Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
CIR/K,~KU m. sh. ~QE, ~QET 1. Ndërtesë a sallë zakonisht e rrumbullakët, me vende për spektatorët dhe me arenë në mes, ku jepen shfaqje shkathtësie e force nga akrobatë, zhonglerë etj. ose me kafshë të zbutura; tërësia e shfaqjeve të tilla; institucioni që merret me organizimin e këtyre shfaqjeve; trupa e artistëve që marrin pjesë në këto shfaqje; arti teatral me këta pjesëmarrës. Cirk për fëmijë. Cirk shëtitës. Biletë cirku. Arena e cirkut. Drejtuesi i cirkut. Arti i cirkut. Artist cirku. Orkestër cirku. Shfaqje cirku. Kafshë cirku. Punon në cirk. Shkoj në cirk. I pëlqen cirku.
2. gjeol. Greminë, grope e madhe e rrumbullakët dhe me shpate të pjerrëta, që është formuar nga akullnajat ose nga vullkanet; grope në trajtë unaze, krater i një lloji të veçantë në sipërfaqen e Hënës. Cirk akullnajor. Cirk hënor.
CIRK/ÓJ vep., ~ÓVA, ~ÚAR (CËRK/ÓJ) 1. kal. Lag a spërkat me ujë ose me një lehtë lëng tjetër; e spërkat, e stërpik. Cërkoj hardhitë me gurkali. Cirkoj me baltë.
2. kal. Mjel dhitë ose delet kur kanë pak qumësht, shkrënd. Cirkoj dhitë (lopët).
3. jokal. Bie ujët ose një lëng tjetër pika-pika, rrjedh me cirka; pikon nga pak. Cirkon shiu. Cirkon gjaku. Cirkon çatia.
✱Sin.: stërpik, cirkat, cërkon, pikon, çikëlon, çik, gjerbon, qan, shkrënd.
EKUILIBRÍST,~I m. sh. ~Ë, ~ËT Ai që është i zoti në lojërat e ekuilibrit; akrobat që bën lëvizje të cilat kërkojnë drejtpeshim. Ekuilibristi në cirk mbi një fije teli. Ekuilibristi thyen rekord duke ecur mes dy balonave. Ekuilibristi që sfidon lartësitë.
MËS/ÓJ vep., ~ÓVA, ~ÚAR 1. kal. I jap dikujt arsim e edukatë ose njohuri nga një fushë e dijes nëpërmjet mësimit sipas një programi të caktuar; i jap mësim dikujt, jam mësuesi i dikujt. U mësoi nxënësve si të përdornin kompjuterin.
2. kal. dhe jokal. Marr njohuri, përvetësoj dije nga një fushë e caktuar, studioj një lëndë mësimore etj.; nxë. Mësoj mësimet. Mësoj programim. Mësoj një vjershë përmendsh. Shkojnë në shkollë për të mësuar. Sa të rrosh, do të mësosh. (fj. u.).
3. jokal. Ndjek mësimet, jam nxënës në një shkollë a në një kurs; synoj të pajisem me njohuri për diçka. Mëson në shkollë (në kurs, në universitet). Mëson për elektricist (për programues).
4. kal. Ndihmoj dikë nëpërmjet ushtrimeve e mësimeve që të fitojë shprehi për të bërë një punë të caktuar. E ka mësuar djalin të ngasë makinën. I mësoi biçikletën (notin) të birit.
5. kal. Ushtroj dorën, gishtat etj. për të bërë veprime të caktuara, stërvit. Mëson dorën për vizatim. Mësoj veshin për të dalluar tingujt.
6. kal. Stërvit një kafshë për ta bërë të aftë të kryejë veprime sipas dëshirës së njeriut. Babai i saj mëson kafshët në një cirk. Mëson qenin për gjah.
7. kal. Bëj përpjekje për të fituar shprehi për punë a për të bërë veprime të caktuara, përpiqem të përvetësoj a të zotëroj një mjeshtëri, një detyrë etj.; stërvitem në diçka, ushtrohem me diçka, nxë mënyrën se si të përdor diçka a të bëj një punë. Mësoj një zanat. Mësoj të përdor një aparat. Mësoj përdorimin e armëve. Mësoj biçikletën (notin). S’mëson kali revan në pleqëri. (fj. u.).
8. kal. E këshilloj dikë se si duhet të sillet e të veprojë, i tregoj rrugën që duhet të ndjekë, e udhëzoj; e edukoj. Si më mëson të bëj? E mëson mirë fëmijën. E ke mësuar keq nipin. U bë veza të mësojë pulën! (iron.).
9. jokal. Vë mend, fitoj përvojë nga një pësim; përfitoj nga përvoja e dikujt a nga diçka, marr mësim. Mësoi nga pësimi (nga gabimet). Mësova shumë prej tij.
10. kal. I tregoj dikujt se ku ndodhet diçka a se ç’ka ndodhur. I mësoi të rejat e ditës. Hajde, baba, të të mësoj arat! (fj. u., iron.)
11. kal. Marr njoftim për diçka, marr vesh; dëgjoj. Mësova një lajm (diçka të re). Mësova se do të vijë nesër. I mësuam të gjitha sa na shkruanit.
12. kal. Zbuloj, gjej. Mësuan një të fshehtë. Ia mësoi hilenë (marifetin) kësaj pune.
✱Sin.: nxë, stërvit, shkolloj, arsimoj, studioj, stërvitem, shkollohem, arsimohem, ushtroj, ushtrohem, përgatitem, këshilloj, dëgjoj, nxjerr, zbuloj, përshtat, familjarizoj, ambientoj.
SHËTÍTËS,~E mb. 1. Që kalon nga një vend në një tjetër. Koncert shëtitës. Cirk (teatër) shëtitës. Trupë shëtitëse. Muzikant shëtitës. Turist shëtitës. Art shëtitës. Shitës shëtitës. Berber shëtitës. (vjet.) Brigadë artizanati shëtitëse. Ambasador shëtitës (dipl.).
2. fig. Që ka disa adresa dhe të cilit nuk i identifikohet vendi i banimit, zakonisht për zgjedhjet. Votues shëtitës zgjedhës të regjistruar në disa vende.
✱Sin.: i dalë, i bredhur, i dalë, i gjezdisur, i baritur, i shëtitur.
ZHONGLÉR/E,~JA f. sh. ~E, ~ET 1. Artiste cirku, që hedh e pret me shkathtësi sende të ndryshme njëri pas tjetrit ose bën numra të tjerë shpejtësie. Zhonglere në cirk. Shkathtësi zhonglereje.
2. fig., keq. Vajzë a grua që vepron e punon me dredhi; femër pa parime në jetë, që nuk e mban fjalën e që kthehet nga të fryjë era, ajo që e ndryshon shpesh qëndrimin e saj sipas interesit; dredharake. Zhonglere dinake. Është zhonglere në punën e saj. Vepron si zhonglere.
ZHONGL/ÓJ vep., ~ÓVA, ~ÚAR jokal. 1. Manipuloj, hedh dhe kap disa objekte (si topa, unaza ose sende të tjera) në ajër në mënyrë të sinkronizuar, zakonisht për argëtim ose performancë. Zhonglonte me unaza në cirk. Artistët luajnë e zhonglojnë dhe marrin duartrokitje e fishkëllima.
2. Punojmë a veproj me dredhi, ndryshoj qëndrim sipas interesit, kthej gunën nga fryn era. Ka zhongluar në çdo rast. Mos zhonglo se do të humbasësh. Ka zhongluar në çdo rast. Mediat zhonglojnë mes tyre për ta mahnitur dhe trullosur konsumatorin, si burim kryesor i lajmeve.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë