Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
AR,~II m. 1. kim. Metal i rrallë e i çmuar, me ngjyrë të verdhë, që është i butë e punohet mirë dhe që përdoret për të bërë sende zbukurimi, monedha etj. ose si masë vlere; flori (simboli Au). Ar i pastër (i kulluar). Shufër ari. Monedhë ari. Medalje (unazë, kupë, dhëmbë etj.) ari. Fill ari. Minierë ari. Ngjyrë ari. I larë me ar. Vesh me ar.
2. Fill i praruar që përdoret për qëndisje; bised. veshje e qëndisur me këtë fill. Jelek ari. Qëndis me ar. I veshur në ar.
3. Pjesë e parë e emërtimeve të pathjeshta për lloje të ndryshme ari ose sende të tjera: Ar i bardhë kim. metal fisnik që krijon lidhjen ar, nikel e platin dhe përdoret për bizhuteri dhe si shtresë në emetimin e të hollave. Ar 12-karatësh ar me pastërti pesëdhjetë për qind. Ar 18-karatësh ar me pastërti shtatëdhjetë e pesë për qind. Ar 24-karatësh ar me pastërti mbi nëntëdhjetë e nëntë për qind.
♦ Ar i bardhë libr. pambuk. Ari i gjelbër libr. drurët e pyjeve si lëndë shumë e vlefshme për ndërtim, për orendi etj.; pyjet si pasuri e madhe. Ari i zi libr. nafta ose qymyri si pasuri të mëdha për njerëzimin. I ra ari në *ujë (dikujt). *Fjalë ari (e artë). Merr ar pa kapar (dikush) mëson e fiton mençuri nga cilido, është i hapur për të përfituar kurdoherë e nga kushdo. Të peshon me ar (me *flori). Ta shet bakrin për ar (dikush) shih ta shet sapunin për djathë (dikush).
CILIDÓ, CILADÓ pacak., sh. CILËTDÓ, CILATDÓ 1. Secili nga një grup frymorësh ose sendesh të njëjtë, çdo njeri ose çdo send i një grupi të njëjtë pa dallim; njëri, kushdo qoftë, i marrë veças nga ata që bën pjesë në këtë grup. Cilido qoftë. Cilido që të jetë. Nga cilido vend. Flet me cilindo.
2. Secili (secila).
✱Sin.: kushdo, gjithkush, çdokush, çdo, çdonjëri, dokushdo, çfarëdo, secili (secila).
KUSH përem. (gjin. i,e kujt; dhan. kujt; kallëz. kë) 1. pyet. Përdoret për të pyetur për cilin njeri në mënyrë të drejtpërdrejtë a të tërthortë; cili a cila. Kush është ai? Me kë po flet?
2. pacak. Përdoret për një njeri e shoqëruar me pjesëzën ja në mënyrë retorike, gjë që nënkupton një përgjigje mohuese dhe të pacaktuar. S’e di se kush është (ka ardhur). Ja, kush qenka (qenka)!
3. pacak. Përdoret për të treguar një frymor me kuptimin «ai njeri që, kushdo që, cilido që». Kush punon, ha (fj. u.); kush kërkon, gjen (fj. u.).
4. pacak. Askush; kurrkush. Atë s’e donte kush.
5. si lidh. Lidh dy fjali kryefjalore. Kush kërkon, gjen (fj. u.).
✱Sin.: cili, cila, askush, kurrkush.
♦ Nuk i çon kujt *pluhur (dikush). S’është *e keqja e kujt (dikush). S’e ka kush (dikë) është shumë i mirë, i sjellshëm e i gjendshëm; nuk e ka shokun (dikush); S’i gjendet *shoku (dikujt). S’ia sheh kush *të keqtë (dikujt).
NDONJË́ pacak. Një frymor, një send ose një dukuri nga një varg i njëjtë; njëri cilido, diçka çfarëdo. Ndonjë njeri. Ndonjë ditë. Ndonjë punë (çështje). Ndonjë gëzim (hidhërim, përshtypje). Ndonjë prej tyre. Më jep ndonjë. Në ndonjë rast. Në ndonjë mënyrë. Ç’kemi ndonjë të re?
✱Sin.: ndokush, shumëkush, dikush, ndonjëri, njëri, cilido, diçka, çfarëdo.
SHQIPTÚES,~I m. sh. ~I, ~ IT 1. Ai që shqipton. Cilido shqiptues. Shqiptues të ndikuar nga dialekti.
2. Shpallës i një mendimi, opinioni. Shqiptues i vendimit përfundimtar.
ÇDO pacak. 1. Përdoret përpara një emri në numrin njëjës për të shënuar secilin frymor a send ose secilën dukuri që janë të një natyre dhe që merren veçan nga tërësia; shënon një frymor, një send a një dukuri për të treguar tërësinë e vet pa asnjë përjashtim, duke i përmbledhur të gjithë; cilido, çfarëdo. Çdo njeri. Çdo gjë gjithçka. Çdo vështirësi (pengesë). Në çdo fushë. Në çdo kohë (orë) kurdo. Në çdo vend kudo. Në çdo skaj. Në çdo rast. Për çdo njeri. Për çdo gjë. Për çdo fjalë. Nga çdo anë nga të gjitha anët. Nga çdo pikëpamje. Me çdo mënyrë (mjet). Me çdo rrugë. Jashtë çdo rregulli. Të çdo shkalle (lloji). Më parë se çdo gjë para së gjithash. Për çdo rast për të gjitha rrethanat a nevojat që mund të dalin. Pëlhura të çdo ngjyre. Përjashton çdo mundësi. Heq çdo shpresë. Ha çdo gjë. E gjithë klasa e përpinte çdo fjalë që dilte nga goja e plakut. Qante çdo natë në shtrat. Nuk bën mjaltë çdo mizë. (fj. u.).
2. Përdoret përpara një togu të përbërë nga një numëror dhe një emër për të shënuar secilën nga periudhat e përsëritura të kohës ose secilën nga pjesët e hapësirës në të cilat kryhet ose ndodh diçka; secila njësi kohe nga një varg njësish të përsëritura. Në çdo dy javë. Në çdo tri orë. Në çdo katër vjet. Çdo dy hapa. Çdo pesë metra. Çdo ditë. Çdo vit. Çdo orë. Çdo herë. Çdo javë (muaj). Çdo ditë e më shumë.
3. Përdoret me parafjalën “për” përpara një togu të përbërë nga një numëror dhe një emër, kur frymorët, sendet a dukuritë që shënon ky tog merren si një tërësi më vete. Për çdo tre veta. Për çdo katër metra. Për çdo dhjetë banorë.
✱Sin.: cilido, çfarëdo, secili.
ÇFARËDOLLÓJ pacak. Çdo lloj, çfarëdo lloji, cilido lloj, gjithfarë. Çfarëdolloj pune. Çfarëdolloj libri. Çfarëdolloj ngjyre. Me çfarëdolloj arme. Në çfarëdolloj rrethanash.
✱Sin.: çfarëdo, gjithfarë.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë