Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
DALLÍM,~I m. sh. ~E, ~ET 1. Veprimi kur dalloj dikë a diçka; ndarja a veçimi i dikujt ose i diçkaje sipas tipareve. Dallimi i ngjyrave (i tingujve). Dallimi i shenjave. Dallimi i së mirës nga e keqja. Bëj dallim.
2. Veçori a tipar që e bën dikë a diçka të dallohet nga një tjetër; ndryshim. Dallime klasore. Dallime dialektore. Dallime në ngjyra (në masë, në peshë). Dallimet ndërmjet qytetit e fshatit. Dallimi ndërmjet punës mendore e punës fizike. Kanë dallime të mëdha (të shumta, cilësore).
3. Trajtim i pabarabartë i njerëzve, i sendeve a i çështjeve, duke parapëlqyer dikë a diçka ose duke i vlerësuar sipas disa veçorive e kritereve të ndryshme. Dallim racial. Bën (s’bën) dallime. I morën (i pranuan) të gjithë pa dallim.
✱Sin.: shquarje, njohje, diktim, diferencë, diferencim, ndryshim, ndryshesë, spikatje, cilësim, karakterizim, pabarazi.
DIKTÍM,~III m. sh. ~E, ~ET 1. Ushtrim me shkrim që mësuesi u bën nxënësve në klasë, duke u lexuar një tekst; teksti që lexohet në këtë ushtrim. Diktim i tekstit. Diktim me zë të lartë. Diktim sqarues (kontrolli). Diktim për përdorimin e presjes. Ora e diktimit. Fletorja e diktimit. Bëjnë diktim.
2. Shtrëngim a detyrim i dikujt që të bëjë diçka. Diktimi i vullnetit. Diktimi i kushteve. Nën diktimin e vendimeve.
DIKTÚAR (i, e)II mb. 1. Që është i dhënë me diktim (zakonisht në tekst), në mënyrë që nxënësit të shkruajnë bukur e pa gabime. Tekst i diktuar.
2. I detyruar nga kushtet a rrethanat. Kjo ishte e diktuar nga kushtet objektive të kohës. Vështirësi të diktuara nga ekonomia e tregut. Sjellje e diktuar nga rregullat shoqërore.
HETÍM,~I m. sh. ~E, ~ET drejt. 1. Veprimi kur zbuloj diçka duke u nisur nga disa të dhëna paraprake; shqyrtimi i një çështje sipas të dhënave që njohim ose mbledhim. Hetim gjyqësor. Hetim i përgjithshëm (paraprak). Hetimi i çështjes. Organet e hetimit. Komisioni i hetimeve. Bëj hetime.
2. Vëzhgim i rrethanave dhe shqyrtim i tyre për të zbuluar një faj a krim ose një kundërvajtje penale. Hetimi i një çështje penale.
3. Fakte dhe prova të një krimi ose një kundërvajtje penale. Kundërshtojnë hetimin e SPAK-ut.
✱Sin.: vëzhgim, gjurmim, hulumtim, shqyrtim, kërkim, diktim, pikasje.
ZBULÍM,~I m. sh. ~E, ~ET 1. Veprimi kur zbuloj diçka; heqja e mbulesës, e veshjes a e mbështjelljes së dikujt a së diçkaje; kund. mbulim. Zbulimi i trupit. Zbulimi i kokës. Zbulimi i përmendores. Zbulimi i makinës. Zbulimi i pllakës përkujtimore.
2. Gjetja e diçkaje të mbuluar në tokë duke gërmuar etj., pasi është kërkuar për një farë kohe; dalja në dritë e diçkaje të fshehur a të mbuluar. Zbulimi i thesarit. Zbulimi i rrënjëve. Zbulimi i mineralit. Zbulimi i rrënojave (i mureve) të kështjellës. Zbulimi i një vendbanimi të ri.
3. Diçka e re a e panjohur më parë, e cila zbulohet, gjendet a del në dritë pas një kërkimi të gjatë dhe një pune këmbëngulëse; ajo që zbulohet, gjetje, shpikje. Zbulim i ri (i madh, i papritur). Zbulimet e fundit. Zbulimet gjeografike (arkeologjike). Zbulim shkencor. Zbulimi i penicilinës. Zbulimi i energjisë atomike. Zbulimi i një ligji të shkencës. Zbulimi i radioaktivitetit.
4. usht. Mbledhja e të dhënave të ndryshme për armikun, për terrenin, për mjedisin etj., që bëhet në mënyrë të fshehtë ose duke hapur zjarr nga njësi a grupe të caktuara në vendin ku parashikohet të zhvillohen veprime luftarake; njësi a grup i caktuar luftëtarësh që kryen këtë veprimtari; kund. kundërzbulim. Zbulimi ajror (taktik). Zbulim me luftim (me zjarr). Aeroplan zbulimi. Fluturime zbulimi. Fotografi zbulimi. Toga (skuadra) e zbulimit. Grupet e zbulimit. Doli (shkoi) për zbulim. Për qëllime zbulimi.
5. Organ i posaçëm, agjenci a strukturë shtetërore, që ka për detyrë të marrë, të mbledhë e të studiojë të dhëna të fshehta për veprimtarinë dhe gjendjen ekonomike, politike, ushtarake etj. të një vendi a të vendeve të tjera; kund. kundërzbulim. Zbulimi dhe kundërzbulimi. Zbulimi armik (i huaj). Zbulimi ushtarak. Organet e zbulimit. Oficer (punonjës) i zbulimit.
6. Nxjerrja a dalja në shesh e dikujt a e diçkaje të fshehur a që është bërë në fshehtësi; shpërfaqje; pikasje e dikujt apo diçkaje; kund. fshehje. Zbulimi i kriminelëve. Zbulimi në kohë i krimit (i vjedhjes, i tradhtisë). Zbulim i veprimtarisë së jashtëligjshme. Zbulim i shpërdorimeve. Zbulimi dhe parandalimi i veprave kriminale. Zbulimi i planit të sulmit.
7. sport. Dalje e lojtarit në pozicion të pambuluar nga kundërshtari. Zbulimi i pozicionit të mbrojtësit (i sulmuesit, i mesfushorit).
✱Sin.: zhveshje, çmbështjellje, heqje, gjetje, shpikje, shpërfaqje, dukje, pikasje, nxjerrje, njoftim, paraqitje, parashtrim, diktim.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë