Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
AKREDITÍM,~I m. sh. ~E, ~ET dipl. 1. Veprimi kur akreditoj ose kur akreditohem.
2. Dhënie e besimit, e autorizimit, e kompetencës ose e njohjes zyrtare dikujt ose një institucioni; dhënia e një dokumenti njohës e vlerësues në fushën e diplomacisë, të arsimit, të ekonomisë ose të administratës. Jep zyrtarisht akreditimin. Dokument akreditimi. Vendim akreditimi. Letër akreditimi.
3. drejt. Autorizim ligjor, kompetencë ligjore për diçka. Akreditim i kompetencës.
✱Sin.: autorizim, besueshmëri, njohje, prokurë, certifikim, kompetencë.
AKREDIT/ÓJ vep., ~ÓVA, ~ÚAR kal. 1. drejt. Autorizoj dikë për besueshmëri, i jap fuqi ligjore e besimi dikujt; garantoj, siguroj. Akreditoj një komision për të ushtruar të drejtën e inspektimit në arsim. E akredituan përkthyes.
2. I jap kompetencë dikujt për kryerjen e hetimeve, e kontrolleve, e certifikimeve, e inspektimeve, e matjeve të caktuara, licencoj. Ka qenë akredituar noter.
3. dipl. Caktoj ose autorizoj dikë si përfaqësues diplomatik në një shtet tjetër. E akredituan ambasador. Akreditoj si diplomat një person të autoritetshëm.
✱Sin.: autorizoj, besoj, njoh, prokuroj, certifikoj.
AKTÍV,~EI mb. 1. libr. Që është i gjallë, i palodhshëm, veprues; që vepron me gjallëri e shpejtësi, që nuk është pasiv, që merr pjesë vetë e me zell në një punë; që bëhet a që zhvillohet në mënyrë të gjallë e vepruese; kund. pasiv. Njeri aktiv. Jetë aktive. Punë aktive. Veprimtari aktive. Pjesëmarrës aktiv. Anëtar aktiv. Paraqitje aktive. Mbrojtje aktive. Pushim aktiv. Luan rol aktiv. Ndikim aktiv. Qëndrim aktiv. Tregohet aktiv. Bashkëpunim aktiv. Besueshmëri aktive. Adresë elektronike aktive. Faqe interneti aktive. Shpallje aktive. Fëmijë aktiv. Popullsi aktive popullsi në gjendje pune.
2. spec. Që merr pjesë dhe vepron në një proces; që vazhdon të veprojë, që nuk është shuar; që rrezaton ose jep një energji të caktuar. Përbërës aktiv. Thëngjill aktiv. Lëndë aktive. Pus aktiv. Vullkan aktiv. Sëmundje aktive. Shtresa aktive e tokës. Oksigjen aktiv. Krem aktiv. Formë aktive (pasive). Imunitet aktiv. Antenë aktive. Karrocë invalidore aktive.
3. libr. Që zotërohet dhe që vihet në përdorim të gjallë. Përvetësim (zotërim) aktiv. Fjalori aktiv. Zotëroj në mënyrë aktive një gjuhë. Leksiku aktiv (pasiv).
4. usht. Që është në shërbimin e rregullt e të vazhdueshëm. Oficer aktiv. Shërbimi ushtarak aktiv.
5. gjuh. Që tregon gjendje veprimi; veprore; kund. pasive. Folje aktive (pasive). Formë aktive foljore. Gjendje aktive foljore. E tashme aktive. Fjali aktive (veprore).
✱Sin.: veprues, zelltar, i gjallë, energjik, i përkushtuar.
AUTENTICITÉT,~I m., libr. 1. Të qenët i vërtetë, i saktë, i besueshëm; vërtetësia e një objekti, e një veprimi apo e një përvoje që përputhet me origjinën e vërtetë dhe që nuk është e rrejshme, e falsifikuar ose e ndryshuar. Autenticiteti i ndjenjave njerëzore. Autenticiteti i objektit. U dëshmua autenticiteti i dokumentit. Ka autenticitet të plotë.
2. filoz. Të jetuarit në përputhje me vlerat, me besimin dhe me identitetin personal pa u ndikuar nga pritshmëritë apo standardet e jashtme. Autenticiteti i tij nuk vihet në dyshim.
3. art. Vërtetësia e një vepre artistike ose shkencore e dëshmuar se është krijuar nga autori ose artisti që pretendon të jetë i vërteti. U zbulua autenticiteti i pikturës. Autenticiteti i ideve të autorit.
✱Sin.: vërtetësi, saktësi, besueshmëri, burimësi, origjinalitet, njëjtësi, siguri, ligjësi.
AVALÚES,~I m. sh. ~, ~IT fin. Ai që siguron besueshmëri dhe siguri për kreditorët, duke marrë përsipër pagesën e detyrimit në raste të mospagesës nga huamarrësi; garantues, avalist. Garancia e avaluesit. Dha siguri avaluesi. U kërkua një avalues.
✱Sin.: garantues, sigurues, avalist, dorëzanë, dëshmues, mbulues, shlyes.
AVALÚES/E,~JA f. sh. ~E, ~ET fin. Ajo që siguron besueshmëri dhe siguri për kreditorët, duke marrë përsipër pagesën e detyrimit në raste të mospagesës nga huamarrësi, garantuese, avaliste. Përgjegjësia e avalueses. Nuk dha siguri avaluesja. Avaluesja pranoi detyrimin ligjor.
✱Sin.: garantuese, siguruese, avaliste, dorëzane, dëshmuese, mbuluese, shlyese.
BESUESHMËRÍ,~A f., libr. Të qenët i besueshëm; besimi i plotë që kemi ndaj dikujt a ndaj diçkaje; vetia e diçkaje që është e besueshme. Besueshmëria e thënieve (e të dhënave). Forcimi i besueshmërisë. E humbi besueshmërinë. Siguron (fiton) besueshmëri. Shkalla e besueshmërisë. Vërtetim besueshmërie. Iu lëkund besueshmëria ndaj shokut.
PABESUESHMËRÍ,~A f. sh. ~, ~TË Të qenët i pabesueshëm; vetia e diçkaje që është e pabesueshme; mungesë besueshmërie; kund. besueshmëri. Shprehu pabesueshmëri.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë