Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
ALAMBIK/ÓJ vep., ~ÓVA, ~ÚAR kal. 1. Distiloj me alambik; përpunoj lëndë të lëngshme me distilim; distiloj verë me alambik për të përftuar konjak; distiloj, rafinoj. Alambikoj lëndë të lëngshme përmes procesit të distilimit. Alambikoi vajin esencial nga lulet e lavandës. E alambikova vetë rakinë.
2. Përpunoj diçka dhe nxjerr diçka të re.
3. fig. Sajoj ose përftoj diçka, përpunoj me kujdes mendime, ndjenja, fjalë. Poeti alambikon fjalë që gdhenden me ndjenjë të hollë. Idetë e tij i alambikoi me një filozofi të urtë.
✱Sin.: distiloj, përpunoj, përftoj, sajoj, rafinoj, stërholloj, tëholloj.
DISTILÍM,~I m., tek. 1. Veprimi kur distiloj diçka; shndërrimi i një lëngu në avull duke e ngrohur dhe pastaj duke e kthyer avullin përsëri në gjendje të lëngët nëpërmjet ftohjes, me qëllim që të pastrohet nga lëndët e panevojshme ose të tretura në të. Distilimi i naftës (i ujit, i verës, i alkoolit). Fabrikë distilimi. Reparti i distilimit.
2. Mënyra se si distilohet diçka. Distilim i thatë. Distilim me avull.
KULL/ÓJ vep., ~ÓVA, ~ÚAR 1. kal. Pastroj një lëng nga papastërtitë a turbullirat me anë të një kulloreje, të një nape etj. Kulloj djathin (gjizën, qumështin).
2. spec., kal. Distiloj.
3. jokal., vet. v. III Bie llumi në fund. Kullon llumi.
4. jokal., vet. v. III Rrjedh pika - pika (për një lëng); rrjedh një shtambë, një enë e shpuar etj. Kullon uji (vaji). Kullon bucela. I kullon djersa në faqe.
5. fig., bised., kal. E bëj më të qartë; e sqaroj a e qartësoj diçka (një ide, një mendim etj.). E kulloi më mirë problemin.
✱Sin.: pastroj, filtroj, distiloj, rrjedh, kthjelloj, fundërron.
♦ Më kulloi *djersa. I kullojnë (i shkojnë) *jargët (dikujt). Ia kulloi *mendjen (dikujt). Më kulluan *sytë (për dikë a për diçka). As kullon e as turbullon (dikush) nuk përzihet në asnjë punë, nuk trazon njeri, rri mënjanë; as ndihmon e as prish punë; as prish e as ndreq. As turbullon e as kthjellon (e as kullon) (dikush).
PASTR/ÓJ vep., ~ÓVA, ~ÚAR kal. 1. E bëj të pastër, i heq papastërtitë, i heq pluhurin, plehrat, baltën, lyrën, bojën etj. me fshesë, me furçë, me leckë të lagur, me ujë me sapun a me detergjent etj., Pastroi shtëpinë (dhomën). Pastroi rrobat (këpucët). Pastroj xhamat. Pastroj biçikletën (makinën). Pastroj dhëmbët. Pastroj me fshesë. Pastroj me ujë (me alkool).
2. tek. I heq ndryshkun diçkaje duke e fërkuar; e fshij dhe e bëj të shkëlqejë, i jap shkëlqim.
3. I heq mbeturinat a çdo gjë tjetër që e zë, e ndalon, e prish etj.; largoj gjërat që e kanë zënë dhe që të pengojnë për të kaluar, për të punuar etj. Pastroi kanalin. Pastroj çatinë nga dëbora. I pastroi rrugën. Ia pastroi tryezën..
4. vet. v. III I heq puçrrat, dregëzat ose njollat në fytyrë e në lëkurë, e qëron; ia lan organizmin nga diçka e keqe, e dëlir. Ia pastroi fytyrën.
5. vet. v. III E kthjellon, i largon retë. Era e pastroi qiellin (motin).
6. E qëroj nga lëndët e huaja, nga pluhuri etj., e bëj të kulluar a të pastër. Pastroj ujin (ajrin). Pastroj arën nga gurët (nga ferrat).
7. I heq cipën, lëkurën ose pjesë të tjera të panevojshme një sendi ushqimor përpara se ta gatuaj ose përpara se ta ha, qëroj. Pastroj peshkun. Pastroj perimet. Pastroje mollën (dardhën)!
8. E çliroj a e shpëtoj një vend duke dëbuar ose duke asgjësuar pushtuesin. Pastroi vendin nga pushtuesit.
9. Heq atë që është e huaj, e tepërt, e panevojshme ose e dëmshme; e bëj më të qartë dhe më të kuptueshme diçka. Pastroj gjuhën nga fjalët e huaja. Pastroj programet (tekstet) nga lënda e tepërt.
✱Sin.: paqoj, paqësoj, fshij, laj, spastroj, shpëlaj, dëlir, heq, marr, shkrimb, shkërmoj, çndot, qëroj, kulloj, filtroj, rafinoj, brizoj, distiloj, kthjelloj, hap, spërndris, shkëlqej, shkëlqar, shpluhuroj, qiqëroj, shkërmoj, përlaj, rruaj, kruaj, brushoj, shkund, fajkoj, zbardh, lëmoj, planoj, sheshoj, zdrukthoj, harr, tëharr, zgrathoj.
♦ Pastroje (laje) *gojën! iron. Ma pastroi *rrugën (udhën) (dikush). Ma pastroi udhën (*rrugën) (dikush).
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë