Fjalë që fillojnë me...
Fjalë me të njëjtat parashtesa ose tema fjalëformuese.
Mëso si ta përdorësh
<<< Kthehu te kërkimi kryesor në fjalor
ANARKÍ,~A f. 1. Gjendje që krijohet në shoqëri, kur mungon pushteti shtetëror i organizuar ose autoriteti legjitim dhe kur nuk veprojnë ligjet e rregullat e detyrueshme për pjesëtarët e shoqërisë; mohim i shtetit dhe i çfarëdo pushteti politik të organizuar. Anarkia feudale. Mbretëron anarkia. Anarkia si mënyrë jetës. Vendi ra në anarki. Lufta solli anarki.
2. Çrregullim që krijohet nga mungesa e drejtimit, e organizimit dhe e planifikimit; çrregullim i madh, pështjellim në një fushë. Anarkia në prodhim. Bie në anarki. Sjell (mbjell) anarki. Del nga anarkia.
✱Sin.: çrregullim, çrregullsi, paligjshmëri, shpërbërje, pështjellim, rrëmujë, kaos.
ANORMALITÉT,~I m. Të qenët jonormal; kund. normalitet. Anormaliteti u kthye në normalitet. Kudo shoh anormalitet.
✱Sin.: jonormalitet, çrregullsi, parregullsi.
ANTIRRÉGULL,~I m. sh. ~A, ~AT Të qenët kundër rregullit; gjendje e çrregullt; kund. rregull. Shquhet për antirregull. E do antirregullin.
✱Sin.: kundërrregull, çrregullsi, parregullsi, rrëmujë.
ARITMÍ,~A f. 1. libr. Mungesë ritmi në një veprim, në një lëvizje ose në një proces; mungesë barazie; humbje e ritmit. Aritmi e vargut. Aritmi poetike. Aritmi e lëkundjeve. Aritmi e jetës.
2. mjek. Shmangie nga ritmi normal i zemrës, shpejtim ose ngadalësim i rrahjeve të zemrës, çrregullim i rrahjeve të zemrës. Aritmi zemre. Vuan nga aritmia. Simptomat e aritmive. Aritmi e parregullt. Parandalimi i aritmisë.
3. muz. Çrregullim i ritmit në një pjesë muzikore a koreografike. Aritmi tingujsh. Aritmi e melodisë. Aritmi e vallëzimit.
✱Sin.: joritmi, çrregullim, çrregullsi, parregullsi, jonjëjtësi, jonjëllojtësi.
PARREGULLSÍ,~A f. sh. ~, ~TË 1. vet. nj. Të qenët i parregullt; mungesë rregullsie në zhvillimin a në përsëritjen e diçkaje; kund. rregullsi. Parregullsia e vargjeve. Parregullsia e shfaqjes së një dukurie. Ka parregullsi.
2. Diçka që bëhet në kundërshtim me rregullat e caktuara; dukuri a shfaqje e parregullt; e metë. Parregullsi gjuhësore. Shmang (mënjanoj) parregullsitë.
✱Sin.: parregulli, çrregullsi, çrregullim, e metë.
ÇRREGULLÍM,~I m. sh. ~E, ~ET 1. Veprimi kur çrregulloj diçka ose kur çrregullohet; kund. rregullim. Çrregullimi i shtëpisë. Çrregullimi i aparateve. Çrregullimi i ekonomisë. Çrregullim në të ardhura.
2. Gjendje në të cilën është prishur rregulli, rrëmujë, pështjellim. Çrregullim i madh (i plotë). Çrregullim vlerash. Nuk dukej ndonjë shenjë çrregullimi.
3. Ecuri e çrregullt e një pune, proces që vijon pa rregull; ndërprerje. Çrregullimet në punën e një pajisjeje. Çrregullimet në veprimet administrative. E gjeta në çrregullim të plotë. Shkakton çrregullime.
4. mjek. Veprimtari jo e rregullt e një organi për shkak të një sëmundjeje. Çrregullime të tretjes. Kam disa çrregullime në jashtëqitje. Çrregullimi i gjumit nga barnat e ndryshme.
5. psikol. Ndërprerje e funksionimit të rregullt të ndonjë organi të trupit a të mendjes. Çrregullim i ankthit. Çrregullimi i humorit. Çrregullime të personalitetit. Çrregullime të shëndetit mendor.
5. vet. sh. Lëvizje e një grupi njerëzish përkundër rendit të vendosur, turbullira. Çrregullime në fshat (në ushtri). Ndjellin çrregullime. Njerëz që shkaktojnë çrregullime.
✱Sin.: çrregullsi, rrëmujë, pështjellim, parregullsi, ndërprerje, turbullirë.
ÇRREGULLSÍ,~A f. sh. ~, ~TË Parregullsi; kund. rregullsi. Dyndej prapë në një çrregullsi të plotë. Çrregullsia në zemberekun e kohës. Çrregullsi në mbarëvajtjen e punëve.
Fjalë me të njëjtat parashtesa ose tema fjalëformuese.
Fjalë që rimojnë ose mbarojnë me të njëjtat germa.
Kërko forma në përkufizime ose shembuj. _
© Akademia e Shkencave e Shqipërisë, 2026 —
Të gjitha të drejtat janë të rezervuara. Çdo riprodhim, i pjesshëm ose i plotë i veprës, qoftë në format elektronik e qoftë në letër, në kundërshtim me ligjin nr. 36/2016 (ndryshuar me ligjin nr. 37/2022, datë 14.4.2022): "Për të drejtat e autorit dhe të drejtat e tjera të lidhura me to", do të ndiqet ligjërisht.
www.akad.gov.al
Adresa: Sheshi "Fan Noli", Tiranë