. Një nga shampanjat më të shtrenjta.
2. si mb. Ngjyrë e verdhë e zbehtë portokalli, ngjyrë shampanjë. Fustan ngjyrë shampanjë. Ngjyra shampanjë i pëlqente.
♦ Hap shampanjën libr. e shpall a e quaj një punë, një marrëveshje etj. të përfunduar dhe nis ta festoj, jap shenjën për ta festuar me gëzim.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë